ព័ត៌មានអន្ដរជាតិ

ម៉ាឡេស៊ីពិភាក្សាជាមួយក្រុមហ៊ុនឈីប ជុំវិញលទ្ធភាពពន្ធរបស់ ត្រាំ

បានផុស

៥៤ វិនាទី មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

រដ្ឋមន្ត្រីពាណិជ្ជកម្មម៉ាឡេស៊ី លោក Tengku Zafrul Aziz បានថ្លែងថា ម៉ាឡេស៊ីកំពុងពិភាក្សាជាមួយក្រុមហ៊ុនបន្ទះឈីបដែលមានមូលដ្ឋានក្នុងប្រទេសខ្លួន អំពីការសម្របខ្លួនជាមួយផលប៉ះពាល់ ដែលអាចបណ្ដាលមកពីលទ្ធភាពពន្ធរបស់សហរដ្ឋអាមេរិកលើបន្ទះឈីបនាំចូល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឱ្យដឹងរបស់លោក Tengku Zafrul ធ្វើឡើងក្រោយប្រធានាធីបតីសហរដ្ឋអាមេរិក លោក ដូណាល់ ត្រាំ បានប្រកាសកាលពីខែមុនថា លោកនឹងដាក់ពន្ធ ២៥ ភាគរយ ឬខ្ពស់ជាងនេះ លើបន្ទះឈីប នាំចូល ប៉ុន្តែមិនទាន់បានបញ្ជាក់ថានឹងប្រកាសឡើងនៅពេលណានោះទេ។

រដ្ឋមន្រ្តីរូបនេះ បាននិយាយក្នុងបទសម្ភាសន៍ជាមួយរ៉យទ័រ កាលពីថ្ងៃពុធយ៉ាងដូច្នេះថា ម៉ាឡេស៊ីត្រូវមើលពីទំហំ និងផលប៉ះពាល់នៃពន្ធគយនោះ ព្រោះវាអាចបង្កផលអវិជ្ជមានសម្រាប់ការនាំចេញរបស់ប្រទេស។ លោកថ្លែងថា៖ «យើងកំពុងពិភាក្សាជាមួយបណ្ដាក្រុមហ៊ុន ថាតើពន្ធគយនោះ នឹងត្រូវប៉ះពាល់ដល់អ្នកប្រើប្រាស់ដែរឬទេ»។

*រដ្ឋមន្ត្រីពាណិជ្ជកម្មម៉ាឡេស៊ី លោក Tengku Zafrul Aziz*

លោក Tengku Zafrul បានលើកឡើងថា៖ «ការនាំចេញនឹងបន្ត ប៉ុន្តែត្រូវតែមាននរណាម្នាក់ ដែលត្រូវចំណាយលើថ្លៃខ្ពស់ មិនថាជាអ្នកប្រើប្រាស់ ឬក្រុមហ៊ុននោះទេ»។ លោកបន្តថា រដ្ឋាភិបាលម៉ាឡេស៊ីមិនបានពិភាក្សាអំពីអ្វីដែលខ្លួននឹងធ្វើ ឬថាតើនឹងផ្តល់ការគាំទ្រផ្នែកហិរញ្ញវត្ថុ ដើម្បីទូទាត់ផលប៉ះពាល់ពន្ធ ទេ។

គួរគូសបញ្ជាក់ថា ម៉ាឡេស៊ីគឺជាមជ្ឈមណ្ឌលឧស្សាហកម្មបន្ទះឈីបដ៏ធំមួយ ដោយមានទាំងក្រុមហ៊ុនពហុជាតិយក្សអាមេរិកផលិតបន្ទះឈីបដាក់រោងចក្រជាច្រើន ដូចជាក្រុមហ៊ុន Intel និង GlobalFoundries ជាដើម។ លើសពីនេះ ម៉ាឡេស៊ីគឺជាប្រទេសនាំចេញបន្ទះឈីបកំពូលមួយទៅកាន់សហរដ្ឋអាមេរិក។ កាលពីឆ្នាំមុន ម៉ាឡេស៊ីបានដឹកជញ្ជូនឈីបក្នុងតម្លៃ ១៦,២ ប៊ីលានដុល្លារ ទៅអាមេរិក ដែលស្មើនឹងជិត ២០ ភាគរយ នៃការនាំចូលបន្ទះឈីបរបស់អាមេរិកទាំងអស់៕