ព័ត៌មានជាតិ

ថ្មម៉ាបមានប្រភពពីខេត្តកំពង់ស្ពឺ រាប់ម៉ឺនម៉ែត្រគីប យកទៅរៀបក្រាលនៅអាកាសយានដ្ឋានអន្តរជាតិតេជោ

បានផុស

៣ ម៉ោង មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

ថ្មម៉ាបមានប្រភពក្នុងស្រុករាប់ម៉ឺនម៉ែត្រគីប ត្រូវបានជ្រើសរើសសម្រាប់រៀបក្រាលនៅបរិវេណអាកាសយានដ្ឋានអន្តរជាតិតេជោ។ នេះបើតាមលោកឧកញ៉ា ឆារស៍ វ៉ាន់ នាយកគ្រប់គ្រងនៃក្រុមហ៊ុន ខេមបូឌា អ៊ែរផត អ៊ិនវេសមិន (CAIC)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងឱកាសទទួលប្រតិភូទូតប្រទេសហ្វីលីពិន និងអូស្រ្តាលីមកទស្សនកិច្ចស្វែងយល់ពីដំណើរការសាងសង់អាកាសយានដ្ឋានអន្តរជាតិតេជោ លោកឧកញ៉ា ឆារស៍ វ៉ាន់ បានឲ្យដឹងថា ខណៈដែលដំណើរការសាងសង់អាកាសយានដ្ឋានអន្តរជាតិតេជោសម្រេចបានប្រមាណ ៩៤% ក្រុមការងារកំពុងរៀបចំតុបតែងសោភ័ណភាពទាំងខាងក្នុងនិងខាងក្រៅបរិវេណអាកាសយានដ្ឋាន។

ឆ្លើយតបការសាកសួររបស់កម្ពុជាថ្មី តើមានវត្ថុធាតុដើមក្នុងស្រុកណាខ្លះត្រូវបានប្រើប្រាស់នៅអាកាសយានដ្ឋានតម្លៃជាង ១ ៥០០ លានដុល្លារនេះ? លោក ឆារស៍ វ៉ាន់ បានចង្អុលពីថ្មម៉ាបរាប់ម៉ឺនម៉ែត្រគីបដែលនឹងត្រូវរៀបក្រាលនៅបរិវេណអាកាសយានដ្ឋានអន្តរជាតិតេជោ។

លោក ឆារស៍ វ៉ាន់ បានអះអាងថា ថ្មម៉ាបប្រមាណ ៣ ម៉ឺនម៉ែត្រគីប ដែលជាវត្ថុធាតុដើមក្នុងស្រុកនឹងត្រូវប្រើប្រាស់នៅក្នុងបរិវេណអាកាសយានដ្ឋានអន្តរជាតិតេជោ។

លោក ឆារស៍ វ៉ាន់ បានគូសបញ្ជាក់ថា ការប្រើប្រាស់ផលិតផលក្នុងស្រុក ក៏ជាចំណែកមួយក្នុងការជួយគាំទ្រនិងលើកតម្លៃផលិតផលជាតិ ផ្សារភ្ជាប់ជាមួយសំណង់អាកាសយានដ្ឋានជាតិដ៏ទំនើប ដែលនឹងក្លាយជាមុខមាត់ជាមោទនភាពសម្រាប់ប្រជាជនកម្ពុជា។

ពាក់ព័ន្ធការជ្រើសរើសថ្មម៉ាបនៅអាកាសយានដ្ឋានអន្តរជាតិតេជោ បើតាមសមាគមថ្មអារកម្ពុជាបានគូសបញ្ជាក់ថា គឺមានប្រភពយកមកពីខេត្តកំពង់ស្ពឺ។

អ្នកស្រី ឡេង ដាវី អនុប្រធានសមាគមថ្មអារកម្ពុជាបានគូសបញ្ជាក់ថា នៅតាមអាកាសយានដ្ឋាន ការជ្រើសរើសផលិតផលណាមួយត្រូវស្របតាមបទដ្ឋានបច្ចេកទេសត្រឹមត្រូវ មិនអាចជ្រើសរើសខុសស្តង់ដាកំណត់នោះទេ។

បើតាមអ្នកស្រី ឡេង ដាវី ថ្មម៉ាបខេត្តកំពង់ស្ពឺមានកម្រិតស្តង់ដាទទួលស្គាល់ ទើបក្រុមហ៊ុនអភិវឌ្ឍព្រលានជ្រើសរើសយកទៅបំពាក់នៅអាកាសយានដ្ឋានអន្តរជាតិតេជោ ដែលកំពុងដំណើរការសាងសង់ គ្រោងដាក់ឲ្យដំណើរការនៅអំឡុងខែកក្កដាខាងមុខនេះ។

អនុប្រធានសមាគមថ្មអារកម្ពុជាបានអះអាងថា តាមរយៈគម្រោងថ្នាក់ជាតិធំៗដូចជាគម្រោងអាកាសយានដ្ឋានអន្តរជាតិតេជោ ដែលជ្រើសរើសប្រើប្រាស់ផលិតផលក្នុងស្រុក ក៏បានរួមចំណែកជួយលើកតម្កើងមុខមាត់ជាតិ និងផ្តល់តម្លៃបន្ថែមសម្រាប់ជំរុញការអភិវឌ្ឍឧស្សាហកម្មក្នុងស្រុកឲ្យរីកចម្រើន៕