រកឃើញវីរុសកាចសាហាវមួយប្រភេទ លើទឹកដីអាមេរិក ជាលើកដំបូង

ជារឿងដ៏គួរឲ្យភ្ញាក់ផ្អើល ដែលវីរុសកាចសាហាវមួយប្រភេទ ត្រូវបានរកឃើញលើកដំបូងលើទឹកដីសហរដ្ឋអាមេរិក ជំរុញឲ្យមានការភ័យខ្លាចថា វាអាចបង្ករោគរាតត្បាតជាសកលថ្មីទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នោះគឺវីរុស Camp Hill ដែលជាពូជនៃមេរោគ Henipavirus មានប្រភពដើមចេញពីសត្វប្រចៀវ។ សម្រាប់ Henipavirus គឺជាមេរោគដែលមានអត្រាមរណៈរហូតដល់ទៅ៧០%ឯណោះ ប៉ុន្តែចំពោះ Camp Hill វិញ អ្នកវិទ្យាសាស្រ្តនៅតែមិនទាន់ដឹងថាតើ វាមានអត្រាមរណៈប៉ុន្មានភាគរយ ឬថាតើមានចេញរោគសញ្ញាអ្វីខ្លះទេ។

តាមការចុះផ្សាយរបស់ Daily Mail កាលពីថ្ងៃចន្ទទី៣ខែកុម្ភៈឆ្នាំ២០២៥, ក្រុមអ្នកវិទ្យាសាស្រ្តបានរកឃើញវីរុស Camp Hill ក្នុងខ្លួនសត្វកណ្តុរនៅរដ្ឋ Alabama ហើយព្រមានថា វាអាចមានឱកាសចម្លងមកមនុស្សបានគ្រប់ពេល។

តាមពិតទៅ Camp Hill ត្រូវបានរកឃើញដំបូងក្នុងខ្លួនសត្វប្រចៀវនៅប្រទេសអូស្រ្តាលី រាប់ឆ្នាំមកហើយ តែទើបពេលនេះប៉ុណ្ណោះ ដែលវាត្រូវបានគេប្រទះជាលើកដំបូងនៅលើទឹកដីសហរដ្ឋអាមេរិក។

ដ្បិតតែគេមិនទាន់ដឹងច្បាស់អំពីមេរោគនេះក៏ពិតមែន ប៉ុន្តែក្រុមអ្នកវិទ្យាសាស្រ្តបានមើលឃើញពីភាពស្រដៀងគ្នារបស់វា ជាមួយវីរុស Henipavirus។

Henipavirus មានចេញរោគសញ្ញាដូចជា គ្រុនក្តៅ អស់កម្លាំង ក្អក មិនឃ្លានចំណី ស្រវាំងភ្នែក និងចង្អោរ ហើយវាក៏ធ្លាប់បង្កការឆ្លងរាលដាលដែរនៅប្រទេសចិន កាលពី២ឆ្នាំមុន។

ម្យ៉ាងវិញទៀត អង្គការសុខភាពពិភពលោក ធ្លាប់ប្រកាសហើយថា Henipavirus គឺមានអត្រាមរណភាពខ្ពស់ជាង កូវីដ-១៩ទៅទៀត៕

អត្ថបទ៖ សុខ សុវណ្ណ

ចុចអាន៖ ចិនរកឃើញវីរុសថ្មីនៅក្នុងសមុទ្រប៉ាស៊ីហ្វិកជ្រៅបំផុត មិនធ្លាប់មាន