អ៊ុយក្រែន បញ្ជូនដ្រូន បើកការវាយប្រហារខ្នាតធំបំផុតមិនធ្លាប់មាន លើក្រុងមូស្គូ 

រដ្ឋធានីមូស្គូនៃប្រទេសរុស្ស៊ី បានរងការវាយប្រហារទ្រង់ទ្រាយធំយ៉ាងភ្ញាក់ផ្អើលពីសំណាក់ដ្រូនរបស់អ៊ុយក្រែន នៅរាត្រីថ្ងៃចន្ទទី១០ខែមីនាឆ្នាំ២០២៥ (ពេលវេលានៅរុស្ស៊ី) ខណៈការវាយប្រហារនេះ កើតឡើងចំពេលគណៈប្រតិភូអ៊ុយក្រែន រៀបពិភាក្សាជាមួយភាគីអាមេរិក នៅប្រទេសអារ៉ាប៊ីសាអូឌីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ការវាយប្រហាររបស់អ៊ុយក្រែន​ លើទីក្រុងមូស្គូនិងតំបន់ជុំវិញនោះ បានបណ្តាលឲ្យមនុស្សម្នាក់ស្លាប់និង២០នាក់ទៀតរងរបួស ខណៈផ្ទះល្វែងចំនួន៧ខ្នង ត្រូវបំផ្លាញ។ នេះគឺជាការវាយប្រហារដោយដ្រូនទ្រង់ទ្រាយធំបំផុតមិនធ្លាប់មានសោះរបស់អ៊ុយក្រែន ទៅលើរដ្ឋធានីនៃប្រទេសរុស្ស៊ី ចាប់តាំងពីសង្គ្រាមផ្ទុះឡើងកាលពី៣ឆ្នាំមុន។

ជុំវិញរឿងនេះ ក្រសួងការពារជាតិរុស្ស៊ីចេញសេចក្តីថ្លែងការណ៍ថា អ៊ុយក្រែនបានបញ្ជូនដ្រូនមកសរុប ៣៣៧គ្រឿងដើម្បីបើកការវាយប្រហារប៉ុន្តែក្នុងនោះភាគច្រើន ត្រូវបាញ់ទម្លាក់ឬស្ទាក់ចាប់។

ទន្ទឹមនោះដែរ ទីក្រុងមូស្គូ បានបិទអាកាសយានដ្ឋានចំនួន៣ដូចជា Sheremetyevo, Domodedovo និង Vnukovo ដើម្បីសុវត្ថិភាព។

នៅឯប្រទេសអារ៉ាប៊ីសាអូឌីតឯណោះ គណៈប្រតិភូអ៊ុយក្រែនដឹកនាំដោយជំនួយការកំពូលរបស់លោកហ្សេលេនស្គីគឺលោក Andriy Yermak រួមជាមួយរដ្ឋមន្ត្រីការបរទេស Andrii Sybiha, រដ្ឋមន្ត្រីការពារជាតិ Rustem Umerov និងអនុប្រធានការិយាល័យប្រធានាធិបតី Pavlo Palisa រៀបជួបពិភាក្សាជាមួយភាគីអាមេរិកដែលដឹកនាំដោយរដ្ឋមន្ត្រីការបរទេស Marco Rubio រួមជាមួយទីប្រឹក្សាសន្តិសុខជាតិសេតវិមានលោក Michael Waltz និងបេសកជនមជ្ឈិមបូព៌ាលោក Steve Witkoff។

នេះគឺជាកិច្ចប្រជុំដ៏សំខាន់មួយ ដែលសហរដ្ឋអាមេរិកនិងអ៊ុយក្រែន ព្យាយាមស្វែងរកវិធានការដោះស្រាយ ឈានទៅការបញ្ចប់សង្គ្រាមជាមួយរុស្ស៊ី។

ទោះបីជាយ៉ាងណាក៏ដោយ លោក ហ្សេលេនស្គី នឹងមិនចូលរួមកិច្ចប្រជុំនេះទេ ប៉ុន្តែលោកនឹងជួបជាមួយព្រះអង្គម្ចាស់ Mohammed bin Salman ក្នុងទីក្រុង រីយ៉ាដ វិញ៕

អត្ថបទ៖ សុខ សុវណ្ណ

ចុចអាន៖ ត្រាំ៖ ទាំង​រុស្ស៊ី និង​អ៊ុយក្រែន សុទ្ធតែ​គ្មាន «សន្លឹក​បៀ» នៅក្នុង​ដៃ សម្រាប់​ការ​ចរចា​សន្តិភាព