ព័ត៌មានអន្ដរជាតិ

លោក Duterte សួរថា លោកខុសអី ហើយប្រើច្បាប់អ្វីមកចាប់ខ្លួនគាត់?

បានផុស

១ ខែ មុន

នៅ

ថ្ងៃអង្គារ ១១ មីនា ២០២៥

ដោយ

Chheang

យោងតាមការចុះផ្សាយរបស់សារព័ត៌មាន GMA ក្នុងអំឡុងពេលត្រូវគេចាប់ខ្លួន អតីតប្រធានាធិបតីហ្វីលីពីនលោក Rodrigo Duterte នៅថ្ងៃអង្គារទី១១ខែមីនានេះបានចោទសួររកហេតុផលដែលគាត់ត្រូវបានគេឃុំខ្លួននៅឯមូលដ្ឋានទ័ពអាកាស Villamor។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Duterte បានលើកឡើងថា៖ «តើអ្វីជាច្បាប់ និងអ្វីជាឧក្រិដ្ឋកម្មដែលខ្ញុំបានប្រព្រឹត្ត? សូមបង្ហាញមកខ្ញុំឥឡូវនេះអំពីមូលដ្ឋានច្បាប់សម្រាប់វត្តមានខ្ញុំនៅទីនេះ។ ជាក់ស្តែង ខ្ញុំត្រូវបានគេនាំមកទីនេះ មិនមែនជាឆន្ទៈរបស់ខ្ញុំទេ វាជារបស់អ្នកផ្សេង។ ប្រសិនបើមិនមែនជាអ្នកផ្សេងទេ ប្រហែលជាអ្នក ព្រោះនេះជារចនាសម្ព័ន្ធរបស់អ្នក។ ដូច្នេះ អ្នកត្រូវតែឆ្លើយឥឡូវនេះសម្រាប់ការដកហូតសិទ្ធិសេរីភាព»។

នៅលើបណ្ដាញសង្គម Instagram អ្នកនាង Veronica “Kitty” Duterte ដែលជាកូនស្រីរបស់លោក Duterte បានចែករំលែករូបថតឪពុកដែលកំពុងអង្គុយនៅក្នុងបន្ទប់នៃមូលដ្ឋានទ័ពអាកាស Villamor ជាមួយនឹងអត្ថាធិប្បាយថា៖ «ការឃុំខ្លួនខុសច្បាប់។ គ្មានដីកាចាប់ខ្លួន»។

អតីតរដ្ឋមន្ត្រីប្រចាំវិមានប្រធានាធិបតីលោក Salvador Medialdea ដែលនៅទីនោះជាមួយគ្រួសារលោក Duterte បានប្រាប់ថា អតីតប្រធានាធិបតីមិនទាំងដឹងផងថាមានដីកាចាប់ខ្លួនប្រឆាំងនឹងរូបលោកបែបនេះសោះ។

កាលពីព្រឹកថ្ងៃអង្គារ ការិយាល័យប្រធានាធិបតីហ្វីលីពីន បានបញ្ជាក់ថា លោក Duterte ស្ថិតនៅក្រោមការឃុំឃាំងរបស់អាជ្ញាធរ ដោយនិយាយថា អគ្គរដ្ឋអាជ្ញាមកពីតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនអតីតប្រធានាធិបតី នៅពេលដែលលោកត្រឡប់មកពីទីក្រុងហុងកុងទៅកាន់ទីក្រុងម៉ានីល។

សូមបញ្ជាក់ថា អតីតប្រធានាធិបតីហ្វីលីពីន លោក Rodrigo Duterte ត្រូវបានចាប់ខ្លួននៅអាកាសយានដ្ឋានអន្តរជាតិ Ninoy Aquino ជុំវិញដីកាដែលចេញដោយ ICC។

លោក Duterte ប្រឈមមុខនឹងសំណុំរឿងឧក្រិដ្ឋកម្មប្រឆាំងមនុស្សជាតិ នៅចំពោះមុខតុលាការអន្តរជាតិជុំវិញសង្គ្រាមគ្រឿងញៀនរបស់លោក ដែលបានសម្លាប់មនុស្សជិត ៣០ ០០០នាក់។ នេះបើយោងតាមចំនួនសរុបដោយក្រុមសិទ្ធិមនុស្ស ប៉ុន្តែមានសេចក្តីរាយការណ៍ខ្លះបង្ហាញថា សង្គ្រាមប្រឆាំងគ្រឿងញៀនរបស់លោក គឺសម្លាប់មនុស្សអស់ជាង៦០០០នាក់។

ការចាប់ខ្លួនលោក Duterte បានក្លាយជាការជជែកដេញដោលគ្នា ព្រោះតែបើតាមសេចក្ដីរាយការណ៍នាពេលកន្លងមក ហ្វីលីពីនបានដកខ្លួនចេញពីលក្ខន្តិកៈទីក្រុងរ៉ូម ដែលជាសន្ធិសញ្ញាបង្កើត ICC តាំងពីឆ្នាំ២០១៩មកម៉្លេះ បន្ទាប់ពីសាលាក្តីដែលមានមូលដ្ឋាននៅទីក្រុងឡាអេបានចាប់ផ្តើមការស៊ើបអង្កេតលើសង្រ្គាមគ្រឿងញៀនរបស់រដ្ឋបាលលោក Duterte៕

ដោយ៖ ឈាង

ចុចអាន៖ អតីតប្រធានាធិបតីហ្វីលីពីន លោក Duterte ត្រូវបានចាប់ខ្លួន ពីបទឧក្រិដ្ឋកម្មប្រឆាំងមនុស្សជាតិ