រង់ចាំ​ប្តី​អស់​ជាង​៨០​ឆ្នាំ ទីបំផុតស្ត្រី​ចិនវ័យ​១០៣​ឆ្នាំ​ម្នាក់ ទទួលមរណភាពទាំងមិនអស់អាល័យ

លោកយាយ Du Huzhen អ្នកស្រុកនៃខេត្ត Guizhou ភាគនិរតីនៃប្រទេសចិន បានទទួលមរណភាពក្នុងជន្មាយុ ១០៣ឆ្នាំ កាលពីថ្ងៃទី ៨ ខែមីនា។ សារព័ត៌មាន SCMP បានរាយការណ៍កាលពីថ្ងៃទី ១៧ ខែមីនាថា អស់រយៈពេលជាង៨០ ឆ្នាំមកហើយ ដែលគាត់បានរស់នៅរង់ចាំប្តីទៅធ្វើការនៅឆ្ងាយ ប៉ុន្តែមិនបានត្រឡប់មកវិញដូចការសន្យា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម​គ្រួសារ​បាន​និយាយ​ថា គាត់​បាន​លាចាក​លោក​ទៅ​ដោយ​សុខសាន្ត ដោយ​មិន​មាន​ការ​ព្រួយ​បារម្ភ​ពីគ្រួសាឡើយ ហើយនេះក៏ជាថ្ងៃដែល​ទន្ទឹង​រង់ចាំ​ជា​យូរ​មក​ហើយ។ យ៉ាងណា នៅមុនពេលលាចាកលោក គាត់បានកាន់ស្រោមខ្នើយចាស់មួយ ដែលធ្លាប់ប្រើតាំងពីរៀបការនៅឆ្នាំ ១៩៤០។ គ្រួសាររបស់លោកយាយបាននិយាយថា នេះជានិមិត្តរូបនៃក្តីសង្ឃឹមដែលមិនរលត់នៅក្នុងខ្លួនគាត់ ទោះបីជាប៉ុន្មានឆ្នាំកន្លងផុតទៅក៏ដោយ។

តាមដឹងពីគ្រួសារថា លោកយាយមាន​អាយុ​ច្រើន​ជាង​ប្តី​គាត់ ​៣​ឆ្នាំ ។ បន្ទាប់ពីរៀបការរួច លោកតា Huang Junfu បានធ្វើការនៅឆ្ងាយពីផ្ទះ។ នៅឆ្នាំ ១៩៤៣ ស្ត្រីចំណាស់បានស្នាក់នៅជាមួយប្តីរបស់គាត់ រហូតដល់មានផ្ទៃពោះ ហើយបន្ទាប់មកបានត្រឡប់ទៅផ្ទះតែម្នាក់ឯង។ ក្រោយមកគាត់​សម្រាល​បាន​កូន​ប្រុស​មួយ​ឈ្មោះ Huang Fachang នៅ​ខែ​មករា ឆ្នាំ ១៩៤៤។ នៅឆ្នាំដដែលនោះ ម្តាយក្មេករបស់លោកយាយ បានទទួលមរណភាព ប្តី​គាត់​ត្រឡប់​មក​ផ្ទះ​វិញ​មួយ​ភ្លែត​ដើម្បី​កាន់​ទុក្ខ​ក៏​ត្រឡប់​ទៅ​ធ្វើ​ការ​វិញ។

ជា​យូរ​មក​ហើយ ​បុរស​ចំណាស់​នៅ​តែ​ផ្ញើ​សំបុត្រ​ទៅ​ផ្ទះ​ប្រពន្ធ​ជា​ប្រចាំ។ សំបុត្រចុងក្រោយដែលលោកយាយបានទទួលពីប្តីត្រូវបានសរសេរនៅថ្ងៃទី ១៥ ខែមករាឆ្នាំ ១៩៥២។ នៅក្នុងសំបុត្រនោះ ស្វាមីបានសរសេរថា «មិនថាគ្រួសារក្រីក្រយ៉ាងណាទេ សូមយកចិត្តទុកដាក់លើការអប់រំរបស់កូនប្រុស Fachang ។ ថ្ងៃណាមួយយើងនឹងជួបគ្នាម្តងទៀត» ។

