យន្តហោះ​ធ្លាក់​ចូល​ទឹកសមុទ្រ​​នៅ​​ហុងឌូរ៉ាស​ សម្លាប់មនុស្ស៧​នាក់

យន្តហោះមួយគ្រឿងរបស់ប្រទេសហុងឌូរ៉ាស​តំបន់់​អាមេរិក​​កណ្តាល​ បានធ្លាក់ចូលទឹកសមុទ្រកាលពីយប់ថ្ងៃចន្ទ ​ដោយបាន​បណ្តាល​ឲ្យ​មនុស្ស​៧នាក់ស្លាប់​ ខណៈ១០នាក់ផ្សេងទៀតនៅមានជីវិត។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៨ខែមីនានេះ។

យោងតាមរដ្ឋមន្ត្រីដឹកជញ្ជូនរបស់ប្រទេសហុងឌូរ៉ាស យន្តហោះ Jetstream ដំណើរការដោយក្រុមហ៊ុនអាកាសចរណ៍ Honduran Airline Lanhsa បានដឹកអ្នកដំណើរ ១៤នាក់ និងសមាជិកនាវិក៣នាក់។ អ្នកដំណើររួមមានជនជាតិអាមេរិកម្នាក់ ជនជាតិបារាំងម្នាក់ និងអនីតិជន២នាក់។ យន្តហោះនេះគ្រោងនឹងហោះហើរទៅកាន់អាកាសយានដ្ឋាន La Ceiba តែវាបានធ្លាក់ភ្លាមៗបន្ទាប់ពីហោះបានចម្ងាយប្រហែល ១គីឡូម៉ែត្រពីឆ្នេរសមុទ្ររបស់កោះ Roatan។

មន្ត្រីពន្លត់អគ្គីភ័យ បានឱ្យដឹងថា តន្ត្រីករ Garifuna ដ៏ល្បីល្បាញលោក Aurelio Martinez Suazo ស្ថិតក្នុងចំណោមអ្នកស្លាប់​ទាំងនោះដែរ​។ ជាមួយគ្នានេះ ខណៈលក្ខខណ្ឌមិនល្អនៅទីកន្លែងកើតហេតុ បានធ្វើឲ្យការជួយ​សង្គ្រោះ​មានការលំបាក។ ចំណែកមូលហេតុ​នៃ​ការ​ធ្លាក់​យន្តហោះ​នេះ​មិន​ទាន់​ដឹងមូលហេតុ​​នៅឡើយ​ទេ​ ខណៈក្រុមហ៊ុនអាកាសចរណ៍មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។

គួរបញ្ជាក់ថា Roatan ដែលជាកោះដ៏ធំបំផុតនៃប្រជុំកោះ Bay ប្រទេសហុងឌូរ៉ាស​ គឺជាកន្លែងទាក់ទាញទេសចរណ៍ដ៏ពេញនិយម និងល្បីល្បាញដោយសារថ្មប៉ប្រះទឹក និងផ្កាថ្មដ៏ស្រស់ស្អាតរបស់កោះនេះ៕

អត្ថបទ៖ ប៊ុន សុភាព