ព័ត៌មានអន្ដរជាតិ

ហ្សេលេនស្គី ពិបាកចិត្ត ថា បើអាមេរិកផ្តាច់ជំនួយមែន អ៊ុយក្រែន មិនដឹងរស់បានឬអត់

បានផុស

៥ ថ្ងៃ មុន

នៅ

ថ្ងៃសុក្រ ៧ កុម្ភៈ ២០២៥

ដោយ

តាមការចុះផ្សាយរបស់ RT កាលពីថ្ងៃព្រហស្បតិ៍ទី៦ខែកុម្ភៈឆ្នាំ២០២៥, ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានបង្ហាញពីកង្វល់ក្នុងចិត្តថា បើអាមេរិកផ្តាច់ជំនួយមែន អ៊ុយក្រែន មិនដឹងរស់បានឬអត់ទេ។

ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី (រូបថត៖ Global Look Press)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់អ្នកសារព័ត៌មាន លោកហ្សេលេនស្គី លើកឡើងថា «ចំពោះអ្វីដែលយើងអាចធ្វើបានដោយគ្មានជំនួយនេះ ខ្ញុំក៏មិនចង់ស្រមៃឡើយថាតើនឹងមានអ្វីកើតឡើង។ ពិតណាស់ វានឹងប៉ះពាល់ខ្លាំងដល់សមត្ថភាពរបស់យើងក្នុងការការពារទឹកដី ខ្ញុំមិនប្រាកដឡើយ ថាយើងនឹងទប់ទល់ជាប់ ឬមិនដឹងអាចរស់បានឬអត់»។

ទោះបីជាយ៉ាងណាក៏ដោយ មុននេះលោកហ្សេលេនស្គី ក៏បញ្ជាក់ហើយដែរថា អ៊ុយក្រែន នៅតែបន្តទទួលបានជំនួយផ្នែកយោធាពីសហរដ្ឋអាមេរិកដដែល គ្រាន់តែមិនទាន់មានការពិភាក្សាអំពីកញ្ចប់ថ្មីនាពេលអនាគតប៉ុណ្ណោះ។ មេដឹកនាំវ័យ៤៧ឆ្នាំរូបនេះ បន្ថែមថា វាលឿនពេកហើយសម្រាប់កិច្ចពិភាក្សាលើជំនួយយោធាថ្មី ដែលនឹងប្រព្រឹត្តទៅ។

សហរដ្ឋអាមេរិកគឺជាអ្នកគាំទ្រដ៏សំខាន់របស់ទីក្រុងកៀវ ចាប់តាំងពីជម្លោះរុស្ស៊ី-អ៊ុយក្រែន ផ្ទុះឡើងក្នុងខែកុម្ភៈឆ្នាំ២០២២ ហើយកាលពីខែមុន ប្រធានាធិបតីអាមេរិកលោក ដូណាល់ ត្រាំ អះអាងថា ទីក្រុងវ៉ាស៊ីនតោនបានចំណាយប្រាក់ចំនួន ២០០ពាន់លានដុល្លារជួយទីក្រុងកៀវ។

យ៉ាងណា លោក ហ្សេលេនស្គី បានបដិសេធ ហើយឆ្លើយតបវិញថា អ៊ុយក្រែនទទួលបានតែ ៧៦ពាន់លានដុល្លារប៉ុណ្ណោះពីសហរដ្ឋអាមេរិក៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី៖ អាមេរិកមិនទាន់កាត់ជំនួយអ៊ុយក្រែនទេ គ្រាន់តែមិនទាន់ចរចាពីកញ្ចប់ជំនួយថ្មី