ព័ត៌មានអន្ដរជាតិ

ថៃ គ្រោងកាត់បន្ថយការស្នាក់នៅដោយគ្មានទិដ្ឋាការមកសល់ត្រឹម ៣០ថ្ងៃវិញ

បានផុស

២៧ វិនាទី មុន

នៅ

ថ្ងៃអង្គារ ១៨ មីនា ២០២៥

ដោយ

Chheang

ប្រទេសថៃ កំពុងពិចារណាកាត់បន្ថយរយៈពេលនៃការស្នាក់នៅដោយគ្មានទិដ្ឋាការ សម្រាប់ភ្ញៀវទេសចរពី ៦០ថ្ងៃមកត្រឹម ៣០ថ្ងៃវិញ ក្នុងគោលបំណងទប់ស្កាត់សកម្មភាពអាជីវកម្មខុសច្បាប់ និងពង្រឹងសន្តិសុខជាតិ។ នេះបើយោងតាមការចុះផ្សាយរបស់សារព័ត៌មាន Bloomberg នៅថ្ងៃទី១៨ខែមីនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងដែលលើកឡើងដោយរដ្ឋមន្ត្រីក្រសួងទេសចរណ៍ និងកីឡាថៃ លោក Sorawong Thienthong ធ្វើឡើងដើម្បីឆ្លើយតបនឹងក្តីបារម្ភអំពីឧក្រិដ្ឋកម្មឆ្លងដែនដែលទាក់ទងនឹងរយៈពេលដ៏យូរពេកនៃការលើកលែងទិដ្ឋាការ។

កាលពីខែកក្កដាឆ្នាំ២០២៤ ថៃបានបង្កើនការលើកលែងទិដ្ឋាការពី ៣០ថ្ងៃ ទៅ ៦០ថ្ងៃសម្រាប់ទេសចរមកពីប្រទេសចំនួន៩៣ ក្នុងនោះមានទាំងចិនផងដែរ ដើម្បីបង្កើនវិស័យទេសចរណ៍។ ទោះជាយ៉ាងណាក៏ដោយ ឧប្បត្តិហេតុកាលពីថ្មីៗនេះ ដូចជា ការចាប់ជំរិតតារាសម្តែងចិន Wang Xing បានធ្វើឲ្យមានការព្រួយបារម្ភអំពីសុវត្ថិភាព។ ក្រុមឧស្សាហកម្មទេសចរណ៍ថៃមួយចំនួន ស្នើឲ្យកាត់បន្ថយការស្នាក់នៅដោយគ្មានទិដ្ឋាការសម្រាប់ភ្ញៀវទេសចរចិនពី ៦០ថ្ងៃមកនៅត្រឹម ១៥ថ្ងៃ ដោយបង្ហាញថា ជាធម្មតាភ្ញៀវទេសចរចិនចំណាយពេលប្រហែល ៧ទៅ៨ថ្ងៃប៉ុណ្ណោះ នោះការកាត់បន្ថយនេះនឹងមិនប៉ះពាល់ដល់វិស័យទេសចរណ៍ឡើយ។

វិស័យទេសចរណ៍នៅតែជាកត្តាជំរុញដ៏សំខាន់នៃសេដ្ឋកិច្ចដែលកំពុងខ្វះខាតរបស់ថៃ។ រដ្ឋាភិបាលកំពុងកំណត់គោលដៅបង្កើនចំនួនភ្ញៀវទេសចរបរទេសឲ្យដល់ ៤០លាននាក់ ក្នុងឆ្នាំ២០២៥ ដែលនឹងបំបែកកំណត់ត្រាឆ្នាំ២០១៩។ គិតត្រឹមចន្លោះពីខែមករាដល់ថ្ងៃទី៩ខែមីនា ថៃបានស្វាគមន៍ភ្ញៀវទេសចរបរទេសចំនួន ៧,៦៦លាននាក់ កើនឡើង ៤,៤ភាគរយបើធៀបនឹងរយៈពេលដូចគ្នាកាលពីឆ្នាំមុន៕

ដោយ៖ ឈាង

Related Topics:ប្រទេសថៃ