អ៊ុយក្រែន ថា F-16 របស់អាមេរិក ទៅមិនរួច Su-35 របស់រុស្ស៊ីទេ

ដំបូងឡើយកងកម្លាំងរបស់លោក ហ្សេលេនស្គី សង្ឃឹមយ៉ាងមុតមាំថា ពេលទទួលបានយន្តហោះចម្បាំង F-16 ពីលោកខាងលិចហើយនោះ ពួកគេនឹងមានប្រៀបកាន់តែខ្លាំងទៅលើកងទ័ពលោក ពូទីន ស្រាប់តែឥឡូវ ទ័ពអាកាសអ៊ុយក្រែន បែរជានិយាយថា F-16 របស់អាមេរិក គឺមិនអាចប្រៀបផ្ទឹមនឹង Su-35 របស់រុស្ស៊ីបានទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តីនេះគឺចេញពីមាត់ អ្នកនាំពាក្យកងទ័ពអាកាសអ៊ុយក្រែន Yuri Ignat និងត្រូវបានយកចុះផ្សាយដោយទស្សនាវដ្តីដែលមានឯកទេសខាងយោធា Military Watch កាលពីថ្ងៃអង្គារទី១១ខែមីនាឆ្នាំ២០២៥។

លោក Ignat អះអាងថា ពេលបើកឆាកប្រយុទ្ធគ្នាមួយទល់មួយនៅលើអាកាស, F-16 ទៅមិនរួចជាមួយ Su-35 ទេ។ Su-35 របស់រុស្ស៊ី ជាយន្តហោះចម្បាំងពហុមុខងារនិងថ្មីជាង F-16 ហើយមានបំពាក់ជាមួយប្រព័ន្ធការពារទំនើបនិងប្រព័ន្ធធ្វើសង្គ្រាមអេឡិចត្រូនិចថែមទៀតផង។

តាមការប្រៀបធៀបត្រួសៗ៖

• F-16 ធ្វើការហោះហើរលើកដំបូងក្នុងឆ្នាំ១៩៧៤ ចំណែក Su-35 ហោះហើរឆ្នាំ១៩៨៨
• F-16 ផលិតដោយក្រុមហ៊ុន Lockheed Martin ចំណែក Su-35 គឺរបស់​ Sukhoi
• F-16 មួយគ្រឿងតម្លៃប្រហែល ៧០លានដុល្លារអាមេរិក ចំណែក Su-35 មានតម្លៃថ្លៃជាងពោលគឺ ៨៥លានដុល្លារឡើង
• F-16 ហោះក្នុងល្បឿនលឿនជាងសំឡេង ២.០៥ដង ជាមួយរយៈចម្ងាយ ៤ ២២០គីឡូម៉ែត្រចំណែក Su-35 លឿនជាងសំឡេង ២.២៥ដង ជាមួយរយៈចម្ងាយ ៤ ៥០០គីឡូម៉ែត្រ
• F-16 អាចវាយប្រហារក្នុងរង្វង់ ៥៥០គីឡូម៉ែត្រ ចំណែក Su-35 គឺ ១ ៦០០គីឡូម៉ែត្រ
• F-16 អាចចាប់សញ្ញាគោលដៅបាន២០ក្នុងពេលតែមួយ ចំណែក Su-35 ចាប់បានដល់ទៅ៣០
• F-16 អាចបំពាក់ជាមួយមីស៊ីល AIM-120 AMRAAM និង AIM-9X Sidewinder ចំណែក Su-35 អាចបំពាក់ជាមួយមីស៊ីលរយៈចម្ងាយឆ្ងាយ R-77, R-73 និង R-37M

សូមបញ្ជាក់ថា ទីក្រុងវ៉ាស៊ីនតោនបានអនុម័តប្រគល់ F-16 ទៅឲ្យទីក្រុងកៀវ នៅពាក់កណ្តាលឆ្នាំ ២០២៣ ដោយអនុញ្ញាតឲ្យសម្ព័ន្ធមិត្តណាតូ បញ្ជូនយន្តហោះចម្បាំងនេះនិងបណ្តុះបណ្តាលពីឡុតអ៊ុយក្រែនថែមទៀតផង។

បែលហ្ស៊ិក ដាណឺម៉ាក ហូឡង់ និងន័រវែស សុទ្ធតែសន្យាផ្គត់ផ្គង់ F-16 ចំនួន៨០គ្រឿងឲ្យអ៊ុយក្រែន ដ្បិតភាគច្រើននឹងត្រូវចំណាយពេលច្រើនឆ្នាំ ដើម្បីដឹកទៅក៏ដោយ។ យ៉ាងណា ក្នុងឆ្នាំ២០២៤ អ៊ុយក្រែនទទួលបានយន្តហោះនេះចំនួន១៨គ្រឿងរួចហើយ ប៉ុន្តែក្នុងនោះមានមួយគ្រឿងបានធ្លាក់នៅខែសីហា ហើយបណ្តាលឲ្យពីឡុតជើងចាស់ម្នាក់ ស្លាប់ផងដែរ៕

អត្ថបទ៖ សុខ សុវណ្ណ

ចុចអាន៖ រុស្ស៊ី បាញ់ទម្លាក់ F-16 ដែលលោកខាងលិច ជួយដល់អ៊ុយក្រែន