របរខ្វៃកណ្ដុរអ្នកបាត់ដំបង នៅតែរក្សាបានទីផ្សារល្អ

មុខរបរខ្វៃកណ្ដុរ របស់លោក មុយ ចំរើន ដែលមានទីតាំងស្ថិតនៅស្រុកបរវេល ខេត្តបាត់ដំបង បច្ចុប្បន្ននេះនៅតែរក្សាបានទីផ្សារល្អមិនខុសពីឆ្នាំមុនៗ ខណៈមានការពេញនិយមពីប្រជាពលរដ្ឋជាច្រើនពីតាមបណ្តាខេត្តផ្សេងៗ។​

លោក មុយ ចំរើន អាយុ៣៧ឆ្នាំ ជាអ្នក​ចិញ្ចឹម និងខ្វៃកណ្ដុរលក់ ស្ថិតនៅស្រុកបរវេល ខេត្តបាត់ដំបង បានប្រាប់ កម្ពុជាថ្មី ថា សម្រាប់ពេលបច្ចុប្បន្ននេះ របរចិញ្ចឹមនិងខ្វៃកណ្ដុររបស់លោក នៅតែរក្សាបានអតិថិជនច្រើនគួរសម មិនខុសអ្វីពីឆ្នាំមុនៗ។

លោកបន្តថា មូលហេតុដែលលោកនៅតែរក្សាបានអតិថិជនច្រើនដដែល ដោយសារតែកណ្ដុរខ្វៃរបស់លោកមានរសជាតិឆ្ញាញ់ និងមានអនាម័យស្អាត មិនប៉ះពាល់ដល់សុខភាពអ្នកបរិភោគ។

ជារៀងរាល់ថ្ងៃ ចំរើន អាចខ្វៃកណ្ដុរលក់បានប្រមាណជាង២០គីឡូ ដោយក្នុងមួយគីឡូអាច​លក់ទៅកាន់ទីផ្សារបានចន្លោះពី ១០ដុល្លារ ទៅ១៥ដុល្លារ តាមតម្រូវការរបស់អតិថិជន។

ចំពោះទីផ្សារវិញ ចំរើន បានឱ្យដឹងទៀតថា កណ្ដុររបស់លោកជាទូទៅ មានអតិថិជនជួយគាំទ្រស្ទើរតែ ២៥ខេត្ត-ក្រុង តាមរយៈការបញ្ជាទិញតាមអនឡាញជារៀងរាល់ថ្ងៃ។

បើក្រឡេកទៅក្រោយបន្ដិច ចំរើន ជាអតីតពលករធ្វើការនៅប្រទេសថៃ តែដោយសារការតស៊ូ និងព្យាយាមអំណត់ក្នុងការងារទើបធ្វើឱ្យចំរើនបានវិវត្តខ្លួនមកជាអ្នកជំនាញចិញ្ចឹម និងខ្វៃកណ្ដុរលក់ដ៏ល្បីឈ្មោះមួយរូបប្រចាំខេត្តបាត់ដំបង។

គិតមកទល់ពេលនេះ មុខរបរចិញ្ចឹម និងខ្វៃកណ្ដុរ របស់ចំរើន មានរយៈពេល៦ឆ្នាំមកហើយ តែអ្វីដែលជាក្ដីសង្ឃឹមរបស់លោក ទៅថ្ងៃខាងមុខ អតីតពលកររូបនេះ ក៏មានគម្រោងចង់បង្កើតកសិដ្ឋានរបស់លោកឱ្យចេញទៅជាភោជនីយដ្ឋានតូចមួយ ដើម្បីទទួលភ្ញៀវ និងអាចអញ្ជើញមកទស្សនាកម្សាន្តអំពីការចិញ្ចឹមសត្វក្នុងកសិដ្ឋាន ព្រមទាំងអាចភ្លក្សរសជាតិកណ្ដុរខ្វៃដ៏មានរសជាតិឆ្ងាញ់ បានថែមទៀតផង៕

អត្ថបទ ៖ សួស សិត