ព័ត៌មានអន្ដរជាតិ

បណ្ដាក្រុមហ៊ុនកូរ៉េខាងត្បូង គ្រោងបង្កើនការវិនិយោគនៅវៀតណាម

បានផុស

១ ខែ មុន

នៅ

ថ្ងៃសៅរ៍ ២២ កុម្ភៈ ២០២៥

ដោយ

បណ្ដាក្រុមហ៊ុនពីកូរ៉េខាងត្បូង រួមទាំងក្រុមហ៊ុនពហុវិស័យ SK Group, Samsung និង LG គ្រោងពង្រីកការវិនិយោគរបស់ពួកគេក្នុងប្រទេសវៀតណាម ដោយផ្តោតលើថាមពល ការផលិតបច្ចេកវិទ្យាទំនើប និងការអភិវឌ្ឍប្រកបដោយនិរន្តរភាព។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

SK Group ដែលជាក្រុមហ៊ុនពហុវិស័យធំជាងគេទី២របស់កូរ៉េខាងត្បូង គ្រោងនឹងវិនិយោគលើគម្រោងថាមពលដើរដោយឧស្ម័នធម្មជាតិពង្រាវចំនួន៣នៅវៀតណាម ក្នុងគោលបំណងអភិវឌ្ឍមជ្ឈមណ្ឌលថាមពលថ្មីមួយដែលរួមបញ្ចូលការអភិវឌ្ឍបញ្ញាសិប្បនិម្មិត អ៊ីដ្រូសែន ភស្តុភារ កសិកម្មដែលល្អសម្រាប់បរិស្ថាន និងនវានុវត្តន៍នៅវៀតណាម។

ក្នុងជំនួបជាមួយអគ្គលេខាបក្សកុម្មុនិស្តវៀតណាម លោក To Lam និងលោកនាយករដ្ឋមន្ត្រី ផាម មិញ ឈិញ កាលពីសប្ដាហ៍មុន ប្រធានក្រុមហ៊ុន SK Group លោក Chey Tae Won បាននិយាយថា ក្រុមហ៊ុនរបស់លោកកំពុងស្វែងរកនូវឱកាសដើម្បីបង្កើនការគាំទ្រ និងកិច្ចសហប្រតិបត្តិការជាមួយវៀតណាម ដើម្បីជំរុញកំណើនសេដ្ឋកិច្ចរយៈពេលវែងប្រកបដោយនិរន្តរភាព។

ក្រុមហ៊ុននេះបានវិនិយោគប្រហែល ៣,៥ ប៊ីលានដុល្លារនៅប្រទេសវៀតណាមរួចហើយ ប៉ុន្តែភាគច្រើនជាការវិនិយោគដោយប្រយោល ដែលពាក់ព័ន្ធនឹងការទិញភាគហ៊ុនក្រុមហ៊ុនធំរបស់វៀតណាម។

ទន្ទឹមនឹងនេះ ក្រុមហ៊ុន Samsung Display បានបន្ថែមការវិនិយោគប្រមាណ ១,២ ប៊ីលានដុល្លារ សម្រាប់រោងចក្រផលិតអេក្រង់ជំនាន់ថ្មីដែលមានស្រាប់ក្នុងខេត្ត Bac Ninh ភាគខាងជើង។ ការវិនិយោគនេះ មានគោលបំណងធ្វើឱ្យប្រទេសវៀតណាមក្លាយជាមជ្ឈមណ្ឌលផលិតកម្មដ៏សំខាន់សម្រាប់អេក្រង់ជំនាន់ថ្មីរបស់ Samsung ដែលដាក់ការវិនិយោគប្រមាណ ២៣ ប៊ីលានដុល្លារ នៅវៀតណាមរួចហើយ។

ក្រៅពីក្រុមហ៊ុន Samsung ក្រុមហ៊ុន LG ក៏បាននិងកំពុងបង្កើនការវិនិយោគរបស់ខ្លួនជាបន្តបន្ទាប់នៅក្នុងប្រទេសវៀតណាមផងដែរ។ កាលពីឆ្នាំមុន ក្រុមហ៊ុននេះបានចំណាយប្រាក់រាប់ពាន់លានដុល្លារទៅក្នុងគម្រោង LG Display នៅក្រុង Hai Phong ជាមួយនឹងគម្រោងពង្រីកការវិនិយោគរបស់ខ្លួនបន្ថែមទៀត។

ក្រុមហ៊ុនយក្សផ្សេងៗទៀតដូចជា Hyosung, Amkor និង Hana Micron ក៏កំពុងសម្លឹងមើលការពង្រីកការវិនិយោគ និងអាជីវកម្មរបស់ពួកគេនៅក្នុងប្រទេសវៀតណាមផងដែរ៕