ព័ត៌មានជាតិ

អ្នកនាំពាក្យការងារ ៖ ជនមានពិការភាពប្រមាណ ១ ម៉ឺននាក់ កំពុងបម្រើការងារនៅតាមក្រសួង ស្ថាប័នរដ្ឋ និងឯកជននានា

បានផុស

៨ វិនាទី មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

លោក កត្តា អ៊ន រដ្ឋលេខាធិការ និងជាអ្នកនាំពាក្យ នៃក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍នៅថ្ងៃទី ១៣ មីនា នេះថា គិតមកត្រឹមចុងឆ្នាំ ២០២៤ ក្រសួង ស្ថាប័ន ចំនួន ៣៩ បានទទួលយកជនមានពិការភាពចូលបម្រើការងារចំនួន ៣ ៨១៦ នាក់ ក្នុងនោះ ស្ត្រី ៨៨២ នាក់ ជនមានពិការកម្រិតធ្ងន់ចំនួន ២ ៣៥១ នាក់។ ចំណែកវិស័យឯកជនរួមមាន ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រ គ្រឹះស្ថាន បានទទួលយកជនមានពិការភាពឱ្យចូលបម្រើការងារជាង ៥ ៦០០ នាក់ ក្នុងនោះ ស្ត្រីចំនួនជាង ៣ ៥០០ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋលេខាធិការ បានបន្តថា ការជ្រើសរើសជនមានពិការភាពឱ្យចូលបម្រើការងារក្នុងក្រសួង ស្ថាប័ន គឺជាការឆ្លើយតប និងអនុវត្តទៅតាមកម្មវិធីគោលនយោបាយរបស់រាជរដ្ឋាភិបាលក្នុងការលើកកម្ពស់ជនមានពិការភាពនៅក្នុងវិស័យសាធារណៈ និងឯកជន។ លើសពីនេះ រាជរដ្ឋាភិបាល បានផ្ដល់អាទិភាពដល់ជនគ្រប់រូប រួមទាំងជនមានពិការភាព នូវឱកាសរៀនជំនាញវិជ្ជាជីវៈ និងបច្ចេកទេស ដើម្បីមានចំណេះជំនាញច្បាស់លាស់អាចប្រកបការងារ និងមានទំនួលខុសត្រូវលើមុខតួនាទីការងារបានគឺជាចំណុចសំខាន់បំផុត។

លោករដ្ឋលេខាធិការ បានបន្តទៀតថា ទន្ទឹមនេះដែរ ក្រសួង ក៏មានសាលាបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) ដែលផ្ដល់ឱកាសស្មើភាពគ្នាដល់សាធារណជនទាំងអស់ ដើម្បីមានឱកាសទទួលបានការអប់រំចំណេះជំនាញ បច្ចេកទេស និងសមត្ថភាពពិតប្រាកដ ដើម្បីយកទៅធ្វើការងារ ឬបង្កើតមុខរបរដោយខ្លួនឯង និងបំពេញតម្រូវការ នៃកម្លាំងពលកម្មជំនាញសម្រាប់ការវិនិយោគថ្មីៗ នៅកម្ពុជា។

លោករដ្ឋលេខាធិការ បានបន្ថែមទៀតថា រាជរដ្ឋាភិបាលកម្ពុជា បាននិងកំពុងយកចិត្តទុកដាក់ខ្ពស់លើជនមានពិការភាព តាមរយៈការផ្តល់ឱកាស សិទ្ធិពេញលេញ ភាពស្មើមុខស្មើមាត់គ្នា ក្នុងការទទួលបានការងារធ្វើសមរម្យ និងកិច្ចគាំពារសង្គម។ ទាំងជនមានពិការភាព និងជនមិនមានពិការភាព គឺទទួលបាននូវអត្ថប្រយោជន៍ផ្សេងៗ ពីរាជរដ្ឋាភិបាលស្មើភាពគ្នា ដោយមិនមានការរើសអើងពណ៌សម្បុរ សាសនា ឋានៈ និងនិន្នាការនយោបាយណាមួយឡើយ។

លោករដ្ឋលេខាធិការ គូសបញ្ជាក់ថា គោលនយោបាយរបស់រាជរដ្ឋាភិបាលកម្ពុជា ដែលជានិច្ចកាលប្រមុខថ្នាក់ដឹកនាំ នៃរាជរដ្ឋាភិបាលកម្ពុជានៅគ្រប់អាណត្តិ តែងតែគាំទ្រលើកស្ទួយ និងយកចិត្តទុកដាក់ខ្ពស់ចំពោះជនមានពិការភាព ដើម្បីធ្វើឱ្យជីវភាពរស់នៅរបស់ពួកគាត់ប្រកបដោយភាពសមរម្យ ទទួលបានឱកាសស្មើភាពគ្នា ដូចពលរដ្ឋទូទៅដែរ។ នៅកម្ពុជាគ្មានឡើយការរើសអើងជនដែលមានពិការភាព ជាពិសេសនៅក្នុងវិស័យការងារជនមានពិការភាពត្រូវបានលើកទឹកចិត្ត។

លោករដ្ឋលេខាធិការ បញ្ជាក់បន្ថែមថា បើតាមច្បាប់ស្ដីពីការងារវិស័យឯកជន ត្រូវទទួលជនដែលមានពិការភាពចូលបម្រើការងារ ក្នុងនោះ ត្រូវមានចំនួន ១% នៃចំនួនកម្មករ-និយោជិតសរុប៕

អត្ថបទ ៖ សំអឿន