ព័ត៌មានអន្ដរជាតិ

អ៊ីស្រាអែលត្រៀមទទួលចំណាប់ខ្មាំង៦នាក់បន្ថែមទៀតពីហាម៉ាស

បានផុស

១ ខែ មុន

នៅ

ថ្ងៃសៅរ៍ ២២ កុម្ភៈ ២០២៥

ដោយ

Chheang

អ៊ីស្រាអែល គ្រោងនឹងទទួលចំណាប់ខ្មាំងចំនួន ៦នាក់បន្ថែមទៀតពីតំបន់ហ្គាហ្សានៅថ្ងៃសៅរ៍ទី២២ខែកុម្ភៈនេះ ដែលជាផ្នែកមួយនៃកិច្ចព្រមព្រៀងបទឈប់បាញ់ដែលកំពុងបន្តជាមួយក្រុមហាម៉ាស។ ការដោះលែងចុងក្រោយនេះ ធ្វើឡើងបន្ទាប់ពីមានការដោះដូរគ្នាពីមុន ដែលគេឃើញមានអ្នកទោសប៉ាឡេស្ទីនរាប់រយនាក់ត្រូវបានដោះដូរសម្រាប់ចំណាប់ខ្មាំងអ៊ីស្រាអែលក្នុងរយៈពេលថ្មីៗកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណាប់ខ្មាំងដែលរំពឹងថានឹងត្រឡប់មកវិញ រួមមានបុគ្គល ៤នាក់ដែលត្រូវបានចាប់ខ្លួនក្នុងអំឡុងពេលការវាយប្រហាររបស់ហាម៉ាសលើអ៊ីស្រាអែលក្នុងខែតុលាឆ្នាំ២០២៣ ក៏ដូចជា ២នាក់ទៀតដែលត្រូវបានឃុំខ្លួននៅហ្គាហ្សាអស់រយៈពេលជិតមួយទសវត្សរ៍មកហើយ។

ការដោះដូរនេះ ធ្វើឡើងចំពេលមានភាពតានតឹងជាបន្តបន្ទាប់ បន្ទាប់ពីក្រុមហាម៉ាសបានប្រគល់សាកសពដែលត្រូវបានកំណត់អត្តសញ្ញាណខុស ដែលដំបូងឡើយបានអះអាងថាជាចំណាប់ខ្មាំងម្នាក់ឈ្មោះ Shiri Bibas។ ចាប់តាំងពីពេលនោះមក មន្ត្រីអ៊ីស្រាអែលបានទាមទារឲ្យមានការប្រគល់អដ្ឋិធាតុរបស់នាងមកវិញឲ្យបានត្រឹមត្រូវ។ បទឈប់បាញ់ដែលបានចាប់ផ្តើមតាំងពីថ្ងៃទី១៩ខែមករា បានបញ្ឈប់អរិភាពជាបណ្ដោះអាសន្ន ប៉ុន្តែដំណោះស្រាយរយៈពេលវែងនៅតែមិនប្រាកដប្រជា។

ការចរចាត្រូវបានគេរាយការណ៍ថាកំពុងបន្ត ជាមួយនឹងកិច្ចពិភាក្សាលើការធានាការដោះលែងចំណាប់ខ្មាំង ៦០នាក់បន្ថែម និងការដកកងកម្លាំងអ៊ីស្រាអែលចេញពីតំបន់ហ្គាហ្សា។ ទោះជាយ៉ាងណាក៏ដោយ កិច្ចខិតខំប្រឹងប្រែងការទូតកំពុងប្រឈមនឹងបញ្ហា ជាពិសេសបន្ទាប់ពីសំណើដ៏ចម្រូងចម្រាសរបស់ប្រធានាធិបតីអាមេរិក លោក ដូណាល់ ត្រាំ ក្នុងការអភិវឌ្ឍតំបន់ហ្គាហ្សាទៅជាកន្លែងរមណីយដ្ឋាន ដែលបានទាក់ទាញការរិះគន់ពីភាគីផ្សេងៗ។

គួររឭកឡើងវិញថា ការវាយប្រហារដែលដឹកនាំដោយក្រុមហាម៉ាសចូលទៅក្នុងប្រទេសអ៊ីស្រាអែល កាលពីខែតុលាឆ្នាំ២០២៣បានសម្លាប់មនុស្សប្រហែល ១ ២០០នាក់ ហើយចំណាប់ខ្មាំងចំនួន ២៥១នាក់ត្រូវបានចាប់ខ្លួនទៅតំបន់ហ្គាហ្សា។ យុទ្ធនាការយោធាជាបន្តបន្ទាប់របស់អ៊ីស្រាអែល ដែលសងសឹកលើក្រុមហាម៉ាស បានសម្លាប់មនុស្សប្រហែល ៤៨ ០០០នាក់៕

ដោយ៖ ឈាង

ចុចអាន៖ អ៊ីស្រាអែល ប្រាប់ថា សាកសពម្នាក់ដែលហាម៉ាសប្រគល់ឲ្យ មិនមែនជាចំណាប់ខ្មាំងទេ