កីឡា

លោកគ្រូ Koji ប្រាប់ថា ក្រុមរៀបចំពុំសូវបានល្អ មុនទៅវៀតណាម

បានផុស

២ នាទីutes មុន

នៅ

ថ្ងៃចន្ទ ១៧ មីនា ២០២៥

ដោយ

គ្រូបង្គោលរបស់ក្រុមជម្រើសជាតិកម្ពុជា លោក Koji Gyotoku បានលើកឡើងពីកត្តាធំមួយ ដែលក្រុមរហស្សនាមគោព្រៃលើកនេះ ត្រៀមខ្លួនពុំសូវបានល្អ មុនការប្រកួតមិត្តភាពអន្តរជាតិទល់នឹងក្រុមជម្រើសជាតិ វៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសល់ពេលត្រឹមតែ ២ ថ្ងៃទៀតប៉ុណ្ណោះ ពោលគឺនៅថ្ងៃទី ១៩ ខែ មីនា ក្រុមជម្រើសជាតិកម្ពុជា នឹងត្រូវធ្វើការប្រកួតមិត្តភាពអន្តរជាតិទល់នឹងក្រុមជម្រើសជាតិ វៀតណាម នៅកីឡដ្ឋាន Go Dau។ យ៉ាងណា មុនការប្រកួតនេះមកដល់ ក្រុមកម្ពុជា បានប្រមូលផ្តុំកីឡាករហ្វឹកហាត់បានចំនួន ៥ ថ្ងៃ ខណៈថ្ងៃចន្ទ ទី ១៧ នេះ គឺជាថ្ងៃដែលក្រុមកីឡាករត្រូវហោះទៅកាន់ប្រទេស វៀតណាម។

លោក Koji ដែលទើបត្រូវបានសហព័ន្ធបាល់ទាត់កម្ពុជា តែងតាំងជាគ្រូបង្គោលផ្លូវការ បានលើកឡើងអំពីការហ្វឹកហាត់របស់ក្រុមនៅក្នុងកិច្ចសម្ភាសកាលពីព្រឹកមិញនេះថា ៖«សម្រាប់ក្រុម ការរៀបចំអត់បានល្អប្រសើរទេ ដោយសារមានការប្រកួតជាបន្តបន្ទាប់របស់ក្លិប ហើយលក្ខខណ្ឌរបស់កីឡាករក៏មិនបានល្អប្រសើរដែរ។ មួយទៀតការប្រមូលផ្តុំលើកនេះ អត់បានជុំគ្នាពេញលេញទេ។ ចឹងហើយ ការរៀបចំគឺមិនបានល្អនោះទេសម្រាប់ត្រៀមការប្រកួតលើកនេះ»។

ការហ្វឹកហាត់របស់ក្រុមកម្ពុជាក្នុងរយៈពេល ៥ ថ្ងៃមកនេះ ពិតជាមិនបានជុំគ្នាមែន ដោយសារកីឡាករមួយចំនួនមានធុរៈជាមួយក្លិប ក្នុងការប្រកួតលីគ និងពាន Hun Sen Cup។ ចំណែកកីឡាកររបស់ ព្រះខ័នរាជស្វាយរៀង វិញកាន់តែមមារញឹកថែមទៀត ដោយសារពួកគេទើបតែបញ្ចប់ការប្រកួតវគ្គ ៨ ក្រុមពាន AFC Challenge League ទល់នឹងក្រុម Shan United កាលពីថ្ងៃទី ១៣ ខែ មីនា៕