រដ្ឋមន្ត្រីយុត្តិធម៌៖ ពលរដ្ឋខ្មែរចង់ដឹងរឿងគ្រួសារគេឈ្លោះគ្នាតាមហ្វេសប៊ុកជាជាងស្វែងយល់ពីច្បាប់  ដែលនេះជាបញ្ហាប្រឈមក្នុងសង្គម

ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ លោក កើត​​ រិទ្ធ ដែលធ្លាប់ជាធ្វើជាវាគ្មិនពន្យល់អំពីច្បាប់ លើកឡើងថា ​ច្បាប់មិនមែនជារឿងងាយស្រួលយល់ឡើយ សម្រាប់ប្រជាពលរដ្ឋទូទៅ ដែលភាគីពាក់ព័ន្ធគួរទទួលស្គាល់ចំពោះបញ្ហាប្រឈមមួយនេះ។ ប៉ុន្តែលោក កើត រិទ្ធ ក៏លើកឡើងថា ប្រជាពលរដ្ឋខ្មែរមួយចំនួនបែជាចូលចិត្តចង់ដឹងជម្លោះគ្រួសារអ្នកដទៃហែកហួរគ្នាលើបណ្ដាញសង្គម រឿងលក់ឡេ ជាជាងតាមដានការពន្យល់អំពីច្បាប់ដែលទាក់ទងនឹងជីវភាពរស់នៅប្រចាំថ្ងៃទៅវិញ។ ជុំវិញបញ្ហានេះ លោក កើត រិទ្ធ រម្លឹកគ្រាដែលលោក និងរដ្ឋមន្ត្រីសុខាភិបាល ធ្វើសេចក្ដីពន្យល់ច្បាប់ទាក់ទងនឹងកូវីដ១៩ ដែលជាច្បាប់សំខាន់នាពេលកូវីដរាតត្បាតបែជាចំនួនអ្នកតាមដានទស្សនាតិចជាង ការផ្សាយជម្លោះគ្រួសារហែកហួរគ្នាទៅវិញ។

លោក កើត រិទ្ធ លើកឡើងបែបនេះ ក្នុងសម័យប្រជុំជាវិសាមញ្ញព្រឹទ្ធសភា  កាលថ្ងៃទី២៦ ខែកុម្ភៈ ក្នុងពេលធ្វើជាតំណាងរដ្ឋាភិបាលឡើងការពារសេចក្ដីព្រាងច្បាប់ចំនួន២ ដូចជាសេចក្តីព្រាងច្បាប់ស្តីពី ការប្រឆាំងការមិនទទួល ស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជា ប្រជាធិបតេយ្យ។២.សេចក្តីព្រាងច្បាប់ស្តីពី ការចាត់ចែងជាបណ្តោះអាសន្ននូវវត្ថុចាប់យក ដើម្បីពិនិត្យ និងសុំយោបល់ពីព្រឹទ្ធសភា។​

ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ សង្កត់ធ្ងន់បែបនេះ៖«…ប៉ុន្តែច្បាប់យ៉ាងណាក៏ដោយមិនមែនជារឿងងាយស្រួលក្នុងការយល់ទេ យើងត្រូវទទួលស្គាល់បញ្ហាប្រឈមមួយនេះ។ ខ្ញុំលើកឧទាហរណ៍តូចមួយចុះ ប្រជាពលរដ្ឋរបស់យើង ឱ្យតែនិយាយរឿងច្បាប់ ឱ្យតែពន្យល់ពីច្បាប់គាត់​ ជួនកាលគាត់អត់ចង់យល់ទេ ដោយសារខ្លឹមសារវាស្មុគស្មាញពេក អញ្ចឹងនៅពេលចេញច្បាប់ពាក់ព័ន្ធកូវីដដំបូង ខ្ញុំជាមួយនិងឯកឧត្ដមរដ្ឋមន្ត្រីសុខាភិបាល ធ្វើការផ្សព្វផ្សាយច្បាប់ហ្នឹងផ្សាយបន្តផ្ទាល់ និយាយពីច្បាប់ហ្នឹង ថាច្បាប់ថ្មីហ្នឹងមានអ្វីខ្លះ ប៉ុន្តែក្នុងពេលជាមួយគ្នាហ្នឹង នៅហ្វេសប៊ុកមានគេLive ដែរ ប៉ុន្តែ live  រឿងឈ្លោះគ្នា​ live  រឿងលែងលះ live រឿងលក់ឡេ ដល់ពេលទៅមើលចំនួនដែលគេមើលរបស់យើងមើលតិចជាង គេlive  ឈ្លោះគ្នានោះទៅទៀត។ ចឹងហើយនេះគឺជាបញ្ហាប្រឈមរបស់សង្គមយើង»។

ប៉ុន្តែបើទោះបីជាបញ្ហាពលរដ្ឋមិនចង់ស្វែងយល់ពីច្បាប់ជាបញ្ហាប្រឈមក្នុងសង្គមយ៉ាងណាក៏ដោយ ក៏លោក កើត រិទ្ធ ប្ដេជ្ញាថានឹងនៅតែបន្តផ្សព្វផ្សាយពីច្បាប់តាមរយៈបច្ចេកវិទ្យាដែលកំពុងតែរីកចម្រើនឱ្យជួយផ្សព្វផ្សាយឱ្យដល់ដៃប្រជាពលរដ្ឋដែលកំពុងប្រើប្រាស់បច្ចេកវិទ្យា។

តាមលោក កើត រិទ្ធ វិធីសាស្ត្រថ្មីក្នុងការផ្សព្វផ្សាយច្បាប់ដែលទាក់ទងនឹងជីវភាពរបស់​​ប្រជាពលរដ្ឋ នឹងត្រូវធ្វើឡើងតាមបែបផែនថ្មីមួយទៀតឱ្យកាន់តែមានភាពទាក់ទាញជាងមុនដោយបញ្ចប់ចោលនូវការផ្សាយបែបផែនចាស់ដូចជាការដាក់តុមួយអង្គុយពន្យល់ពីច្បាប់ ទៅជាបែបផែនថ្មី គឺខ្លីខ្លឹម ហើយយកអ្នកដែលមានប្រជាប្រិយភាពមកជួយផ្សព្វផ្សាយ ដើម្បីទាក់ទាញពលរដ្ឋឱ្យចូលមើលសិន មើលហើយពលរដ្ឋស្ដាប់ស្វែងយល់  ដែលពេលនោះហើយពលរដ្ឋអាចយល់ពីច្បាប់បាន៕

ដោយ៖ ង៉ិល ណារ៉ាត់