ព័ត៌មានអន្ដរជាតិ

សមាជិកសភាបារាំង ទាមទារឲ្យអាមេរិកប្រគល់រូបសំណាកសេរីភាពមកវិញ

បានផុស

៣៥ វិនាទី មុន

នៅ

ថ្ងៃចន្ទ ១៧ មីនា ២០២៥

ដោយ

Chheang

សមាជិកសភាបារាំងលោក Raphaël Glucksmann បានអំពាវនាវឲ្យសហរដ្ឋអាមេរិក ប្រគល់រូបសំណាកសេរីភាពវិញ ដោយអះអាងថា សកម្មភាពថ្មីៗរបស់ក្រុងវ៉ាស៊ីនតោនក្រោមការដឹកនាំរបស់ប្រធានាធិបតី ដូណាល់ ត្រាំ ផ្ទុយនឹងតំណាងនិមិត្តរូបនៃសេរីភាព និងលទ្ធិប្រជាធិបតេយ្យរបស់រូបសំណាកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងសន្និបាតសម្រាប់គណបក្សនយោបាយរបស់គាត់ Place Publique កាលពីថ្ងៃអាទិត្យទី១៦ខែមីនា លោក Glucksmann ដែលជាអ្នកចេញមុខការពារអ៊ុយក្រែនយ៉ាងពេញទំហឹង បានរិះគន់ជំហររបស់រដ្ឋបាលអាមេរិកលើបញ្ហាអន្តរជាតិ ជាពិសេសការកាត់បន្ថយការគាំទ្ររបស់ខ្លួនចំពោះរដ្ឋាភិបាលក្រុងកៀវ ចំពេលមានជម្លោះកំពុងបន្តជាមួយរុស្ស៊ី។ លោកបានអះអាងថា ជំហរបែបនេះបានតម្រឹមសហរដ្ឋអាមេរិកជាមួយនឹងរបបផ្តាច់ការ ដោយធ្វើឲ្យខូចដល់គោលការណ៍ដែលរូបសំណាកសេរីភាពបង្កប់ន័យ។

បន្ថែមពីនេះ លោក Glucksmann បានសម្ដែងការមិនពេញចិត្តជាខ្លាំងចំពោះការកាត់បន្ថយបុគ្គលិករដ្ឋ និងគម្រោងស្រាវជ្រាវនៅក្នុងរដ្ឋបាលអាណត្តិថ្មីរបស់អាមេរិក។ លោក ត្រាំ បានដកអាមេរិកចេញពីកិច្ចព្រមព្រៀងអាកាសធាតុទីក្រុងប៉ារីស ត្រឹមតែប៉ុន្មានម៉ោងប៉ុណ្ណោះ បន្ទាប់ពីចូលកាន់តំណែងម្តងទៀតក្នុងខែមករាឆ្នាំ២០២៥ តាមរយៈបទបញ្ជាប្រតិបត្តិ។

លោក Glucksmann បាននិយាយថា៖ «ឲ្យរូបសំណាកសេរីភាពមកយើងវិញ។ យើងនឹងនិយាយទៅកាន់ជនជាតិអាមេរិកដែលបានជ្រើសរើសនៅខាងពួកជនផ្តាច់ការ និងទៅកាន់ជនជាតិអាមេរិកដែលបានបណ្តេញអ្នកស្រាវជ្រាវចំពោះការទាមទារសេរីភាពខាងវិទ្យាសាស្ត្រថា “ប្រគល់រូបសំណាកសេរីភាពឲ្យមកយើងវិញ”»។

លោកបន្ថែមថា៖ «យើងបានឲ្យវាទៅអ្នកជាអំណោយ ប៉ុន្តែជាក់ស្តែងអ្នកបានមើលងាយវា»។

សូមបញ្ជាក់ថា រូបសំណាកសេរីភាព ដែលរចនាដោយជាងចម្លាក់ជនជាតិបារាំង Frédéric Auguste Bartholdi ត្រូវបានផ្តល់ជាអំណោយដល់សហរដ្ឋអាមេរិកក្នុងឆ្នាំ១៨៨៦ ដើម្បីរំលឹកដល់សម្ព័ន្ធភាពរវាងប្រទេសទាំងពីរ ហើយក៏ជានិមិត្តរូបនៃសេរីភាព និងលទ្ធិប្រជាធិបតេយ្យផងដែរ៕