ហ្វីលីពីន សម្រេចបិទព្រះវិហារ និងរារាំងការធ្វើដំណើរ ខណៈករណីឆ្លងកូវីដកាន់តែកើនឡើង

ព្រះវិហារនៅទីក្រុងម៉ានីលនឹងត្រូវបិទទ្វារ ការបរិភោគនៅតាមភោជនីយដ្ឋានត្រូវហាមឃាត់ និងការធ្វើដំណើរកម្សាន្តក្រៅរដ្ឋធានីហ្វីលីពីនត្រូវបានទប់ស្កាត់ស្ថិតក្រោមការច្បាប់ថ្មីនៃការការពារជំងឺកូវីដ ១៩ ត្រូវបានដាក់អនុវត្តកាលពីថ្ងៃអាទិត្យ ខណៈប្រទេសនេះកំពុងប្រយុទ្ធប្រឆាំងនឹងករណីឆ្លងសាជាថ្មី ។

ចំនួនករណីឆ្លងថ្មីបានកើនលើសពី ៧,០០០ នាក់សម្រាប់រយៈពេលបីថ្ងៃជាប់ៗគ្នាដែលជាចំនួនខ្ពស់បំផុតចាប់តាំងពីរោគរាតត្បាតនេះដែលបាននាំយកចំនួនអ្នកឆ្លងសរុបក្នុងប្រទេសបានឡើងដល់ទៅជាង ៦៦៣.០០០ នាក់ ។

ប្រហែលពាក់កណ្តាលនៃករណីកំពុងសម្រាកព្យាបាលគឺនៅទីក្រុងម៉ានីលដែលភាគច្រើននៃប្រជាជន ១២ លាននាក់រស់នៅក្នុងសង្កាត់ក្រីក្រ និងមានមនុស្សកកកុញ ។

ច្បាប់ថ្មីនេះនឹងត្រូវដាក់ឲ្យអនុវត្តរយៈពេល ២ សប្តាហ៍ចាប់ពីថ្ងៃចន្ទ និងអនុវត្តផងដែរចំពោះខេត្តដែលនៅជុំវិញនោះដូចជា ខេត្ត Rizal ខេត្ត Cavite ខេត្ត Laguna និងខេត្ត Bulacan ។

អ្នកនាំពាក្យប្រធានាធិបតីលោក Harry Roque បាននិយាយថា “យើងមានគោលដៅពីរគឺកាត់បន្ថយការឆ្លងវីរុសនៅទីក្រុងម៉ានីល និងចៀសវាងការរីករាលដាលនៃវីរុសជាពិសេសវ៉ារ្យ៉ង់ថ្មីនៅខាងក្រៅទីក្រុងម៉ានីល ពីព្រោះយើងដឹងថាវ៉ារ្យង់ទាំងនេះអាចឆ្លងខ្លាំងជាងមុន” ។

ក្នុងរយៈពេលប៉ុន្មានសប្តាហ៍ថ្មីៗនេះការបិទតំបន់គោលដៅ បម្រាមគោចរពេលយប់ដ៏តឹងរ៉ឹង ការបញ្ជាឲ្យកុមារទាំងអស់នៅផ្ទះ និងការហាមឃាត់មិនឲ្យជនបរទេសចូលក្នុងប្រទេសត្រូវបានណែនាំ ប៉ុន្តែការឆ្លងនៅតែកើនឡើង ។

ទន្ទឹមនោះការកើនឡើងនេះត្រូវបានស្តីបន្ទោសចំពោះការអនុវត្តមិនល្អជាមួយពិធីសារសុខភាព និងករណីឆ្លងវ៉ារ្យង់ថ្មីកាន់តែច្រើនឡើងៗ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ហ្វីលីពីន រកឃើញអ្នកឆ្លងកូវីដខ្ពស់បំផុតមិនធ្លាប់មានថ្ងៃទីពីរ ជិត ៨ ពាន់ករណី

ចុចអាន ៖ លើកទី១! ហ្វីលីពីន រកឃើញអ្នកឆ្លងកូវីដខ្ពស់បំផុតមិនធ្លាប់មាន មួយថ្ងៃជាង៧ពាន់ករណី