ផ្លូវលំក្រាលគ្រួសក្រហមនៅស្រុកសណ្ដាន់ ដែលជាអំណោយសម្ដេចធិបតី កំពុងពន្លឿនការស្ថាបនា

ផ្លូវលំក្រាលគ្រួសក្រហមនៅស្រុកសណ្ដាន់ ខេត្តកំពង់ធំ ដែលជាអំណោយសម្ដេចធិបតី ហ៊ុន ម៉ាណែត ការដ្ឋានស្ថាបនាកំពុងតែមមាញឹក។ ខណៈនាព្រឹកថ្ងៃទី១៩ ខែកុម្ភៈ ឆ្នាំ២០២៥ លោកនាយឧត្តមសេនីយ៍ ម៉ៅ សុផាន់ ចុះត្រួតពិនិត្យការស្ថាបនាផ្លូវលំក្រាលគ្រួសក្រហមនេះ។

ការដ្ឋានស្ថាបនាផ្លូវលំក្រាលគ្រួសក្រហមនេះ មានប្រវែងជាង២១គីឡូម៉ែត្រ ពីទីរួមស្រុកសណ្ដាន់ ទៅកាន់ឃុំដងកាំបិត ស្រុកសណ្ដាន់ ខេត្តកំពង់ធំ ដែលជាអំណោយរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

បើតាមលោក សំ លាងទ្រី ប្រធានក្រុមវិស្វកម្មស្ថាបនាផ្លូវ ការដ្ឋានស្ថាបនាផ្លូវនេះ បានចាប់ផ្ដើមដំណើរការស្ថាបនានៅថ្ងៃទី១៦ ខែធ្នូ ឆ្នាំ២០២៤ ហើយមកដល់ពេលនេះ ការស្ថាបនាផ្លូវ និងការរៀបចំប្រព័ន្ឋលូសម្រាប់រំដោះទឹកក្នុងរដូវវស្សាដែលមានទំហំជាង ១៣០ម៉ែត្រការ៉េ បានប្រមាណ ៥០ភាគរយហេីយ ដោយនឹងត្រូវបញ្ចប់ការស្ថាបនា នៅបំណាច់ខែកុម្ភៈ ឆ្នាំ២០២៥ ខាងមុខនេះ។

នាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានអរគុណចំពោះកងវិស្វកម្មដែលកំពុងតែស្ថាបនាផ្លូវ ដោយការយកចិត្តទុកដាក់ខ្ពស់និងសូមអរគុណដល់ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ដែលតែងតែមកពិនិត្យការស្ថាបនាផ្លូវនេះ ជាបន្តបន្ទាប់នាពេលកន្លងមក។

នាយឧត្តមសេនីយ៍ ម៉ៅ សុផាន់ បានណែនាំដល់ក្រុមវិស្វកម្ម ដែលកំពុងស្ថាបនាផ្លូវលំក្រាលគ្រួសក្រហមមួយខ្សែដែលជាអំណោយរបស់សម្ដេចធិបតី ហ៊ុន ម៉ាណែត និងលោកជំទាវ នៅ​ពេល​នេះ ​ត្រូវយកចិត្តទុកដាក់ស្ថាបនាឱ្យមានគុណភាពល្អ តាម​លក្ខណៈ​បច្ចេកទេស​ ធានាការប្រើប្រាស់បានយូរអង្វែង ស្របតាមសំណូមពររបស់ប្រជាជន៕