កសិដ្ឋានចិញ្ចឹមគោសាច់ RPRU នៅតែបន្ត​ទិញគោពីកសិករឱ្យបាន១ម៉ឺន៥ពាន់ក្បាលក្នុង១ឆ្នាំៗ

កសិដ្ឋានចិញ្ចឹមគោសាច់ RPRU ជាកសិដ្ឋានក្នុងស្រុកមួយ ដែលតែងតែមានតម្រូវការទិញគោពីកសិករក្នុងចំនួន១០,០០០ក្បាល ទៅ១,៥០០០ក្បាល ជារៀងរាល់ឆ្នាំ ដើម្បីយកចូលកសិដ្ឋានបំប៉នសាច់សម្រាប់ផ្គត់ផ្គង់ទៅកាន់ទីផ្សារវិញ។

ជាសហស្ថាបនិក កសិដ្ឋានចិញ្ចឹមគោសាច់ RPRU ដែលមានទីតាំងស្ថិតនៅ ស្រុកបាណន់ ខេត្តបាត់ដំបង លោក ឆាយ ជំនូន បានប្រាប់ កម្ពុជាថ្មី ថា គិតមកទល់ពេលនេះ កសិដ្ឋានរបស់លោក នៅតែមានតម្រូវការទិញគោពីកសិករពីគ្រប់តំបន់ ដើម្បីយកមកបំប៉នសាច់ សម្រាប់ផ្គត់ផ្គង់ទៅកាន់ទីផ្សារវិញ ដោយធ្វើយ៉ាងណាឱ្យបានចន្លោះពី ១០,០០០ ទៅ ១,៥០០០ក្បាល តាមដែលផែនការបានគ្រោងទុក។

លោកបន្តថា ជារៀលរាល់កសិដ្ឋានបានប្រមូលទិញគោពីគ្រប់មជ្ឃដ្ឋានបានចន្លោះពី ៤០ក្បាល ទៅ៥០ក្បាល និងអាចបំប៉នសាច់លក់ចេញទៅកាន់ទីផ្សារវិញបានចន្លោះពី ៤០ក្បាល ទៅ៥០ក្បាល ផងដែរ។

ទាក់ទងនឹងតម្លៃទិញចូលវិញ ម្ចាស់កសិដ្ឋានរូបនេះ ក៏បានប្រាប់ឱ្យដឹងដែរថា ចំពោះគោសំបក ដែលជាប្រភេទពូជគោខ្មែរ លោកទិញពីកសិករក្នុងតម្លៃ ចន្លោះពី ៧០០០រៀល ទៅ៩០០០រៀល ដោយគិតតាមទម្ងន់គោ។

លោក ឆាយ ជំនូន ក៏បានបង្ហើបឱ្យដឹងដែរថា មូលហេតុដែលកសិដ្ឋាននៅតែមានតម្រូវការ ទិញគោជារៀងរាល់ថ្ងៃ ក៏ព្រោះតែចង់ឱ្យកសិករមានទីផ្សារ ខណៈបច្ចុប្បន្នគោខ្មែរ មិនសូវមានទីផ្សារល្អ ដូចកាលពេលកន្លងទៅ។

ចំពោះកសិដ្ឋាន RPRU សម្រាប់ទៅថ្ងៃខាងមុខក៏មានគម្រោងចង់ប្រែក្លាយកសិដ្ឋានចិញ្ចឹមគោសាច់ ឱ្យទៅជា មជ្ឃមណ្ឌលផ្គត់ផ្គង់សាច់គោមួយដែលឈានមុខគេក្នុងខេត្តបាត់ដំបង ដើម្បីអាចនាំយកសាច់គោទៅដាក់លក់ក្នុងផ្សារទំនើបនានា ក្នុងប្រទេសកម្ពុជា។

កសិដ្ឋានចិញ្ចឹមគោសាច់ RPRU ជាកសិដ្ឋានឈានមុខគេក្នុងតំបន់ដែលផ្ដោតលើការចិញ្ចឹមគោសាច់ និងបានពង្រីកខ្លួនក្នុងការបង្កើនការចិញ្ចឹមគោឱ្យដល់ ១០,០០០ ទៅ ១,៥០០០ក្បាល ក្នុងឆ្នាំ២០២៥៕

អត្ថបទ ៖​ សួស សិត