អតីតប្រធានបាល់ទាត់អេស្ប៉ាញ Rubiales ត្រូវរក​ឃើញ​ទោសពីបទរំលោភផ្លូវភេទ

អតីតប្រធានសហព័ន្ធកីឡាបាល់ទាត់អេស្ប៉ាញ លោក Luis Rubiales ត្រូវបានគេរកឃើញ​មាន​ពិរុទ្ធកាលពីថ្ងៃព្រហស្បតិ៍ពីបទរំលោភផ្លូវភេទលើកីឡាការិនី Jenni Hermoso សម្រាប់ការថើបនាង បន្ទាប់ពីការប្រកួតបាល់ទាត់ពិភពលោកនារី ឆ្នាំ២០២៣ ដែលជាឧប្បត្តិហេតុមួយបានគ្របដណ្ដប់លើជើងឯកពិភពលោកលើកដំបូងរបស់ប្រទេសអេស្ប៉ាញ ក្នុងកីឡាបាល់ទាត់នារី និងបង្កឱ្យមានការជជែកវែកញែកអំពីការបំពានផ្លូវភេទនៅក្នុងកីឡា។

ចៅក្រមនៅតុលាការជាតិរបស់ប្រទេសអេស្ប៉ាញបានបញ្ជាឱ្យលោក​ Rubiales បង់ប្រាក់ពិន័យ​ជាង ១០,៤០០ដុល្លារ និងហាមឃាត់​ចូលជិត​ចម្ងាយ ២០០ម៉ែត្រ ពីកីឡាការិនី Hermoso ឬទំនាក់ទំនងជាមួយនាងសម្រាប់រយៈពេលមួយឆ្នាំ។ ព្រះរាជអាជ្ញាបានស្នើសុំឲ្យមានការផ្ដន្ទាទោសដាក់ពន្ធនាគារ។

ប្រព័ន្ធផ្សព្វផ្សាយអេស្ប៉ាញបាននិយាយថា លោក Rubiales ដែលបានលាលែងពីតំណែងប្រធានសហព័ន្ធបាល់ទាត់អេស្ប៉ាញ ៣សប្តាហ៍បន្ទាប់ពីឧបទ្ទវហេតុនោះ ត្រូវបានគេរំពឹងថានឹងប្តឹងឧទ្ធរណ៍ចំពោះសេចក្តីសម្រេចដែលត្រូវបានចេញជាសេចក្តីថ្លែងការណ៍ជាលាយ​លក្ខណ៍អក្សរដោយគ្មានសវនាការរបស់តុលាការ។

លោក Ana Redondo រដ្ឋមន្ត្រីសមភាពរបស់ប្រទេសអេស្ប៉ាញបាននិយាយបន្ទាប់ពីសាលក្រមថា៖ «ការថើបដោយគ្មានការយល់ព្រមគឺជាការរំលោភផ្លូវភេទ។ ពាក្យសម្ដីរបស់ជនរងគ្រោះត្រូវតែគោរព»។

ការថើបនេះបានធ្វើឱ្យមានការខឹងសម្បារនៅក្នុងប្រទេសអេស្ប៉ាញ និងបានធ្វើឱ្យការប្រារព្ធពិធីនៃពានរង្វាន់បាល់ទាត់ពិភពលោកស្ត្រីជាលើកដំបូងរបស់ខ្លួនមានភាពល្អក់កករ។

នៅក្នុងសក្ខីកម្មរបស់នាងនៅការកាត់ក្តីដ៏ល្បីល្បាញ អ្នកស្រី Hermoso អាយុ ៣៤ឆ្នាំបាននិយាយថា នាងមានអារម្មណ៍ថាមិនគោរព ហើយការថើបនោះ «បានប្រឡាក់ថ្ងៃដ៏រីករាយបំផុតមួយក្នុងជីវិតរបស់ខ្ញុំ»។

លោក Rubiales វ័យ ៤៧ឆ្នាំបានទទូចថា ការថើបគឺជាការព្រមព្រៀងគ្នាហើយមេធាវីរបស់លោកបានប្រកែកថា ទោះបីជាវាមិនមែនជាការរំលោភក៏ដោយវាមិនគួរត្រូវបានកំណត់ថាជាការរំលោភផ្លូវភេទនោះទេ។

ព្រះរាជអាជ្ញាបានស្នើសុំឱ្យជាប់ពន្ធនាគារ ២ឆ្នាំកន្លះដល់ Rubiales – មួយឆ្នាំសម្រាប់ការរំលោភផ្លូវភេទ និងមួយឆ្នាំកន្លះសម្រាប់ការបង្ខិតបង្ខំ៕

ប្រែសម្រួល៖ មន្នីរ័ត្ន
ប្រភព៖ AP