ពេជ្រ ចរណៃ ស្នើក្រសួងវប្បធម៌ លើកទឹកចិត្តអ្នកចូលរួមផ្សព្វផ្សាយសិល្បៈវប្បធម៌ខ្មែរ ជាលិខិតអរគុណ ឬប័ណ្ណសរសើរ

តារាសម្តែង និងជាគ្រូបង្ហាត់ក្បាច់គុនល្បុក្កតោ កញ្ញា ពេជ្រ ចរណៃ បានចេញមុខស្នើដល់ក្រសួងវប្បធម៌គួរបង្កើតកម្មវិធីមួយឆ្នាំម្ដងដើម្បីជួយលើកទឹកចិត្តដល់យុវជនយុវតី ក៏ដូចជាសិល្បករដែលចូលរួមអភិរក្ស អភិវឌ្ឍនិងផ្សព្វផ្សាយពីសិល្បៈវប្បធម៌ខ្មែរ។

តារាសម្តែងកញ្ញា ពេជ្រ ចរណៃ បានលើកឡើងថា ត្រូវតែមានការលើកទឹកចិត្ត ចំពោះបុគលណាដែលមានសកម្មភាពល្អជួយដល់សង្គមជាតិនិងវប្បធម៌។ ថ្ងៃទី ៣ ខែមីនា ឆ្នាំ២០២៥ គឺជា “ទិវាវប្បធម៌ជាតិ” លើកទី២៧ ប្រារព្ធឡើងក្រោមប្រធានបទ “យុវជនដើម្បីវប្បធម៌ជាតិ”។

ពេជ្រ ចរណៃ បានបន្តថា បើគ្រាន់តែចេញសារអបអរសាទរ ប៉ុន្ដែមិនបានចូលរួមអភិរក្សអភិវឌ្ឍនិងផ្សព្វផ្សាយបន្ដទេនោះតម្លៃវប្បធម៌ខ្មែរក៏នឹងមិនអាចឋិតថេរ ឬធ្វើឱ្យរីកសុះសាយដល់អន្ដរជាតិបានដែរ ។ ថ្ងៃនេះ ខ្ញុំបានប្រគល់ជូនលិខិត ថ្លែងអំណរគុណដល់សិស្សដែលបានចូលរួមហាត់រៀន អភិរក្ស អភិវឌ្ឍនិងផ្សព្វផ្សាយពីវប្បធម៌ខ្មែរដោយស្ម័គ្រចិត្តអស់រយៈពេលជាច្រើនឆ្នាំមកហើយ ដោយមិនដែលត្អូញត្អែរ ឬទទួលបានការលើកទឹកចិត្តអ្វីឡើយ។

កញ្ញា ពេជ្រ ចរណៃ បានលើកឡើងទៀតថា “អាចទេ បើខ្ញុំស្នើរសុំឱ្យក្រសួងវប្បធម៌បង្កើតកម្មវិធីមួយឆ្នាំម្ដងជួយលើកទឹកចិត្តដល់យុវជនយុវតី សិល្បករ ដែលចូលរួមអភិរក្ស អភិវឌ្ឍនិងផ្សព្វផ្សាយពីសិល្បៈវប្បធម៌ខ្មែរត្រឹមតែលិខិតថ្លែងអំណរគុណ ឬប័ណ្ណសរសើរ”។

កញ្ញា ពេជ្រ ចរណៃ បានបន្ថែមថា ត្រឹមតែជាក្រដាសមួយសន្លឹកតែអាចធ្វើឱ្យពួកគាត់មានស្នាមញញឹមមានកម្លាំងចិត្តមានភាពកក់ក្ដៅ ដែលមានការចូលរួមលើកទឹកចិត្ដពីក្រសួងស្ថាប័នពាក់ព័ន្ធបន្ថែមទៀតនោះ៕ អត្ថបទ៖ ចាន់រ៉ា