ព័ត៌មានអន្ដរជាតិ

VinFast គ្រោងសង់ស្ថានីយសាកថ្ម EV ដល់ ១០០ ០០០ កន្លែង នៅឥណ្ឌូណេស៊ី

បានផុស

២២ វិនាទី មុន

នៅ

ថ្ងៃពុធ ១២ មីនា ២០២៥

ដោយ

រដ្ឋមន្ត្រីក្រសួងវិនិយោគឥណ្ឌូណេស៊ី លោក Rosan Roeslani បានឱ្យដឹងថា ក្រុមហ៊ុនផលិតរថយន្តអគ្គិសនីវៀតណាមVinFast គ្រោងនឹងសាងសង់ស្ថានីយសាកថ្មរថយន្តអគ្គិសនី (EV) ចន្លោះពី ៣០ ០០០ ទៅ ១០០ ០០០ កន្លែង ទូទាំងប្រទេសឥណ្ឌូណេស៊ី ដោយផ្ដោតដំបូងលើកោះជ្វា។ នេះបើតាមការចុះផ្សាយរបស់កាសែត Jakarta Post។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឱ្យដឹងរបស់លោក Rosan ធ្វើឡើងបន្ទាប់ពីលោកបានអមដំណើរលោកប្រធានាធិបតី ប្រាបូវូ ស៊ូប៊ីយ៉ានតូ ក្នុងជំនួបជាមួយប្រធាន និងនាយកប្រតិបត្តិរបស់ក្រុមហ៊ុន Vingroup ដែលជាក្រុមហ៊ុនមេរបស់ VinFast នៅវិមានប្រធានាធិបតី នាទីក្រុងហ្សាការតា កាលពីថ្ងៃអង្គារ។

លោក Rosan បាននិយាយថា៖ «នេះនៅតែស្ថិតក្នុងដំណាក់កាលធ្វើផែនការ ហើយនឹងត្រូវបានតាមដានដោយក្រសួងវិនិយោគ ប៉ុន្តែ VinFast បានកំណត់ទីតាំងសំខាន់ៗរួចហើយ ដែលភាគច្រើននៅកោះជ្វា»។

រដ្ឋមន្រ្តីដដែល បានបន្ថែមថា រដ្ឋាភិបាលឥណ្ឌូណេស៊ីនៅតែបើកចំហចំពោះការវិនិយោគលើហេដ្ឋារចនាសម្ព័ន្ធប្រកបដោយនិរន្តរភាព រួមទាំងបណ្តាញសាក EV ផងដែរ។ លោកថា៖ «អាទិភាពរបស់យើងគឺធានាការអភិវឌ្ឍហេដ្ឋារចនាសម្ព័ន្ធ EV ។ មិនថាក្រុមហ៊ុនអឺរ៉ុប Tesla ឬក្រុមហ៊ុនចិននោះទេ យើងស្វាគមការវិនិយោគស្ថានីយសាកថ្មឯករាជ្យ ដើម្បីជំរុញការប្រើប្រាស់រថយន្ត EV»។

គួរគូសបញ្ជាក់ថា VinFast ធ្លាប់បានប្ដេជ្ញាវិនិយោគ ២០០ លានដុល្លារ លើការសាងសង់រោងចក្រផលិតរថយន្ត EV នៅខេត្តជ្វាខាងលិច កាលពីខែកក្កដា ឆ្នាំមុន ដែលវាជាផ្នែកមួយនៃផែនការវិនិយោគធំជាង ១,២ ប៊ីលានដុល្លារ នៅឥណ្ឌូណេស៊ី។ រោងចក្រដែលរំពឹងថានឹងចាប់ផ្តើមផលិតនៅចុងឆ្នាំ ២០២៥ មានសមត្ថភាពផលិតរថយន្តអគ្គិសនីចំនួន ៥០ ០០០ គ្រឿង/ឆ្នាំ សម្រាប់ទីផ្សារក្នុងស្រុករបស់ប្រទេសឥណ្ឌូណេស៊ី ដែលបានកំណត់គោលដៅក្លាយជាមជ្ឈមណ្ឌលក្នុងតំបន់សម្រាប់ការផលិត EV៕