ព័ត៌មានអន្ដរជាតិ

តុលាការរុស្សីកាត់ទោសបុរសអង់គ្លេសដាក់គុក១៩ឆ្នាំពីបទប្រយុទ្ធឲ្យអ៊ុយក្រែន

បានផុស

២២ វិនាទី មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

តុលាការរុស្ស៊ីកាត់ទោសបុរសជនជាតិអង់គ្លេសម្នាក់ឲ្យជាប់ពន្ធនាគាររយៈពេល១៩ឆ្នាំពីបទស៊ីឈ្នួលប្រយុទ្ធឲ្យអ៊ុយក្រែន។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី០៦ខែមីនានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍នោះ បានឲ្យដឹងថា បុរសជនជាតិអង់គ្លេសឈ្មោះ James Scott Rhys Anderson អាយុ ២២ឆ្នាំជាជនជាតិអង់គ្លេសត្រូវបានកាត់ទោសពីបទ «សកម្មភាពទាហានស៊ីឈ្នួល» និង «អំពើភេរវករ» បន្ទាប់ពីការកាត់ក្តីនៅតុលាការយោធារយៈពេលបីថ្ងៃនៅទីក្រុង Kursk។

លោក Anderson ត្រូវបានចាប់ខ្លួនកាលពីខែវិច្ឆិកាឆ្នាំមុន ខណៈពេលដែលចូលរួមក្នុងការវាយលុកឆ្លងព្រំដែនរបស់ប្រទេសអ៊ុយក្រែនចូលទៅតំបន់ Kursk របស់ប្រទេសរុស្ស៊ី បានសារភាពកំហុសចំពោះការចោទប្រកាន់ប្រឆាំងនឹងគាត់។

នៅក្រោមលក្ខខណ្ឌនៃការកាត់ទោសរបស់គាត់ លោក Anderson នឹងត្រូវជាប់ពន្ធនាគាររយៈពេល៥ឆ្នាំ មុនពេលត្រូវបានផ្ទេរទៅកាន់និគមព្រហ្មទណ្ឌដែលស្ថិតនៅតំបន់អាក់ទិចដាច់ដោយឡែកពីគេដើម្បីកែប្រែ។

បើតាមវីដេអូដែលចេញដោយតុលាការ បានបង្ហាញថា លោក Anderson ងក់ក្បាលដោយស្ងៀមស្ងាត់ បន្ទាប់ពីសេចក្តីសម្រេចត្រូវបានបកប្រែឲ្យគាត់ស្តាប់។ ទោះយ៉ាងណា ការិយាល័យបរទេស និង Commonwealth របស់ចក្រភពអង់គ្លេសបានថ្កោលទោសការកាត់ទោសរបស់ លោក Anderson ថា ជាការចោទប្រកាន់មិនពិត។

សេចក្តីប្រកាសបានលើកឡើងថា៖«ក្រោមច្បាប់អន្តរជាតិ អ្នកទោសសង្គ្រាមមិនអាចត្រូវបានកាត់ទោសពីបទចូលរួមក្នុងអរិភាពឡើយ។ យើងទាមទារឱ្យរុស្ស៊ីគោរពកាតព្វកិច្ចទាំងនេះ រួមទាំងអនុសញ្ញាទីក្រុងហ្សឺណែវ និងបញ្ឈប់ការប្រើប្រាស់អ្នកទោសសង្រ្គាមសម្រាប់គោលបំណងនយោបាយ និងការឃោសនា»។

គួររម្លឹកថា នៅឆ្នាំ ២០២២ តុលាការក្នុងតំបន់ Donetsk កាន់កាប់ដោយរុស្ស៊ីបានកាត់ទោសប្រហារជីវិតពលរដ្ឋអង់គ្លេសពីរនាក់ និងជនជាតិម៉ារ៉ុកម្នាក់ពីបទដើរតួជាទាហានស៊ីឈ្នួលបរទេស និងចូលរួមក្នុងសកម្មភាព «ភេរវករ»។ បុរសទាំងបីនាក់ក្រោយមកត្រូវបានដោះលែងជាផ្នែកនៃការផ្លាស់ប្តូរអ្នកទោសដែលសម្របសម្រួលដោយអារ៉ាប៊ីសាអូឌីត។

គួរបញ្ជាក់ថា បន្ទាប់ពីការលុកលុយរបស់រុស្ស៊ីលើអ៊ុយក្រែនក្នុងខែកុម្ភៈ ឆ្នាំ ២០២២ រដ្ឋមន្ត្រីការបរទេសអ៊ុយក្រែននៅពេលនោះ លោក Dmytro Kuleba បាននិយាយថា មនុស្សជាង ២០០០០ នាក់មកពី ៥២ ប្រទេសបានស្ម័គ្រចិត្តប្រយុទ្ធឲ្យអ៊ុយក្រែន៕