កម្ពុជា-ថៃ នឹងបើកឱ្យពលរដ្ឋប្រើប័ណ្ណព្រំដែនសម្រាប់ចេញចូលតាមច្រកទ្វារអន្តរជាតិជប់គគីរ

អាជ្ញាធរខេត្តឧត្តរមានជ័យ និងខេត្តបុរីរ៉ាំ របស់ថៃ នឹងចាប់ផ្ដើមបើកឱ្យប្រជាពលរដ្ឋធ្វើដំណើរចេញចូល ដោយប្រើប័ណ្ណព្រំដែនសម្រាប់ច្រកទ្វារព្រំដែនអន្តរជាតិជប់គគីរ-សៃតាគូ។ ការផ្ដើមដំណើរការចេញចូលដោយប្រើប័ណ្ណព្រំដែននេះ ជាការបង្កើនកិច្ចសហប្រតិបត្តិការ ដើម្បីធានាបានព្រំដែនសន្តិភាព មិត្តភាព និងលើកកម្ពស់ជីវភាពរស់នៅរបស់ប្រជាជននៅតំបន់ព្រំដែន។

ជាក់ស្ដែងនាព្រឹកថ្ងៃទី១១ ខែមីនា ឆ្នាំ២០២៥នេះ លោក មាន ចាន់យ៉ាដា អភិបាលខេត្តឧត្តរមានជ័យ បានដឹកនាំប្រតិភូ ចូលរួមកិច្ចប្រជុំគណៈកម្មាធិការបញ្ជាការព្រំដែនថៃ រវាងខេត្តឧត្តរមានជ័យ​ និងខេត្តបុរីរ៉ាំ ដើម្បីជជែកពិភាក្សាលើការដាក់ឱ្យដំណើរការជាបណ្ដោះអាសន្នទីស្នាក់ការផ្តល់សេវាប័ណ្ណព្រំដែនអេឡិចត្រូនិក នៅស្រុកបានគ្រួត ខេត្តបុរីរ៉ាំ ប្រទេសថៃ ។​

ក្នុងកិច្ចប្រជុំនេះ លោក មាន ចាន់យ៉ាដា បានអរគុណចំពោះអាជ្ញាធរខេត្តបុរីរ៉ាំ ជាពិសេសក្រសួងមហាផ្ទៃរបស់ថៃ ដែលបានអនុញ្ញាតឱ្យបង្កើតទីស្នាក់ការផ្តល់សេវាចេញប័ណ្ណព្រំដែនអេឡិចត្រូ ជូនប្រជាពលរដ្ឋក្នុងការចេញចូល នៅច្រកអន្តរជាតិជប់គគីរ-សៃតាគូ ក្នុងស្រុកបន្ទាយអំពិល ខេត្តឧត្ដរមានជ័យ។  

លោកអភិបាលខេត្ត គូសបញ្ជាក់ថា នេះជាកិច្ចសហប្រតិបត្តិការល្អរវាងខេត្តឧត្តរមានជ័យ និងខេត្តបូរីរ៉ាំ សំដៅធ្វើឱ្យបាននូវព្រំដែនសន្តិភាព មិត្តភាព សហប្រតិបត្តិការ និងការអភិវឌ្ឍនៅលើគ្រប់វិស័យ ជាពិសេសវិស័យសេដ្ឋកិច្ច ពាណិជ្ជកម្ម ទេសចរណ៍ សុខាភិបាល វប្បធម៌ រួមទាំងវិស័យផ្សេងផ្សេងទៀត ក៏ដូចជាជួយសម្រួលការធ្វើដំណើររបស់ប្រជាពលរដ្ឋនៃប្រទេសទាំងពីរ ដើម្បីលើកកម្ពស់ជីវភាពរស់នៅរបស់ប្រជាពលរដ្ឋតាមតំបន់ព្រំដែន។

ក្នុងនាមរដ្ឋបាលខេត្ដឧត្តរមានជ័យ លោក មាន ចាន់យ៉ាដា សង្ឃឹមថា ជំនួបដ៏មានសារៈសំខាន់នាពេលនេះ នឹងក្លាយជាប្រវត្តិសាស្ត្រសម្រាប់ច្រកទ្វារព្រំដែនអន្តរជាតិជប់គគីរ-សៃតាគូ ក្នុងការផ្ដើមដំណើរការចេញចូល ដោយប្រើប័ណ្ណព្រំដែនរបស់ប្រជាពលរដ្ឋស្រុកបានគ្រួត ហើយនឹងឈានដល់ការប្រើប្រាស់ទូទាំងខេត្តបុរីរ៉ាំ នាពេលខាងមុខឆាប់ៗនេះ៕