គ្រោះមហន្តរាយផ្ទួនៗក្នុងរដ្ឋជាច្រើននៅអាមេរិកសម្លាប់មនុស្ស៣៩នាក់

យោងតាមការចេញរបស់ទីភ្នាក់ងារព័ត៌មាន AP នៅថ្ងៃទី១៧ខែមីនានេះ បានឲ្យដឹងថា អាកាសធាតុដ៏អាក្រក់បង្កជាខ្យល់ព្យុះកំបុតត្បូង ខ្យល់កួច និងភ្លើងឆេះព្រៃ នៅរដ្ឋជាច្រើននៅសហរដ្ឋអាមេរិក បណ្តាលឱ្យមនុស្សយ៉ាងហោចណាស់ ៣៩នាក់ស្លាប់។

តួលេខចុងក្រោយនៃការបំផ្លិចបំផ្លាញពីគ្រោះមហន្តរាយភ្លើងឆេះព្រៃនៅក្នុងរដ្ឋ Texas និងរដ្ឋ Oklahoma មានផ្ទះជាង៤០០ខ្នង​ត្រូវបានខូចខាត ​៧៤ខ្នងត្រូវបានបំផ្លាញទាំងស្រុង និងមនុស្ស៤នាក់បានស្លាប់ ខណៈមានអគ្គីភ័យជាង ១៣០​កន្លែង​​​ត្រូវបានរាយការណ៍នៅទូទាំងរដ្ឋទាំងពីរនេះកាលពីថ្ងៃសុក្រសប្ដាហ៍មុន។

ចំណែក ព្យុះកំបុតត្បូងនៅក្នុងរដ្ឋ Carolinas និងភាគខាងជើងរដ្ឋ Florida បានបង្កការខូចខាតយ៉ាងធ្ងន់ធ្ងរទៅលើហេដ្ឋារចនាសម្ព័ន្ធនានា។

នៅក្នុងរដ្ឋ Alabama យ៉ាងហោចណាស់មនុស្ស៣នាក់ រួមទាំងស្ត្រីអាយុ៨២ឆ្នាំម្នាក់បានស្លាប់ នៅពេលដែលខ្យល់ព្យុះកំបុតត្បូង​កើត​ឡើង​ច្រើន​ដង​ បានបោកបក់ពាសពេញរដ្ឋនេះ។ លើសពីអ្នក​ស្លាប់​ដោយសារ​ខ្យល់ព្យុះកំបុតត្បូងដូចគ្នានេះក្នុង​រដ្ឋ​ Missouri បានកើន​ដល់​១២​នាក់។

ព្យុះកំបុតត្បូងក៏វាយប្រហាររដ្ឋ Mississippi សម្លាប់មនុស្ស៦នាក់ និងជាង២០០នាក់ត្រូវបានផ្លាស់ទីលំនៅ ហើយ​នៅ​ភាគ​ខាងជើង​នៃ​រដ្ឋនេះ ផ្លូវ​ថ្នល់ត្រូវ​ជន់​លិច ដែលធ្វើឲ្យមនុស្ស​​​ជាច្រើន​​ត្រូវ​ជាប់គាំង​ដោយ​ទឹក​ជំនន់។ នៅរដ្ឋ Arkansas ​ឯណោះ​វិញ ក្រុមមន្ត្រីក៏បានបញ្ជាក់ពីការស្លាប់របស់មនុស្សចំនួន៣នាក់ផងដែរ។

ទន្ទឹមនឹងនេះ ខ្យល់កួចខ្លាំងបានឆក់យកជីវិតមនុស្សរាប់សិបនាក់កាលពីថ្ងៃសុក្រសប្ដាហ៍មុនផងដែរ។ ក្នុងនោះមនុស្ស ៨ នាក់បានស្លាប់ក្នុងគ្រោះថ្នាក់ដែលមានរថយន្តយ៉ាងហោចណាស់ ៥០ គ្រឿង ដោយសារព្យុះកួចលើផ្លូវហាយវេមួយក្នុងរដ្ឋ Kansas។ ចំណែកមនុស្ស៣នាក់ទៀតបានស្លាប់នៅក្នុងគ្រោះថ្នាក់ចរាចរណ៍ក្នុងអំឡុងពេលខ្យល់កួចនៅ Amarillo ក្នុងរដ្ឋ Texas។

ពាក់ព័ន្ធបញ្ហានេះលោកប្រធានាធិបតីសហរដ្ឋអាមេរិក លោក Donald Trump បានបង្ហោះនៅលើបណ្តាញសង្គមរបស់លោក Social Truth ថា រដ្ឋបាលរបស់លោកត្រៀមខ្លួនជាស្រេចដើម្បីជួយសហគមន៍ដែលរងផលប៉ះពាល់៕

អត្ថបទ៖ ប៊ុន សុភាព