មេដឹកនាំគណបក្សកាន់អំណាច និងសម្ព័ន្ធគណបក្ស២៧នឹងជួបពិសាអាហារសាមគ្គីនៅសប្ដាហ៍ក្រោយ

អ្នកនាំពាក្យគណបក្សប្រជាជនកម្ពុជាលោក ជា ធីរិទ្ធ បានឱ្យដឹងថាប្រធានគណបក្សប្រជាជនកម្ពុជា សម្ដេចតេជោ ហ៊ុន សែន និងជួបពិសាអាហារសាមគ្គីថ្ងៃត្រង់ជាមួយសម្ព័ន្ធគណបក្សនយោបាយទាំង២៧ នៅថ្ងៃទី២៧ ខែមីនា ឆ្នាំ២០២៥ខាងមុខនេះ។

បើតាមលោក ជា ធីរិទ្ធ ជំនួបនេះគឺដើម្បីបង្កើននូវភាពស្និតស្នាលរវាងគណបក្សសម្ព័ន្ធទាំង២៨ដែលបានចុះកិច្ចព្រមព្រៀងចងសម្ព័ន្ធជាមួយគ្នាកាលពីខែតុលា ឆ្នាំ២០២៣កន្លងទៅ។ ហើយក្រោយពេលដែលជួបពិសាអាហាសាមគ្គីថ្ងៃត្រង់នោះនឹងមានសន្ធីសិទសារព័ត៌មានមួយផងដែរ។

លោកបញ្ជាក់ថា៖ «កន្លងមកគឺតែងតែមានគម្រោងជួបគ្នាមួយឆ្នាំម្ដងដើម្បីបង្កើតភាពស្និតស្នាលជាមួយគ្នា ហើយនៅក្នុងពិធីនោះក៏អាចមានការលើកឡើងពីវឌ្ឍនភាពនូវកិច្ចព្រមព្រៀងទាំង៨ចំណុចដែលគណបក្សទាំង២៨បានចុះកិច្ចព្រមព្រៀងជាមួយគ្នាតាំងពីមានជាមួយគ្នាដល់បច្ចុប្បន្នមានវឌ្ឍនភាពអ្វីបន្ថែមទៀត ហើយនឹងស្ថានភាពនយោបាយអ្វីជាដើមដែលអាចជជែកគ្នានៅពេលខាងមុខ»។

គួរឱ្យដឹងផងដែរថាគណបក្សប្រជាជនកម្ពុជាបានចុះហត្ថលេខាលើកិច្ចព្រមព្រៀងចងសម្ព័ន្ធភាព ជាមួយបណ្ដាគណបក្សនយោបាយនៅកម្ពុជា ចំនួន២៧ផ្សេងទៀត កាលពីព្រឹកថ្ងៃទី២៥ ខែតុលា ឆ្នាំ២០២៣។ កិច្ចព្រមព្រៀងចងសម្ព័ន្ធនោះ៨ចំណុចអំពីការពង្រឹងកិច្ចសហប្រតិតបត្តិការល្អ គោរពការពារបូរណភាពទឹកដី រដ្ឋធម្មនុញ្ញ និងរាជានិយម ចូលរួមសហការទប់ស្កាត់ និងកំចាត់ចោលនយោបាយជ្រុលនិយមជាដើម៕

អត្ថបទដោយ ហ៊ុន សិរីវឌ្ឍន៍