អ្នកនាំពាក្យអះអាង តម្លៃទីផ្សារគ្រាប់ស្វាយចន្ទីល្អជាងឆ្នាំមុន

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី ១៦ ខែមីនា ឆ្នាំ ២០២៥ នេះថា តម្លៃទីផ្សារគ្រាប់ស្វាយចន្ទីនៅក្នុងខែមីនា ឆ្នាំនេះ ល្អជាងខែមីនា ឆ្នាំមុន។ តាមឃ្លាំងមួយចំនួនទទួលទិញក្នុងតម្លៃ ៥៨០០ រៀល ក្នុងមួយ​គីឡូ​ក្រាម។

លោក ឃឹម ហ្វីណង់ បានថ្លែងថា៖ «កត្តាកំណត់តម្លៃ ដូចជាប្រភេទពូជ គុណភាពគ្រាប់ កម្រិត​សំណើម បរិមាណលក់ចេញ ទីតាំងប្រមូល និងពេលវេលានៃការលក់ចេញ សុទ្ធសឹង​តែអាច​ធ្វើឱ្យថ្លៃគ្រាប់ស្វាយចន្ទីខុសគ្នាបាន តែទោះជាយ៉ាងណា យើងសង្កេតឃើញថា ទីផ្សារ​ចន្ទី​ក្នុង​ខែមីនាឆ្នាំនេះនៅល្អជាងខែមីនាឆ្នាំមុនច្រើន»។

កាលពីសប្ដាហ៍មុន តម្លៃគ្រាប់ស្វាយចន្ទីបានធ្លាក់ចុះពី ៦០០០ រៀល ក្នុង​​មួយគីឡូក្រាម មកត្រឹម ៤ ៨០០ ខណៈកំពង់ធំ មានស្ថិរភាពជាងគេនៅត្រឹម ៥ ២០០ រៀល ក្នុង​មួយ​គីឡូក្រាម។

លោក អួន ស៊ីឡុត បានឱ្យដឹងថា បច្ចុប្បន្នសហគ្រាសក្នុងស្រុក​មិនមានថវិកា​ទិញគ្រាប់​ស្វាយ​ចន្ទី​នោះ​ទេ ពោលគឺមានតែក្រុមហ៊ុនមួយចំនួនប៉ុណ្ណោះ ដែលទទួលបានកម្ចីពីធនាគារ ដូច្នេះតម្លៃ​គ្រាប់​​ស្វាយចន្ទីរបស់​កម្ពុជា ត្រូវពឹងផ្អែកទាំងស្រុងលើទីផ្សារវៀតណាម ដែលធ្វើឱ្យវៀតណាម​ទម្លាក់​តម្លៃដែរ។

យោងតាមសមាគមស្វាយចន្ទីកម្ពុជា នៅឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផល​គ្រាប់ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើនឡើង ២១ ភាគរយ គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់​តោន៕

អត្ថបទ៖ ឡេង ដេត