ព័ត៌មានជាតិ

ខ្សែកាបអាកាសលើផ្លូវធំៗ ចំនួន ៨ កាត់ទម្លាក់ចោលរួចរាល់ ដើម្បីរក្សាសោភណភាពក្នុងរាជធានីភ្នំពេញ

បានផុស

៥៤ វិនាទី មុន

នៅ

ថ្ងៃសុក្រ ១៤ មីនា ២០២៥

ដោយ

ខ្សែកាបអាកាសនៅលើផ្លូវធំៗ ចំនួន ៨ ក្នុងចំណោមគម្រោង ៤០ ផ្លូវ ត្រូវបានជំនាញកាត់ទម្លាក់ចោលរួចរាល់ ក្នុងគោលដៅរក្សាសោភណភាពក្នុងរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឯក ឃុនដឿន អភិបាលរងរាជធានីភ្នំពេញ បានឱ្យដឹងថា ស្របតាមគោលការណ៍ណែនាំដ៏ខ្ពង់ខ្ពស់របស់រាជរដ្ឋាភិបាល ក៏ដូចជាការចង្អុលបង្ហាញណែនាំពី លោក ឃួង ស្រេង អភិបាលរាជធានីភ្នំពេញ បានចាត់ឱ្យក្រុមមន្ត្រី សហការជាមួយមន្ត្រី នៃមន្ទីរអង្គភាពពាក់ព័ន្ធ ក៏ដូចជាអាជ្ញាធរនៅតាមថ្នាក់មូលដ្ឋាន ចុះអនុវត្តការកាត់ទម្លាក់ចោលនូវខ្សែកាបចាស់ៗ ដែលទុកចោលជំពាក់ជុំព័ទ្ធគ្នានៅលើបង្គោលភ្លើង ដែលជាកត្តាបង្កឱ្យបាត់បង់សណ្ដាប់ធ្នាប់លើអាកាស និងបាត់បង់សោភណភាពក្នុងរាជធានីភ្នំពេញ។

លោកអភិបាលរងរាជធានីភ្នំពេញ បានបន្តថា បច្ចុប្បន្ន អាជ្ញាធររាជធានី និងជំនាញពាក់ព័ន្ធ បានបន្តដំណើរការកាត់ខ្សែកាប ដល់ផ្លូវលេខ ១៦៤ និងផ្លូវលេខ ១៦៩ មូលដ្ឋានសង្កាត់អូរឫស្សីទី ២ និងមូលដ្ឋានសង្កាត់វាលវង់ នៃខណ្ឌ ៧ មករា។

ទន្ទឹមនឹងការងារនេះ ប្រជាពលរដ្ឋ បានសម្តែងការគាំទ្រចំពោះការអនុវត្តបែបនេះ ព្រោះការកាប់ចោលបែបនេះ ធ្វើឱ្យបរិយាកាសផ្នែកខាងលើអាកាសមើលទៅស្រលះល្អ ហើយពួកគាត់ទទួលអារម្មណ៍បានថា នៅតំបន់ពួកគាត់រស់នៅ មិនមានភាពរញ៉េរញ៉ៃបន្តទៀតផងដែរ ព្រោះកន្លងទៅតាមបង្គោលភ្លើងខ្សែកាបជាច្រើនហ៊ុមព័ទ្ធដែលអាចឆ្លងចរន្តអគ្គិសនី បង្កហានិភ័យដល់ពលរដ្ឋ។ ទៀតសោត ជាការធ្វើឱ្យសោភណភាពក្នុងរាជធានីភ្នំពេញកាន់តែមានភាពល្អប្រសើរ ដែលអាចទាក់ទាញភ្ញៀវជាតិ និងអន្តរជាតិ មកលេងកម្សាន្តផងដែរ។

សូមបញ្ជាក់ថា មុនឈានដល់ដំណើរការចុះអនុវត្តនេះដែរ រដ្ឋបាលរាជធានីភ្នំពេញ បានចេញជាសេចក្ដីជូនដំណឹងដល់ប្រជាពលរដ្ឋ ម្ចាស់អាជីវកម្មដ្ឋាន អង្គភាពរដ្ឋ ក៏ដូចជាបណ្តាក្រុមហ៊ុនឯកជនពាក់ព័ន្ធទាំងអស់ តាំងពីអំឡុងខែវិច្ឆិកា ឆ្នាំ ២០២៤ មកម្ល៉េះ។ ខ្សែកាបដែលត្រូវកាត់ទម្លាក់ចោល មានប្រមាណ ៧០ ភាគរយ គឺសុទ្ធសឹងជាខ្សែកាបចាស់ដែលមិនមានការប្រើប្រាស់ ខណៈ ៣០ ភាគរយទៀត អាជ្ញាធររាជធានី តម្រូវឱ្យម្ចាស់ក្រុមហ៊ុនជាប្រតិបត្តិករ ប្តូរពីលើអាកាស ដាក់ទៅក្រោមដីជំនួសវិញ៕

អត្ថបទ ៖ សុភា