​អាជ្ញាធរថៃ​រឹតបន្តឹងវិធានការ​សុវ​ត្ថិភាព​ភ្ញៀវទេសចរ​

អគ្គនាយកនៃអគ្គនាយកដ្ឋាននគរបាលទេសចរណ៍បានបើក​កិច្ចប្រជុំមួយដើម្បី​ពង្រឹង​វិធានការ​សុវត្ថិភាព​សម្រាប់​ភ្ញៀវទេសចរ ពង្រឹងកិច្ចសហប្រតិបត្តិការលើវិស័យរដ្ឋនិងឯកជនដើម្បីកសាងទំនុកចិត្ត​ដល់​ភ្ញៀវទេសចរ និង​ដើម្បី​​ការការពារសុវត្ថិភាពភ្ញៀវទេសចរ។​​

ប្រភពព័ត៌មានបានឱ្យដឹងថា នៅថ្ងៃទី២៤ ខែកុម្ភៈ ឆ្នាំ២០២៥ នៅការិយាល័យអគ្គស្នងការនគរបាលជាតិថៃ លោកឧត្តមសេនីយ៍ទោ Saksira Pueak-am បាន​ដឹកនាំ​កិច្ច​ប្រជុំ​នេះ​ដើម្បី​ឆ្លើយតបតាមគោលនយោបាយរបស់អគ្គស្នងការនគរបាលជាតិ ដោយ​​បានចេញបញ្ជាឱ្យបង្កើតមជ្ឈមណ្ឌលប្រតិបត្តិចំណុះអគ្គស្នងការនគរបាលជាតិ។

កិច្ចប្រជុំនេះមានការចូលរួមពីគ្រប់ផ្នែកពាក់ព័ន្ធទាំងអស់ដើម្បីសម្របសម្រួលប្រតិបត្តិការរួមគ្នារវាងអគ្គនាយកដ្ឋាននគរបាលទេសចរណ៍ជាមួយអង្គភាពដែលពាក់ព័ន្ធនៅក្នុងតំបន់ដើម្បី​ពង្រឹង​សុវត្ថិភាពជូនភ្ញៀវ​ទេសចរលើគ្រប់​វិស័យ និងកសាងទំនុកចិត្តដល់ភ្ញៀវទេសចរ។

លោកថា វិធានការទាំងអស់នេះចាត់ទុកថា ជាកិច្ចសហការរវាងវិស័យរដ្ឋនិងឯកជន ដោយសមត្ថកិច្ចប៉ូលិសត្រូវប្រើវិធានការអនុវត្តច្បាប់យ៉ាងតឹងរ៉ឹង រួម​ទាំង​ករណី​ដែល​ភ្ញៀវ​ទេសចររូបណាដែលប្រព្រឹត្ត​បទល្មើស​ដែល​ស្ថិត​ក្រោម​លក្ខខណ្ឌ​នៃ​ការ​ដកហូត​ទិដ្ឋាការ។ ចាប់ពីពេលនេះតទៅនឹងអនុញ្ញាតឱ្យក្រុមការងារនៅក្នុងមូលដ្ឋានទេសចរណ៍ពិចារណាស្នើសុំដកហូតទិដ្ឋាការចំពោះភ្ញៀវទេសចរដែលប្រព្រឹត្តបទល្មើសតែម្តង៕