ត្រឹមឆ្នាំ២០២៤ រដ្ឋាភិបាលឧបត្ថម្ភថវិកាដល់ស្ត្រីមានផ្ទៃពោះ និងកុមារអាយុក្រោម២ឆ្នាំប្រមាណ ២៩៦ពាន់លានរៀល

គិតត្រឹមឆ្នាំ២០២៤ រាជរដ្ឋាភិបាលឧបត្ថម្ភថវិកាដល់ស្ត្រីមានផ្ទៃពោះ និងកុមារអាយុក្រោម២ឆ្នាំប្រមាណ ២៩៦ ពាន់ លានរៀលដែលបានចូលរួមលើកកម្ពស់សុខភាព និងជីវភាពរស់នៅរបស់កម្មករនិយោជិតកាន់តែប្រសើរឡើងបន្ថែមទៀត។

លោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានថ្លែងក្នុងពិធីបិទ “សន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងការងារ និងបណ្តុះបណ្តាលវិជ្ជាជីវៈ កាលពីពេលថ្មីៗនេះថា ឆ្នាំ២០២៤ រាជរដ្ឋាភិបាលបានបើកផ្ដល់ប្រាក់ឧបត្ថម្ភសាច់ប្រាក់របស់រាជរដ្ឋាភិបាលសម្រាប់សមាជិក ប.ស.ស.ជាស្ត្រីមានផ្ទៃពោះ និងកុមារអាយុក្រោម ២ឆ្នាំ ចំនួន ១២៤ ៨១២នាក់ និងកូនចំនួន ១២៣ ៦៦៣នាក់ ដោយចំណាយថវិកាអស់ប្រមាណ ១០៦ ៤០១លានរៀល។ បើគិតត្រឹមឆ្នាំ២០២៤ នេះ បានឧបត្ថម្ភថវិកាដល់ស្ត្រីមានផ្ទៃពោះ និងកុមារអាយុក្រោម ២ឆ្នាំសរុបចំនួន ៥៧៣ ៨៨៩ នាក់ មានកូនចំនួន ៥៦២០៥៩នាក់ ចំណាយថវិកាសរុបប្រមាណ ២៩៦ពាន់លានរៀល។

គួរបញ្ជាក់ថា សមាជិក ប.ស.ស. ដែលជាកម្មការិនីមានផ្ទៃពោះនឹងទទួលបានអត្ថប្រយោជន៍ជាច្រើនរួមមាន ទទួលបានសេវាពិនិត្យ និងថែទាំមុន និងក្រោយសម្រាល ទទួលបានសេវាសម្រាលកូនដោយឥតគិតថ្លៃនៅគ្រប់មន្ទីរពេទ្យដៃគូ ប.ស.ស. ទទួលបានប្រាក់បំណាច់ប្រចាំថ្ងៃ ៧០% ចំនួន ៩០ថ្ងៃ ទទួលបានប្រាក់ឧបត្ថម្ភរបស់រាជរដ្ឋាភិបាល ក្នុងអំឡុងពេលពិនិត្យផ្ទៃពោះមុនសម្រាល និងក្រោយសម្រាល និងការចាក់វ៉ាក់សាំងកូនរហូតកុមារអាយុក្រោម២ឆ្នាំ។ ប៉ុន្តែដើម្បីទទួលបានប្រាក់បំណាច់ប្រចាំថ្ងៃ ៧០% ខាងលើ លុះត្រាតែបានបង់ភាគទានមក ប.ស.ស. បានយ៉ាងតិច ៩ខែក្នុងអំឡុងពេល ១២ខែចុងក្រោយគិតមកដល់ខែសម្រាលកូន៕

អត្ថបទ៖ សំអឿន