នគរបាលម្នាក់ឃើញស្តុបពណ៌លឿងមិនហ៊ានបើកទៅមុខបន្ត ក៏ឈប់លើគំនូសថ្មើរជើង ត្រូវរងពិន័យ

មន្ត្រីនគរបាលផ្នែកព្រហ្មទណ្ឌ នៃអធិការដ្ឋាននគរបាលខណ្ឌដូនពេញ ត្រូវទទួលរងពិន័យ ព្រោះតែបើករថយន្តសឺរ៉ែនរបស់នគរបាល ឈប់លើគំនូរថ្មើរជើងត្រង់ស្តុបផ្លូវព្រះនរោត្តម កែង១៧៨ ។ នេះបើតាមការឱ្យដឹងដោយក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នាថ្ងៃទី១៤ ខែកុម្ភៈ នេះ។ តាមចម្លើយរបស់នគរបាលរូបនេះ មូលហេតុដែលខ្លួនឈប់លើគំនូសថ្មើរជើង គឺព្រោះតែពេលបើកបរដល់ស្តុបផ្លូវព្រះនរោត្តម ស្តុបលោតភ្លើងពណ៌លឿង មិនហ៊ានបន្តដំណើរទៅមុខទៀត ក៏ឈប់លើគំនូសផ្លូវអ្នកដំណើរថ្មើរជើងកាត់ទទឹងផ្លូវ។

ការពិន័យលើមន្ត្រីនគរបាលរូបនេះ ធ្វើឡើងក្រោយពីមានការផ្សព្វផ្សាយព័ត៌មានតាមបណ្តាញសង្គម ជុំវិញករណីរថយន្តសឺរ៉ែន ម៉ាកកាមារីបាឡែន ពណ៌ខ្មៅ ឈប់នៅគំនូសផ្លូវអ្នកដំណើរថ្មើរជើងកាត់ទទឹងផ្លូវ នៅខណ្ឌដូនពេញ ។

ទំព័រហ្វេសប៊ុកដដែល ឱ្យដឹងថា ក្រោយការផ្សព្វផ្សាយ ​ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាឱ្យជំនាញធ្វើការស្រាវជ្រាវបន្ទាប់មកទើបរកឃើញថារថយន្តខាងលើរបស់អង្គភាពអធិការដ្ឋាននគរបាលខណ្ឌដូនពេញ កម្លាំងជំនាញអធិការដ្ឋាននគរបាលខណ្ឌដូនពេញ បានធ្វើការកោះហៅមន្ត្រីផ្នែកព្រហ្មទណ្ឌ នៃអធិការដ្ឋាននគរបាលខណ្ឌដូនពេញ មកសួរនាំដែលជាអ្នកបើកបររថយន្តនោះ។

តាមការបំភ្លឺរបស់មន្ត្រីផ្នែកព្រហ្មទណ្ឌ នៅថ្ងៃកើតហេតុគាត់បានជិះរថយន្តខាងលើទៅចាក់សាំង លុះដល់ចំណុចស្តុបផ្លូវព្រះនរោត្តម កែង១៧៨ សញ្ញាភ្លើងស្តុបលោតពណ៌លឿង ទើបគាត់មិនហ៊ានបន្តដំណើរទៅមុខទៀត ក៏ឈប់លើគំនូសផ្លូវអ្នកដំណើរថ្មើរជើងកាត់ទទឹងផ្លូវ។

ក្រោយពីសួរនាំរួច មន្ត្រីផ្នែកព្រហ្មទណ្ឌបានទទួលកំហុសឆ្គង និងយល់ព្រមផាកពិន័យតាមច្បាប់កំណត់ ហើយសមត្ថកិច្ចបានធ្វើការអប់រំណែនាំកុំឱ្យមានកំហុសឆ្គងបន្តទៀត៕