ព័ត៌មានអន្ដរជាតិ

បារាំង ថា ខ្លួនជជែកគ្នាអំពីរ៉ែកម្រជាមួយអ៊ុយក្រែនមុនអាមេរិកទៅទៀត

បានផុស

២៧ វិនាទី មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

Chheang

រដ្ឋមន្ត្រីក្រសួងការពារជាតិបារាំងលោក Sébastien Lecornu បានប្រកាសកាលពីថ្ងៃទី២៧កុម្ភៈថា ប្រទេសបារាំងបានចូលរួមក្នុងកិច្ចពិភាក្សាជាមួយអ៊ុយក្រែនចាប់តាំងពីខែតុលាឆ្នាំ២០២៤មកម៉្លេះ ទាក់ទងនឹងការប្រើប្រាស់ធនធានរ៉ែអ៊ុយក្រែនសម្រាប់ឧស្សាហកម្មការពារជាតិ។

លោក Sébastien Lecornu និងលោក វ៉ុលឡូឌីមៀរ ហ្សេលេនស្គី (រូបថត៖ Getty)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គំនិតផ្តួចផ្តើមនេះ មានគោលបំណងធ្វើពិពិធកម្មការផ្គត់ផ្គង់របស់ប្រទេសបារាំងនូវសារធាតុរ៉ែសំខាន់ៗដែលចាំបាច់សម្រាប់ការផលិតផ្នែកការពារជាតិ។ លោក Lecornu បានសង្កត់ធ្ងន់ថា មិនដូចសហរដ្ឋអាមេរិកទេ បារាំងមិនស្វែងរកធនធានទាំងនេះជាសំណងសម្រាប់ជំនួយយោធាឡើយ ប៉ុន្តែដើម្បីបំពេញតម្រូវការនាពេលអនាគតនៃវិស័យការពារជាតិរបស់ខ្លួន។ ការចរចាដែលផ្តួចផ្តើមដោយលោកប្រធានាធិបតី Emmanuel Macron បច្ចុប្បន្នកំពុងស្ថិតក្នុងដំណាក់កាលបឋមនៅឡើយ។

លោក Lecornu បានបន្ថែមថា៖ «ឧស្សាហកម្មការពារជាតិរបស់យើង នឹងត្រូវការមួយចំនួនជាក់លាក់នៃវត្ថុធាតុដើមសំខាន់ៗនៅក្នុងប្រព័ន្ធអាវុធរបស់យើងផ្ទាល់ មិនមែនសម្រាប់ឆ្នាំក្រោយនោះទេ ប៉ុន្តែសម្រាប់រយៈពេល ៣០ ឬ ៤០ឆ្នាំខាងមុខ»។

ប្រទេសអ៊ុយក្រែន សម្បូរទៅដោយសារធាតុរ៉ែសំខាន់ៗ រួមមាន cobalt ក្រាហ្វិច លីចូម និងរ៉ែកម្រមួយចំនួនទៀត ដែលមានសារៈសំខាន់សម្រាប់បច្ចេកវិទ្យាទំនើប។ ទោះជាយ៉ាងណាក៏ដោយ ការវិនិយោគយ៉ាងច្រើនគឺត្រូវបានទាមទារដើម្បីអភិវឌ្ឍធនធានទាំងនេះឲ្យបានពេញលេញ។

ស្របគ្នានោះ សហរដ្ឋអាមេរិក និងអ៊ុយក្រែន បានឈានដល់កិច្ចព្រមព្រៀងក្របខ័ណ្ឌមួយ ដែលផ្តល់សិទ្ធិឲ្យក្រុងវ៉ាស៊ីនតោនទទួលបានសារធាតុរ៉ែកម្ររបស់អ៊ុយក្រែន ដែលមានបំណងប្រើប្រាស់ក្នុងឧស្សាហកម្មអាមេរិក ដូចជាអវកាស និងបច្ចេកវិទ្យាយោធា។ កិច្ចព្រមព្រៀងនេះត្រូវបានកំណត់ជាផ្លូវការក្នុងអំឡុងទស្សនកិច្ចរបស់ប្រធានាធិបតីអ៊ុយក្រែនលោក វ៉ុលឡូឌីមៀរ ហ្សេលេនស្គី ទៅកាន់សេតវិមាននៅថ្ងៃសុក្រសប្ដាហ៍នេះ។

សហភាពអឺរ៉ុប ក៏បានបង្ហាញពីចំណាប់អារម្មណ៍ក្នុងការចូលប្រើប្រាស់ធនធានរ៉ែរបស់អ៊ុយក្រែនផងដែរ។ ប្រធានសហភាពអឺរ៉ុបសម្រាប់យុទ្ធសាស្ត្រឧស្សាហកម្ម លោក Stéphane Séjourné បានស្នើឲ្យមានកិច្ចព្រមព្រៀងដែលមានអត្ថប្រយោជន៍ទៅវិញទៅមកលើរ៉ែសំខាន់ៗរបស់អ៊ុយក្រែន ក្នុងអំឡុងពេលទស្សនកិច្ចថ្មីៗទៅកាន់ទីក្រុងកៀវ ជាមួយប្រធានគណៈកម្មការអឺរ៉ុបលោកស្រី Ursula von der Leyen។

ការវិវឌ្ឍទាំងនេះ បានគូសបញ្ជាក់ពីរបៀបដែលរ៉ែរបស់អ៊ុយក្រែនកំពុងក្លាយជាកត្តាសំខាន់ក្នុងឆាកនយោបាយអន្តរជាតិ និងសេដ្ឋកិច្ចសកល៕

ដោយ៖ ឈាង