យន្តហោះ២គ្រឿង ប៊ិះបុកគ្នាទៀតនៅ អាមេរិក

កាលពីថ្ងៃអង្គារទី២៥ខែកុម្ភៈឆ្នាំ២០២៥ សហរដ្ឋអាមេរិក ប៊ិះនឹងកើតមហន្តរាយយន្តហោះបុកគ្នាទៀតទៅហើយ រវាងយន្តហោះដឹកអ្នកដំណើរ ជាមួយយន្តហោះឯកជន។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ AP, យន្តហោះរបស់ក្រុមហ៊ុន Southwest Airlines មួយគ្រឿងផ្ទុកអ្នកដំណើរ៩៩នាក់ រៀបនឹងចុះចតដល់គោលដៅទៅហើយ ស្រាប់តែមានយន្តហោះឯកជនមួយគ្រឿងបើកមកកាត់មុខ លើផ្លូវរត់ ធ្វើឲ្យអាកាសយានិកនៃយន្តហោះដឹកអ្នកដំណើរ បង្ខំចិត្តបញ្ជាយន្តហោះ ហោះឡើងវិញ ដើម្បីបញ្ចៀសគ្រោះថ្នាក់។

យោងតាមរដ្ឋបាលសហព័ន្ធអាមេរិក (FFA), រឿងនេះកើតឡើងនាវេលាម៉ោង៨:៥០នាទីព្រឹក (ម៉ោងនៅអាមេរិក) នៅឯអាកាសយានដ្ឋានអន្តរជាតិ Midway ក្នុងទីក្រុង Chicago នៃរដ្ឋ Illinois រវាងយន្តហោះ Boeing 737 Max8 ដែលជាជើងហោះហើររបស់លេខ ២ ៥០៤របស់ក្រុមហ៊ុន Southwest Airlines ហោះពីទីក្រុង Omaha ជាមួយយន្តហោះឯកជន Flexjet Bombardier Challenger។

FFA ចេញសេចក្តីប្រកាសថា យន្តហោះឯកជននោះបានបើកចូលផ្លូវរត់ (Runway) ដោយគ្មានការអនុញ្ញាត ខណៈខ្លួនបើកការស៊ើបអង្កេតលើករណីនេះហើយ។

ហេតុការណ៍យន្តហោះប៊ិះបុកគ្នានេះ ធ្វើឲ្យគេបារម្ភថែមមួយកម្រិតទៀតចំពោះសុវត្ថិភាពវិស័យអាកាសចរណ៍ ពិសេសនៅសហរដ្ឋអាមេរិកតែម្តង ខណៈមួយរយៈចុងក្រោយ មានហេតុការណ៍ពាក់ព័ន្ធយន្តហោះ កើតឡើងញឹកញាប់មែនទែន។

ហេតុការណ៍ធំបំផុតគឺកើតឡើងកាលពីខែមុន ដែលយន្តហោះដឹកអ្នកដំណើររបស់ក្រុមហ៊ុន American Airlines បុកជាមួយឧទ្ធម្ភាគចក្រយោធាក្បែរអាកាសយានដ្ឋាន Ronald Reagan Washington National ដោយសម្លាប់មនុស្សទាំងអស់៦៧នាក់៕

អត្ថបទ៖ សុខ សុវណ្ណ

ចុចអាន៖ យន្តហោះអាមេរិកហុយផ្សែងទ្រុប ទាំងស្ថិតនៅលើអាកាស, អ្នកដំណើរព្រលឹងចុងសក់គ្រប់គ្នា