អគ្គិភ័យឆេះផ្ទះកម្មករសំណង់ក្បែរទីលានចាក់សំរាមចាស់ខូចខាតទាំងស្រុង

ផ្ទះស្នាក់នៅរបស់កម្មករសំណង់មួយខ្នងត្រូវបានអគ្គិភ័យឆាបឆេះយ៉ាងសន្ធោសន្ធៅខូចខាតអស់ទាំងស្រុងបង្កភ្ញាក់ផ្អើលកាលពីវេលាម៉ោង៧និង៣០នាទីយប់ ថ្ងៃទី១៨ ខែកុម្ភៈ ឆ្នាំ២០២៥ ក្បែរទីលានចាក់សំរាមចាស់ ក្រុម៨ ភូមិព្រែកទាល់១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

តាមប្រភពព័ត៍មានពីប្រជាពលរដ្ឋបានអោយដឹងថា មុនពេលកើតហេតុ ពួកគាត់បានឮសំឡេងស្រែកថា «ជួយផងៗ មានភ្លើងឆេះហើយ» ពេលបានឮដូច្នោះ ពួកគាត់រត់ស្ទុះពីក្នុងផ្ទះមកមើល ភ្លាមៗ បានប្រទះឃើញផ្ទះស្នាក់នៅបណ្តោះអាសន្នរបស់ក្រុមជាងសំណង់ មានអណ្តាតភ្លើងយ៉ាងសន្ធោរសន្ធៅ ផ្អើលពលរដ្ឋនៅក្បែរនោះឆោឡោ។ ខណៈនោះប្រជាពលរដ្ឋបាននាំគ្នាយកទុយោទឹកបាញ់ពន្លត់ តែដោយសារចំហាយក្តៅខ្លាំងពេក ទើបទាក់ទងទៅកាន់សមត្ថកិច្ច ដើម្បីមកជួយអន្តរាគមន៍បាញ់ពន្លត់ កុំអោយមានការរាលដាលដល់ឃ្លាំងធំមួយនៅក្បែរនោះ។

បន្ទាប់ពីទទួលបានដំណឹងថាមានករណីអគ្គិភ័យឆាបឆេះផ្ទះប្រជាពលរដ្ឋ ភ្លាមៗ លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានអោយរថយន្តពន្លត់អគ្គិភ័យចេញជួយអន្តរាគមន៍នៅកន្លែងកើតហេតុ។

អគ្គិភ័យនេះបានលេបត្របាក់ផ្ទះស្នាក់នៅបណ្តោះអាសន្នរបស់កម្មករសំណង់ទាំងស្រុង រួមសម្ភារមួយចំនួន និងបានប្រើប្រាស់រថយន្តពន្លត់អគ្គិភ័យរបស់ការិយាល័យរាជធានីភ្នំពេញ ចំនួន៨គ្រឿង ប្រើប្រាស់ទឹកអស់០៨ឡាន រថយន្តជំនួយមកពីក្រសួងមហាផ្ទៃ ចំនួន៣គ្រឿង ពុំបានប្រេីប្រាស់ទឹក រថយន្តរបស់កងរាជអាវុធហត្ថរាជធានីភ្នំពេញ ចំនួន២គ្រឿង ប្រេីប្រាស់ទឹកអស់២ឡាន និងរថយន្តរបស់ក្រុមហ៊ុនស្រាបៀរកម្ពុជា ចំនួន១គ្រឿង ប្រេីប្រាស់ទឹកអស់១ឡាន បាញ់អោយរលត់ជាស្ថាពរ។ ចំពោះមូលហេតុ សមត្ថកិច្ចជំនាញបានស្រាវជ្រាវរកឃើញថា បណ្តាលមកពីឆ្លងចរន្តអគ្គិសនីបង្កជាអណ្តាតភ្លើង៕

អត្ថបទ៖ រដ្ឋា