លោក ព្រាប កុល ជំរុញវិនិយោគិនចិនមកកម្ពុជាបន្ថែម

រដ្ឋមន្ត្រីប្រតិភូអមនាយករដ្ឋមន្ត្រីលោក ព្រាប កុល នៅថ្ងៃទី២៤ ខែកុម្ភៈ ឆ្នាំ២០២៥នេះបានចូលរួមជាអធិបតីក្នុងពិធីសម្ភោធមជ្ឈមណ្ឌលសេវាកម្មសហគ្រាសសម្រាប់ប្រទេសមហាអនុតំបន់ទន្លេមេគង្គ នៅខេត្តយុនណាន ប្រទេសចិន ក្នុងដំណើរទស្សនកិច្ចមួយដើម្បីជំរុញការវិនិយោគពីចិនមកកម្ពុជាបន្ថែមទៀត។

ថ្លែងនៅក្នុងពិធីនេះលោក ព្រាប កុល បានគូសរំលេចអំពីទំនាក់ទំនងពិសេស និងស្អិតរមួតរវាងកម្ពុជា និងចិនដែលមានអាយុកាលជាច្រើនទសវត្ស និងបង្ហាញអំពីសក្តានុពលសំខាន់របស់កម្ពុជាសម្រាប់អ្នកវិនិយោគដែលរួមមាន ស្ថេរភាពនយោបាយ ស្ថេរភាពម៉ាក្រូសេដ្ឋកិច្ច ការអនុគ្រោះពន្ធនៅទីផ្សារអន្តរជាតិ កម្លាំងពលកម្មយុវវ័យច្រើន និងការចំណាយទាបលើប្រាក់បៀរវត្សអបបរិម៉ា អាកាសធាតុ និងគុណភាពដីអំណោយផលសម្រាប់វិស័យកសិកម្ម និងគោលនយោបាយគាំទ្រ និងលើកទឹកចិត្តដល់វិស័យឯកជន។

ពិធីសម្ភោធមជ្ឈមណ្ឌលសេវាកម្មសហគ្រាសសម្រាប់ប្រទេសមហាអនុតំបន់ទន្លេមេគង្គនៅខេត្តយុនណាន ប្រទេសចិន មានការចូលរួមពីតំណាងនៃរដ្ឋាភិបាលចិន និងពាណិជ្ជករជាច្រើនរូបមកពីប្រទេសជុំវិញមហាអនុតំបន់ទន្លេមេគង្គរួមមាន កម្ពុជា ថៃ វៀតណាម ឡាវ និងអ្នកវិនិយោគចិនផងដែរ។ កម្មវិធីថ្ងៃនេះគឺជាសមិទ្ធិផលនៃការពិភាក្សា និងចរចាររវាងប្រទេសពាក់ព័ន្ធ និងវិស័យឯកជន ដើម្បីសម្រួលដល់ការដឹកជញ្ជូនផលិតផលឆ្លងប្រទេស។

បន្ថែមពីចូលរួមក្នុងកម្មវិធីខាងលើនេះ លោករដ្ឋមន្ត្រីប្រតិភូអមនាយករដ្ឋមន្ត្រីក៏បន្តជួបជាមួយពាណិជ្ជករ និងអ្នកវិនិយោគចិនដើម្បីបញ្ចុះបញ្ចូល និងលើកទឹកចិត្តឱ្យមកកម្ពុជាដើម្បីសិក្សាពីឱកាសវិនិយោគក៏ដូចជាមកទស្សនាតំបន់ទេសចរនៅកម្ពុជាផងដែរ។

អ្នកវិនិយោគចិនគឺប្រភពវិនិយោគធំបំផុតរបស់កម្ពុជា រាប់ចាប់តាំងពីឆ្នាំ២០១៨ដល់ឆ្នាំ២០២៤ ​កម្ពុជាទទួលបានទុនវិនិយោគប្រមាណ៤៥ពាន់លានដុល្លារអាមេរិក ខណៈទុនវិនិយោគពីចិនគ្របដណ្ដប់ប្រមាណ៤៧%នៃទុនវិនិយោគសរុប៕

អត្ថបទដោយ ហ៊ុន សិរីវឌ្ឍន៍