ព័ត៌មានអន្ដរជាតិ

ថៃ គ្រោងកាត់បន្ថយរយៈពេលស្នាក់នៅគ្មានទិដ្ឋាការមកត្រឹម ៣០ ថ្ងៃ

បានផុស

៤៦ វិនាទី មុន

នៅ

ថ្ងៃអង្គារ ១៨ មីនា ២០២៥

ដោយ

ក្រសួងទេសចរណ៍ និងកីឡាថៃ បានឱ្យដឹងថា ក្រសួងការបរទេសគ្រោងនឹងកាត់បន្ថយរយៈពេលនៃការស្នាក់នៅដោយមិនប្រើទិដ្ឋាការរបស់ជនបរទេស ពី ៦០ ថ្ងៃ មកនៅត្រឹម ៣០ ថ្ងៃ ដើម្បីជាផ្នែកមួយនៃកិច្ចប្រឹងប្រែងទប់ស្កាត់ហានិភ័យនៃអាជីវកម្មខុសច្បាប់របស់ឧក្រិដ្ឋជន។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងទេសចរណ៍ និងកីឡា លោក Sorawong Thienthong ក្រសួងការបរទេសបានទទួលស្គាល់បញ្ហា តាមអ្វីដែលក្រសួងបានពិភាក្សាយ៉ាងគ្រប់ជ្រុងជ្រោយក្នុងចំណោមភាគីពាក់ព័ន្ធទាំងអស់ ក្នុងរយៈពេលប៉ុន្មានសប្តាហ៍កន្លងមក។

លោកបន្តថា គ្រប់ភាគីទាំងអស់បានយល់ព្រមលើការកាត់បន្ថយរយៈពេលនៃការស្នាក់នៅពី ៦០ ថ្ងៃមក ៣០ ថ្ងៃ សម្រាប់ពលរដ្ឋមកពីប្រទេសដែលទទួលបានការលើកលែងទិដ្ឋាការរបស់រដ្ឋាភិបាលថៃ។ ទោះជាយ៉ាងណាក៏ដោយ ព័ត៌មានលម្អិតបន្ថែមនឹងត្រូវមានការពិភាក្សាជាមុនសិន មុននឹងប្រកាសជាផ្លូវការនូវការកែសម្រួលបទប្បញ្ញត្តិនេះ។

គួរគូសបញ្ជាក់ថា ចាប់តាំងពីខែកក្កដាឆ្នាំ ២០២៤ មក រដ្ឋាភិបាលថៃបានអនុញ្ញាតឱ្យជនបរទេសកាន់លិខិតឆ្លងដែនមកពី ៩៣ ប្រទេស ឱ្យចូលប្រទេសថៃក្នុងគោលបំណងទេសចរណ៍ មិនឱ្យលើសពី ៦០ ថ្ងៃ។

យ៉ាងណាមិញ ប្រតិបត្តិករទេសចរណ៍ថៃ បានសម្តែងការព្រួយបារម្ភលើរយៈពេលនេះ ដោយសារអ្នកទេសចរស្នាក់នៅយូរ ជាធម្មតាប្រើពេលនៅថៃជាមធ្យមត្រឹមតែ ១៤-២១ ថ្ងៃប៉ុណ្ណោះ ខណៈទេសចររយៈពេលខ្លី ស្នាក់នៅតិចជាង ២ សប្ដាហ៍ ឬប្រហែល ៧ ថ្ងៃជាមធ្យម។ ពួកគេបារម្ភថា ឧក្រិដ្ឋជនអាចប្រើប្រាស់គោលនយោបាយលើកលែងទិដ្ឋាការ ដើម្បីប្រព្រឹត្តឧក្រិដ្ឋកម្មរបស់ខ្លួន។

ការទាមទារឱ្យក្រសួងការបរទេសថៃកាត់បន្ថយរយៈពេលស្នាក់នៅរបស់ជនបរទេស ផ្ទុះឡើងក្រោយពេលមានករណីជួញដូរមនុស្សលើតួសម្ដែងចិនទៅមីយ៉ាន់ម៉ា ដោយឆ្លងកាត់ប្រទេសថៃ។ ការណ៍នេះ បង្កផលប៉ះពាល់ដល់ទេសចរណ៍របស់ប្រទេស ដោយធ្វើឱ្យជនជាតិចិនជាច្រើនលុបចោលដំណើរកំសាន្តនៅថៃទ្រង់ទ្រាយធំ ដោយព្រួយបារម្ភពីសុវត្ថិភាព។ ជាការឆ្លើយតប អាជ្ញាធរថៃបានបើកការបង្រ្កាបទ្រង់ទ្រាយធំលើបណ្ដាញជួញដូរមនុស្ស រួមទាំងតាមមជ្ឈមណ្ឌលបោកប្រាស់អនឡាញតាមព្រំដែននៃប្រទេសជិតខាង ដូចជាមីយ៉ាន់ម៉ាជាដើម៕