ព័ត៌មានអន្ដរជាតិ

ម៉ិកស៊ិក គំរាមប្ដឹងក្រុមហ៊ុន Google ជុំវិញរឿងប្ដូរឈ្មោះទៅជា «ឈូងសមុទ្រអាមេរិក»

បានផុស

១ ខែ មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

Chheang

ប្រធានាធិបតីម៉ិកស៊ិក លោកស្រី Claudia Sheinbaum បានប្រកាសកាលពីថ្ងៃទី១៣កុម្ភៈថា រដ្ឋាភិបាលរបស់លោកស្រីកំពុងពិចារណាដាក់ពាក្យបណ្តឹងរដ្ឋប្បវេណីប្រឆាំងនឹងក្រុមហ៊ុន Google សម្រាប់ការប្តូរឈ្មោះពី «ឈូងសមុទ្រម៉ិកស៊ិក» ទៅជា «ឈូងសមុទ្រអាមេរិក» នៅលើផែនទីរបស់ខ្លួន។

លោកស្រី Claudia Sheinbaum (រូបថត៖ Bloomberg)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្លាស់ប្តូរឈ្មោះនេះ ធ្វើឡើងបន្ទាប់ពីបទបញ្ជាប្រតិបត្តិដែលចេញដោយប្រធានាធិបតីអាមេរិក លោក ដូណាល់ ត្រាំ ក្នុងខែមករាឆ្នាំ២០២៥ ក្នុងការផ្លាស់ប្តូរឈ្មោះឈូងសមុទ្រមួយនេះនៅក្នុងឯកសារ និងគោលនយោបាយរបស់សហរដ្ឋអាមេរិក។

លោកស្រី Sheinbaum បានសម្តែងការមិនពេញចិត្តចំពោះការឆ្លើយតបរបស់ Google ចំពោះលិខិតដែលផ្ញើដោយរដ្ឋាភិបាលរបស់ម៉ិកស៊ិកទៅកាន់នាយកប្រតិបត្តិ Google លោក Sundar Pichai កាលពីថ្ងៃទី៣០ខែមករាឆ្នាំ២០២៥ ដោយស្នើសុំឲ្យមានការកែតម្រូវឈ្មោះ។ លោកស្រីបានសង្កត់ធ្ងន់ថា បទបញ្ជារបស់ប្រធានាធិបតី ត្រាំ អនុវត្តតែចំពោះផ្ទៃទឹកទ្វីបអាមេរិកប៉ុណ្ណោះ និងមិនលាតសន្ធឹងដល់តួទឹកទាំងមូល ដែលត្រូវបានទទួលស្គាល់ជាអន្តរជាតិថាជា «ឈូងសមុទ្រម៉ិកស៊ិក» នោះទេ។

លោកស្រីប្រធានាធិបតី បានបន្ថែមថា បើ Google នៅតែប្រើឈ្មោះ«ឈូងសមុទ្រអាមេរិក» នោះម៉ិកស៊ិកនឹងបន្តសកម្មភាពផ្លូវច្បាប់។ លោកស្រីបានបញ្ជាក់ថា ក្រុមហ៊ុនឯកជននានា គួរដឹងពីសារៈសំខាន់នៃការផ្សព្វផ្សាយព័ត៌មានប្រកបដោយភាពត្រឹមត្រូវ។

ភាពចម្រូងចម្រាសនេះ បានបង្កឲ្យមានការជជែកដេញដោលជាអន្តរជាតិ ដោយចក្រភពអង់គ្លេសបានអះអាងជាថ្មីនូវការទទួលស្គាល់របស់ខ្លួនចំពោះឈ្មោះដើមគឺ «ឈូងសមុទ្រម៉ិកស៊ិក»។ សព្វវចនាធិប្បាយ Britannica ក៏រក្សានូវរចនាដើម ដោយគូសបញ្ជាក់ពីការឯកភាពគ្នាជាប្រវត្តិសាស្ត្រ និងភូមិសាស្ត្រដ៏យូរអង្វែង។

ជម្លោះនេះ បញ្ជាក់ពីភាពស្មុគស្មាញនៃទំនាក់ទំនងភូមិសាស្ត្រនយោបាយ និងឥទ្ធិពលនៃវេទិកាឌីជីថលក្នុងការរៀបចំការយល់ឃើញជាសកលនៃឈ្មោះភូមិសាស្ត្រ។

សូមបញ្ជាក់ថា ឈូងសមុទ្រម៉ិកស៊ិក គឺជាផ្ទៃទឹកដ៏ធំដែលមានព្រំប្រទល់ជាប់ភាគអាគ្នេយ៍នៃសហរដ្ឋអាមេរិក ម៉ិកស៊ិក និងគុយបា។ វាភ្ជាប់ទៅមហាសមុទ្រអាត្លង់ទិក និងសមុទ្រការាបៀន ហើយលាតសន្ធឹងប្រហែល ១,៥លានគីឡូម៉ែត្រការ៉េ។ វាមានសារៈសំខាន់សម្រាប់ពាណិជ្ជកម្ម ការខួងយកប្រេង និងជីវចម្រុះសមុទ្រ។ ឈូងសមុទ្រនេះក៏គាំទ្រប្រព័ន្ធអេកូឡូស៊ីសំខាន់ៗ ដូចជា ដីសណ្តទន្លេ Mississippi ផងដែរ ប៉ុន្តែបានប្រឈមមុខនឹងបញ្ហាបរិស្ថាន រួមទាំងការកំពប់ប្រេង៕

ដោយ៖ ឈាង