ព័ត៌មានអន្ដរជាតិ

អាមេរិកគ្រោងស្នើច្បាប់រឹតត្បឹតការវិនិយោគអាមេរិកនៅចិនឡើងវិញ

បានផុស

១ ខែ មុន

នៅ

ថ្ងៃពុធ ១២ កុម្ភៈ ២០២៥

ដោយ

ប្រធានគណៈកម្មាធិការសភាអាមេរិកទទួលបន្ទុកបញ្ហាចិន បានឱ្យដឹងថា ច្បាប់ស្ដីពីការកម្រិតការវិនិយោគរបស់សហរដ្ឋអាមេរិកក្នុងប្រទេសចិន នឹងដាក់ស្នើទៅសភាអាមេរិកជាថ្មី ក្រោយពីបរាជ័យមិនបានធ្វើកាលពីឆ្នាំមុន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក John Moolenaar ដែលជាតំណាងរាស្រ្តគណបក្សសាធារណរដ្ឋផងដែរនោះ គាំទ្រលើការកម្រិតលើ ការវិនិយោគរបស់សហរដ្ឋអាមេរិកនៅចិន ដោយនិយាយថា ការអនុម័តច្បាប់នេះនឹងតម្រូវឱ្យមានការគាំទ្រផ្នែកនយោបាយពេញទំហឹង។ លោកបន្តថា៖ «យើងប៊ិះនឹងបានអនុម័តច្បាប់ស្ដីពីការវិនិយោគទៅក្រៅប្រទេសក្នុងសប្តាហ៍ចុងក្រោយនៃការប្រជុំសភាចុងក្រោយហើយ។ យើងនឹងដាក់ស្នើវាឡើងវិញ ហើយយើងនឹងប្រឹងប្រែងដើម្បីជំរុញវាទៅមុខ»។

ការរាយការណ៍ជុំវិញបញ្ហានេះ ធ្វើឡើងក្រោយសមាជិកសភាទ្វេបក្ស បានរិះគន់អ្នកផ្តល់មូលនិធិវិនិយោគធំៗរបស់សហរដ្ឋអាមេរិក ចំពោះការយកប្រាក់រាប់ពាន់លានដុល្លារទៅវិនិយោគក្នុងក្រុមហ៊ុនចិន ដែលគេជឿថាកំពុងជួយអភិវឌ្ឍវិស័យយោធារបស់ចិន។

កាលពីខែធ្នូ សមាជិកសភាគណបក្សប្រជាធិបតេយ្យបានចោទប្រកាន់សមាជិកសភាសាធារណៈរដ្ឋមួយចំនួនថាបានការពារផលប្រយោជន៍អាជីវកម្មរបស់លោក អេឡុន ម៉ាសក៍ ក្នុងប្រទេសចិន ដោយលុបចោលបទប្បញ្ញត្តិមួយចំនួនក្នុងច្បាប់ផ្តល់មូលនិធិរបស់សហរដ្ឋអាមេរិក ដែលនឹងហាមឃាត់ក្រុមហ៊ុនអាមេរិកពីការវិនិយោគក្នុងវិស័យយុទ្ធសាស្ត្រ ដូចជាប្រព័ន្ធបញ្ញាសិប្បនិម្មិត (AI) និងបន្ទះឈីបទំនើបៗជាដើម។

លោក John Moolenaar ដែលជាតំណាងរាស្រ្តគណបក្សសាធារណរដ្ឋ និងជាប្រធានគណៈកម្មាធិការសភាអាមេរិកទទួលបន្ទុកបញ្ហាចិន។

បើតាមរ៉យទ័រ លោក ម៉ាសក៍ ដែលជានាយកប្រតិបត្តិក្រុមហ៊ុនផលិតរថយន្តអគ្គិសនី Tesla និងជាសម្ព័ន្ធមិត្តយ៉ាងជិតស្និទ្ធរបស់ប្រធានាធិបតីអាមេរិក បច្ចុប្បន្ន លោក ដូណាល់ ត្រាំ មានប្រតិបត្តិការអាជីវកម្មយ៉ាងធំក្នុងប្រទេសចិន។

កាលពីឆ្នាំមុន លោក ម៉ាសក៍ បានបើកយុទ្ធនាការអនឡាញ ដើម្បីប្រឆាំងនឹងច្បាប់កម្រិតការវិនិយោគរបស់អាមេរិកនៅចិន។ ក្រោយមក វិធានការវិនិយោគដដែល ក៏ត្រូវបានលុបចោលវិញ ប៉ុន្តែគេមិនច្បាស់ទេ ថាតើលោក ម៉ាសក៍ មានឥទ្ធិពលលើការសម្រេចចិត្តលុបចោលនេះដោយផ្ទាល់ឬអត់។

គួរគូសបញ្ជាក់ថា ចិន ដែលជាគូប្រជែងខាងភូមិសាស្ត្រនយោបាយ និងបច្ចេកវិទ្យាកំពូលរបស់សហរដ្ឋអាមេរិក បាននិយាយថា ខ្លួនប្រឆាំងនឹងច្បាប់បែបនេះ ដោយហៅវាថាជាកិច្ចខិតខំប្រឹងប្រែងអយុត្តិធម៌ក្នុងការកំណត់គោលដៅផលិតផល និងក្រុមហ៊ុនរបស់ចិន ក្រោមលេសសន្តិសុខជាតិ៕