យន្តហោះអាមេរិកហុយផ្សែងទ្រុប ទាំងស្ថិតនៅលើអាកាស, អ្នកដំណើរព្រលឹងចុងសក់គ្រប់គ្នា

ចូលឆ្នាំ២០២៥ បានត្រឹមជាង២ខែប៉ុណ្ណោះ វិស័យអាកាសចរណ៍ពិភពលោក បានជួបហេតុការណ៍រន្ធត់ៗយ៉ាងញឹក ជាពិសេសហរដ្ឋអាមេរិកតែម្តង។ ជាក់ស្តែង ហេតុការណ៍ថ្មីបំផុតនេះ គឺកើតលើជើងហោះហើរបស់ក្រុមហ៊ុន Delta Airlines ដោយយន្តហោះត្រូវចុះចតជាបន្ទាន់ ហើយជម្លៀសអ្នកដំណើរភ្លាមៗ ក្រោយមានផ្សែងហុយទ្រុបនៅក្នុងយន្តហោះ ទាំងកំពុងធ្វើដំណើរលើអាកាស ធ្វើឲ្យអ្នកជិះក្នុងនោះ ភ័យព្រលឹងចុងសក់គ្រប់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ NBC News កាលពីថ្ងៃចន្ទទី២៤ខែកុម្ភៈឆ្នាំ២០២៥, ជើងហោះហើរលេខ៨៧៦ ផ្ទុកអ្នកដំណើរ៩៤នាក់ ព្រមទាំងអាកាសយានិក២នាក់ និងនារីអូតែស៣នាក់ បានចេញដំណើរពីអាកាសយានដ្ឋានអន្តរជាតិ Hartsfield-Jackson Atlanta នៃរដ្ឋ Georgia នាវេលាម៉ោង៨:៣០នាទីព្រឹក (ម៉ោងនៅអាមេរិក) ក្នុងដំណើរឆ្ពោះទៅកាន់អាកាសយានដ្ឋាន Columbia Metropolitan នៃរដ្ឋ South Carolina។

ទោះបីជាយ៉ាងណាក៏ដោយ ធ្វើដំណើរបានត្រឹម៣៥នាទីប៉ុណ្ណោះ យន្តហោះប្រភេទ Boeing 717 មួយគ្រឿងនេះ ក៏ហោះបកមកកន្លែងដើមវិញក្រោយមានផ្សែយហុយក្នុងយន្តហោះ ហើយក៏ចុះចតនិងជម្លៀសអ្នកដំណើរចេញយ៉ាងបន្ទាន់បំផុត តាម Slide នៅម៉ោង៩:០៤នាទី។

យ៉ាងណា ជាសំណាងល្អដែរ ដែលគ្មាននរណាម្នាក់រងរបួសសោះ ក្នុងឧទ្ទវហេតុនេះ។

ជុំវិញបញ្ហាខាងលើ ក្រុមហ៊ុន Delta Airlines បានចេញការសុំទោសដល់អតិថិជនរបស់ខ្លួន ប៉ុន្តែមិនបញ្ជាក់ឡើយថាតើ មូលហេតុអ្វីទើបបណ្តាលឲ្យមានផ្សែងហុយពេញយន្តហោះដូច្នេះ។

សូមជម្រាបថា នេះគឺជាករណីទី២ក្នុងរយៈពេលត្រឹម២ថ្ងៃ ដែលក្រុមហ៊ុន Delta ជួបបញ្ហាពេលកំពុងហោះហើរ។ ជាក់ស្តែង កាលពីថ្ងៃសៅរ៍ យន្តហោះដែលធ្វើដំណើរពីអាកាសយានដ្ឋានអន្តរជាតិ Los Angeles ឆ្ពោះទៅកាន់ប្រទេសអូស្រ្តាលី ក៏មានផ្សែងហុយដូច្នេះដែរ ហើយត្រូវបង្ខំចិត្តហោះបក ទៅចុះចតនៅកន្លែងដើមដូចគ្នា៕

អត្ថបទ៖ សុខ សុវណ្ណ

ចុចអាន៖ យន្តហោះក្រុមហ៊ុន American Airlines ផ្ទុកអ្នកដំណើរ ១៩៩នាក់ រងការគំរាមបំផ្ទុះគ្រាប់បែក នៅលើអាកាស