បុរស​ចំណាស់​រូប​នេះ​ក៏​បាន​លាតត្រដាង​ថា គាត់​កំពុង​ធ្វើ​ការឲ្យក្រុមហ៊ុន​សំណង់​ចិន​ក្នុង​ប្រទេស​ម៉ាឡេស៊ី​នៅ​ពេល​នោះ។ ដោយ​គ្មាន​ប្តី​នៅ​ក្បែរ​នោះ ស្ត្រី​ចំណាស់​ត្រូវ​មើល​ថែ​គ្រួសារ​ទាំង​មូល ដោយ​ធ្វើ​ស្រែ​ចម្ការ​ពេល​ថ្ងៃ និង​ត្បាញ​ស្បែកជើង​ស្មៅ និង​ក្រណាត់​ពេល​យប់។

ជីវិត​លំបាក​វេទនា​មិន​បាន​ធ្វើ​ឲ្យស្ត្រី​ចំណាស់​បោះបង់​ក្តី​សង្ឃឹម​ថ្ងៃ​ណា​មួយ​បាន​ជួប​ប្តី​វិញ ។ ក្នុងរយៈពេលជាច្រើនឆ្នាំ ស្ត្រីចំណាស់បានបដិសេធរាល់សំណើរផ្គូរផ្គង និងអាពាហ៍ពិពាហ៍ផ្សេងទៀត ដោយគ្រាន់តែរង់ចាំប្តីរបស់គាត់ប៉ុណ្ណោះ។ ក្រោយមក នៅចុងទសវត្សរ៍ឆ្នាំ ១៩៧០ កូនប្រុសរបស់គាត់ បានក្លាយជាគ្រូបង្រៀននៅវិទ្យាល័យ។ មិនយូរប៉ុន្មាន គាត់បានទទួលមរណភាពនៅឆ្នាំ ២០២២។

យោងតាមឯកសារមួយចំនួនពីខោនធី Zunyi ខេត្ត Guizhou លោកតា Huang Junfu បានតាំងទីលំនៅនៅប្រទេសម៉ាឡេស៊ីក្នុងឆ្នាំ ១៩៥០ មុនពេលផ្លាស់ទៅប្រទេសសិង្ហបុរីប៉ុន្មានឆ្នាំក្រោយមក។ អាជ្ញាធរមិនមានព័ត៌មានបន្ថែមអំពីបុរសចំណាស់នេះទេ។ គ្រួសារនេះបានព្យាយាមវិធីជាច្រើនដើម្បីស្វែងរកលោកតា Huang ដោយបានបង្ហោះការផ្សាយពាណិជ្ជកម្មនៅក្នុងកាសែត និងជួលក្រុមហ៊ុនបរទេស ប៉ុន្តែការខិតខំប្រឹងប្រែងទាំងអស់មិនទទួលបានជោគជ័យឡើយ។

ទោះបីជាយ៉ាងណាក៏ដោយ Huang Liying ដែលជាចៅស្រីរបស់ស្ត្រីចំណាស់បាននិយាយថា ស្ត្រីចំណាស់បានទទួលមរណភាពដោយសុខសាន្ត ហាក់បីដូចជាគាត់បានឃើញនិមិត្តនៃការជួបជុំជាមួយស្វាមីរបស់គាត់ឡើងវិញ។ ប៉ុន្តែក្រុមគ្រួសារនៅតែបន្តស្វែងរកលោកតា​ ដើម្បីឲ្យសមនឹងបំណងប្រថ្នាលោកយាយទោះជាគាត់លែងមានវត្តមានលើលោកនេះក៏ដោយ៕

អត្ថបទ៖ សាង ស្រីល័ក្ខ

ចុចអាន៖ម្ហូបមួយមុខអធិរាជ ឈានឡុង តែងសោយរាល់ព្រឹក ដើម្បីពន្យារព្រះជន្មឲ្យនៅជាអមតៈ