ហាងឆេងមាសក្នុងស្រុកជួញដូរក្នុងតម្លៃជាង ៣ ៥០០ ដុល្លារក្នុងមួយតម្លឹង

តម្លៃមាសនៅក្នុងសប្ដាហ៍នេះ ហាក់មិនមានការប្រែប្រួលខ្លាំងនោះទេពោលគឺមានការធ្លាក់ចុះបន្តិចធៀបនឹងសប្ដាហ៍មុន ដោយជួញដូរក្នុងតម្លៃ ២ ៩១៤ ដុល្លារក្នុងមួយអោនក្នុងទីផ្សារអន្តរជាតិ ឬស្មើនឹង ៣ ៥១០ ដុល្លារក្នុងមួយតម្លឹង​នៅក្នុង​ប្រទេស​កម្ពុជា។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ប្រាប់​​​កម្ពុជាថ្មីនៅថ្ងៃទី ១៨ ខែកុម្ភៈ ឆ្នាំ ២០២៥ នេះថា ដោយសារភាពមិន​ច្បាស់​លាស់​ក្នុង​ការ​ផ្លាស់​ប្ដូរថ្នាក់ដឹកនាំរដ្ឋាភិបាលសហរដ្ឋអាមេរិក និងការដាក់សម្ពាធ​ពន្ធ​របស់​​លោក ដូណាល់ ត្រាំ ទៅ​លើបណ្ដាប្រទេសមួយចំនួន ធ្វើឱ្យតម្លៃមាសនៅតែមាននិន្នាកាកើនឡើង។

បើតាមលោក ឡុង សំណាង ការកើនឡើង​តម្លៃមាស​គឺពាក់ព័ន្ធនឹងសង្គ្រាមពាណិជ្ជកម្ម ជាពិ​សេស​​​គឺការដាក់ពន្ធរបស់លោក ដូណាល់ ត្រាំ ពេលដែលគាត់ដាក់ពន្ធ វាធ្វើឱ្យតម្លៃផលិត​ផល​ដែល​នាំចូលឡើងថ្លៃ ធ្វើឱ្យរូបិយបណ្ណធ្លាក់ចុះ នាំឱ្យមានអតិផរណា ពេលហ្នឹងលុយដុល្លារ​ថោក ដែលរុញច្រានឱ្យតម្លៃមាសកើនឡើង។

សម្រាប់ហាងឆេងតាមបណ្ដា​ហាងនានានៅរាជធានីភ្នពេញលក់ចេញក្នុងតម្លៃ ៣៤៨  ដុល្លារ ក្នុងមួយជី៕