រដ្ឋមន្ត្រីក្រសួងអប់រំ៖ មានតែការអប់រំដែលមានគុណភាពទេ ដែលអាចជួយឱ្យកូនៗរបស់អ្នកផុតពីភាពក្រីក្រ

លោក ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ បានលើកឡើងថា មានតែការអប់រំដែលមានគុណភាពទេ ដែលអាចជួយឱ្យកូនៗរបស់អ្នកផុតពីភាពក្រីក្រ មានចំណេះដឹងខ្ពង់ខ្ពស់ មានការងារធ្វើល្អ និងអាចកែប្រែវាសនាមនុស្សបាន។

លោកបានលើកឡើងបែបនេះ ក្នុងសន្និបាតបូកសរុបការងារអប់រំ យុវជន និងកីឡាឆ្នាំសិក្សា២០២៣-២០២៤ និងលើកទិសដៅការងារឆ្នាំសិក្សា ២០២៤-២០២៥ ក្រោមប្រធានបទ “អភិវឌ្ឍមូលធនមនុស្សឆ្ពោះទៅសម្រេចចក្ខុវិស័យកម្ពុជាឆ្នាំ២០២៥” នាថ្ងៃទី២៥ ខែកុម្ភៈ ឆ្នាំ២០២៥។

បើតាមលោករដ្ឋមន្ត្រី ​ការរៀនសូត្រ គឺជាការបណ្តុះនូវគំនិតឱ្យពួកគាត់ចេះស្រលាញ់ ចេះស្រមើស្រមៃ ចង់ចេះចង់ដឹង។ កត្តាទាំងនេះហើយដែលធ្វើឱ្យពួកគាត់មានភាពរីកចម្រើន មានចំណេះដឹងខ្ពង់ខ្ពស់ ដែលអាចកែប្រែនូវជោគវាសនារបស់គាត់។ ជាក់ស្តែង លោកថា «សិស្សដែលរៀនពូកែច្រើនតែមានវិន័យ ហើយនៅពេលចេញធ្វើការក៏នៅតែមានវិន័យ រីឯសិស្សខ្ចិល ពេលចេញធ្វើការនៅតែខ្ចិល»។ លោកបន្តថា សិស្សពូកែ ឬមិនពូកែមិនមែនមកពីខួរក្បាលមិនល្អនោះទេ ប៉ុន្តែពាក់ព័ន្ធទៅនឹងអត្តចរិកដែរ ព្រោះប្រសិនបើខ្ចិលហើយមិនអាចពូកែនោះទេ។

បន្ថែមពីនេះ លោករដ្ឋមន្ត្រីថា ការវិនិយោគទៅលើកុមារជារឿងសំខាន់ណាស់ ជាពិសេសនៅមត្តេយ្យសិក្សា ព្រោះជាការវិនិយោគដែលមានប្រសិទ្ធភាពខ្ពស់ជាងគេ។ លោកថា​ ឱពុកម្តាយភាគច្រើតែងតែសន្សំលុយទុកឱ្យកូន ទៅរៀនសាលាល្អនៅឧត្តមសិក្សា ឬមធ្យមសិក្សា ប៉ុន្តែផ្ទុយទៅវិញការវិនិយោគទៅលើមត្តេយ្យសិក្សានេះហើយ ដែលផ្តល់នូវផលលាភខ្ពស់ជាងគេ។

លោកបញ្ជាក់ថា ប្រសិនបើក្មេងនោះជាក្មេងដែលល្អ គាត់នឹងបានរៀនបឋម និងមធ្យម ហើយពេលរៀនទៅឧត្តមនឹងទទួលបានការងារកាន់តែល្អប្រសើរ។ ចំណែកសង្គមជាតិទាំងមូល ក៏បានកាត់បន្ថយនូវបញ្ហាអវិជ្ជមាន បញ្ហាសង្គ​ម ដែលធ្វើឱ្យសង្គមមានភាពរីកចម្រើន ហើយរដ្ឋក៏បានកាត់បន្ថយទាំងចំណាយលើសុខភាព ចំណាយលើសណ្តាប់ធ្នាប់សង្គម ដោយសារពលរដ្ឋមានការយល់ដឹងផងដែរ។

ជាមួយគ្នានេះដែរ លោករដ្ឋមន្ត្រី បានប្រាប់ពីរបៀបក្នុងការរៀនមិនថាតែភាសាខ្មែរ ឬភាសារបរទេសនោះទេ គឺមាន ២របៀប ទី១.ការរៀនក្បួនវេយ្យករ រៀនសរសេរពាក្យ រៀនសរសេរតាមអាន តែងសេក្តី ជាដើម និងទី២.ការអនុវត្ត ដើម្បីឱ្យចងចាំនូវពាក្យទាំងនោះ៕

អត្ថបទ៖ គេន ម៉ាលិះ