អ៊ីស្រាអែលដាក់ពង្រាយរថក្រោះក្នុងតំបន់ West Bank ដើម្បី​រារាំង​ជនជាតិ​ប៉ាឡេស្ទីន​មិន​ឲ្យ​ត្រឡប់​មក​វិញ

អ៊ីស្រាអែល បានដាក់ពង្រាយរថក្រោះចូលទៅក្នុងតំបន់ West Bank ជាលើកដំបូង​គិត​ចាប់តាំងពីឆ្នាំ​២០២២​ ក្នុងគោលបំណងប្រយុទ្ធប្រឆាំងនឹងក្រុមសកម្មប្រយុទ្ធប៉ាឡេស្ទីននៅក្នុងជំរុំជនភៀសខ្លួន។

រដ្ឋមន្ត្រីការពារជាតិ​អ៊ីស្រាអែល លោក Israel Katz បានប្រកាស​កាល​ពី​ថ្ងៃ​ទី​២៣​កុម្ភៈ​ថា កងកម្លាំងអ៊ីស្រាអែលនឹងបន្តនៅក្នុងផ្នែកខ្លះនៃទឹកដី​តំបន់ West Bank យ៉ាងហោចណាស់មួយឆ្នាំ ដោយរារាំងប្រជាជនប៉ាឡេស្ទីនរាប់ម៉ឺននាក់ដែលភៀសខ្លួនមិនឲ្យត្រឡប់ទៅផ្ទះរបស់ពួកគេ​វិញ។

ប្រតិបត្តិការនេះ ដែលរួមមានការដាក់ពង្រាយរថក្រោះ Merkava ពីកងពលតូចពាសដែកលេខ​១៨៨ ទៅកាន់ទីក្រុង Jenin គឺជាផ្នែកនៃយុទ្ធសាស្ត្រទូលំទូលាយក្នុងការរុះរើហេដ្ឋារចនាសម្ព័ន្ធសកម្មប្រយុទ្ធនៅក្នុងតំបន់។ ចំណាត់ការនេះ កើតឡើងបន្ទាប់ពីឧប្បត្តិហេតុថ្មីៗនេះ រួមទាំងការផ្ទុះរថយន្តក្រុងនៅជិតទីក្រុង Tel Aviv ដែលអាជ្ញាធរអ៊ីស្រាអែលចាត់ទុកថាជា​ទង្វើ​ក្រុមសកម្មប្រយុទ្ធដែលកំពុងប្រតិបត្តិការពីតំបន់ West Bank។

មន្ត្រីប៉ាឡេស្ទីនបានថ្កោលទោស​ចំណាត់​ការ​របស់​អ៊ីស្រាអែល​នេះថាជា «ការកើនឡើង​ភាព​តាន​តឹង​ដ៏គ្រោះថ្នាក់» ដោយ​សង្កត់​ធ្ងន់​លើ​​តម្រូវការ​ការផ្លាស់ទីលំនៅយ៉ាងសំខាន់នៃគ្រួសារប៉ាឡេស្ទីន។ អង្គការមនុស្សធម៌រាយការណ៍ថា ទំហំនៃការផ្លាស់ទីលំនៅ​របស់​ប៉ាឡេស្ទីន​គឺមិនធ្លាប់មានពីមុនមកចាប់តាំងពី​សម័យ​សង្រ្គាម​៦​ថ្ងៃ​ឆ្នាំ​១៩៦៧។

សហគមន៍អន្តរជាតិកំពុងតាមដានស្ថានការណ៍​នេះ​យ៉ាងដិតដល់ ដោយមានការព្រួយបារម្ភអំពីផលប៉ះពាល់មនុស្សធម៌ និង​អស្ថិរភាពបន្ថែមទៀតនៅក្នុងតំបន់។ ចំណែក​ឯ​អង្គការសហប្រជាជាតិ បានអំពាវនាវ​ឲ្យ​​មាន​ប្រកាន់ខ្ជាប់នូវច្បាប់អន្តរជាតិដើម្បីការពារជនស៊ីវិល៕

ដោយ៖ ឈាង

ចុច​អាន៖ អាមេរិក គាំទ្រអ៊ីស្រាអែល ដែល​ពន្យារពេលដោះលែងអ្នកទោសប៉ាឡេស្ទីនជាង​៦០០​នាក់