ជាខ្សែសេដ្ឋកិច្ចព័ទ្ធភ្នំពេញ អភិបាលខេត្តកណ្ដាល ស្នើឥណ្ឌូនេស៊ីមកវិនិយោគក្នុងខេត្តឱ្យបានច្រើន

ជាខេត្តនៅព័ទ្ធជុំវិញរាជធានីភ្នំពេញមានអំណោយផលទៅលើការវិនិយោគ អភិបាលខេត្តកណ្ដាល បានស្នើឥណ្ឌូនេស៊ីមកបោះទុនវិនិយោគបន្ថែមក្នុងខេត្តនេះ ដើម្បីរួមចំណែករុញច្រានសេដ្ឋកិច្ចខេត្តជាប់រាជធានីរបស់កម្ពុជាមួយនេះកាន់តែរីកចម្រើន។   

ការស្នើរបស់អភិបាលខេត្តកណ្ដាល បានធ្វើឡើងក្នុងពេលដែលលោកទទួលជួបឯកអគ្គរដ្ឋទូតឥណ្ឌូនេស៊ីប្រចាំកម្ពុជា ដើម្បីសម្ដែងការគួរសម និងពិភាក្សាការងារ កាលពីរសៀលថ្ងៃទី០៦ ខែមីនា ឆ្នាំ២០២៥ នៅសាលាខេត្តកណ្ដាល។

លោក គួច ចំរើន អភិបាលខេត្តកណ្តាល បានប្រាប់ឯកអគ្គរដ្ឋទូតឥណ្ឌូនេស៊ី លោក សាន់តូ សារម៉ូស៊ូម៉ាតូ និងប្រតិភូពីភូមិសាស្ត្រ វិទ្យាសាស្ត្រ និងសេដ្ឋកិច្ច របស់ខេត្តកណ្ដាល ដោយលោកអភិបាលខេត្ត បានបញ្ជាក់ថា​ ចក្ខុវិស័យរបស់ខេត្តសម្រាប់ឆ្នាំ២០២៥ គឺប្រែក្លាយជាខ្សែក្រវាត់គាំទ្រវិស័យសន្តិសុខ សណ្តាប់ធ្នាប់សាធារណៈ ឧស្សាហកម្ម ភស្តុភារកម្ម ស្បៀង និងលំនៅឋាន នៅព័ទ្ធរាជធានីភ្នំពេញ។

ក្នុងន័យនេះ លោកអភិបាលខេត្តកណ្ដាល បានស្នើសុំដល់លោកឯកអគ្គរដ្ឋទូត ឱ្យជួយគៀងគរអ្នកវិនិយោគិនឥណ្ឌូនេស៊ីមកវិនិយោគនៅខេត្តកណ្ដាលឱ្យបានច្រើន ព្រោះថាខេត្តកណ្ដាល ជាខេត្តមួយដែលមានភូមិសាស្ត្រហំព័ទ្ធរាជធានីភ្នំពេញ ជាបណ្ដុំនៃសេដ្ឋកិច្ច មានព្រលានយន្តហោះអន្តរជាតិ មានផ្លូវជាតិសំខាន់ៗ ដែលជាសរសៃឈាមរបស់ខេត្ត ក្នុងការផ្ដល់ឱកាសឱ្យអ្នកវិនិយោគទាំងអស់ មកវិនិយោគនៅខេត្តកណ្ដាលទទួលបាននូវប្រាក់ចំណេញ។

ជាការឆ្លើយតប លោកបណ្ឌិត សាន់តូ សារម៉ូស៊ូម៉ាតូ ឯកអគ្គរដ្ឋទូតឥណ្ឌូនេស៊ីប្រចាំនៅកម្ពុជា បានទទួលយកសំណូមនិងបានសន្យាថា នឹងគៀងគរអ្នកវិនិយោមកវិនិយោគនៅខេត្តកណ្ដាល។ ខណៈលោកឯកអគ្គរដ្ឋទូត បញ្ជាក់ថា បច្ចុប្បន្ននេះ ទំនាក់ទំនងសេដ្ឋកិច្ចរវាងប្រទេសាំទាំងពីរ កម្ពុជា-ឥណ្ឌូនេស៊ី មានទំហំទឹកប្រាក់ប្រមាណជាង ១ពាន់លានដុល្លារ ហើយធ្វើឱ្យប្រទេសឥណ្ឌូនេស៊ីក្លាយជាដៃគូពាណិជ្ជកម្មលំដាប់ទី៧ សម្រាប់ប្រទេសកម្ពុជា។

ភ្ជាប់គ្នានេះ លោកឯកអគ្គរដ្ឋទូត ក៏ស្នើតបទៅកាន់រដ្ឋបាលខេត្ត ឱ្យជួយជ្រោមជ្រែងក្នុងការផ្ដល់សេវាកម្មដល់ប្រជាជនឥណ្ឌូនេស៊ី ដែលកំពុងស្នាក់នៅក្នុងខេត្តកណ្ដាលផងដែរ៕