ព័ត៌មានជាតិ

អាជ្ញាធរខណ្ឌឫស្សីកែវ ចុះណែនាំម្ចាស់ស្រះចិញ្ចឹមត្រី និងទីតាំងអាជីវកម្មមាន់បោច ដើម្បីរក្សាបរិស្ថានអនាម័យឲ្យល្អប្រសើរ

បានផុស

៣៦ វិនាទី មុន

នៅ

ថ្ងៃអង្គារ ១៨ មីនា ២០២៥

ដោយ

អាជ្ញាធរខណ្ឌឫស្សីកែវ បានចុះណែនាំ និងធ្វើកិច្ចសន្យាដល់ម្ចាស់ទីតាំង ០២ កន្លែងផ្សេងគ្នា ដើម្បីរក្សាបរិស្ថានអនាម័យកុំឲ្យជះក្លិនមិនល្អដល់ផ្ទះប្រជាពលរដ្ឋជិតខាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះធ្វើកិច្ចសន្យានេះធ្វើឡើងកាលពីវេលាម៉ោង ០៩ និង ០០ នាទីព្រឹក ថ្ងៃទី ១៨ ខែមីនា ឆ្នាំ ២០២៥ ដឹកនាំដោយ លោក ឌន ដាវុឌ នាយករងរដ្ឋបាលខណ្ឌ ក្រោយទទួលបានការបញ្ជាដឹកនាំរបស់លោក ជិន ប៊ុនធឿន អភិបាល នៃគណៈអភិបាលខណ្ឌឫស្សីកែវ និងមានការចូលរួមពីមន្ត្រីជំនាញការិយាល័យសាធារណការខណ្ឌ , ការិយាល័យសេដ្ឋកិច្ចខណ្ឌ និង សង្កាត់ច្រាំងចំរេះទី ០១។

យុទ្ធនាការចុះនេះ អាជ្ញាធរបានចុះពិនិត្យ និងណែនាំម្ចាស់អាជីវកម្ម ចំនួន ០២ ទីតាំង គឺ ទី០១-ទីតាំងស្រះចិញ្ចឹមត្រី ក្រុមការងារបានណែនាំឲ្យម្ចាស់ធ្វើការសម្អាតអនាម័យជាប្រចាំជុំវិញម៉ាស៊ីនលាយចំណីត្រី និងលាងសម្អាតសម្ភារៈប្រើប្រាស់ដែលពាក់ព័ន្ធឲ្យបានស្អាតជាប្រចាំជៀសវាងមានក្លិនស្អុយដល់អ្នកជិតខាង។ ទីតាំងនេះ ស្ថិតនៅភូមិ ០៣ សង្កាត់ច្រាំងចំរេះទី ០១ ខណ្ឌឫស្សីកែវ រាជធានីភ្នំពេញ។ ចំណែក ទី០២-ទីតាំង អាជីវកម្មមាន់បោច ក្រុមការងារបានណែនាំម្ចាស់ធ្វើការសំអាតអនាម័យក្នុងបរិវេណទីធ្លានោះឲ្យបានស្អាត និងរៀបចំប្រព័ន្ធបង្ហូរទឹកឲ្យបានត្រឹមត្រូវ ជៀសវាងមានក្លិនស្អុយប៉ះពាល់ដល់អ្នករស់នៅជិតខាង ដែលទីតាំងនេះស្ថិតនៅភូមិ ០៤ សង្កាត់ច្រាំងចំរេះទី ០១ ខណ្ឌឫស្សីកែវ រាជធានីភ្នំពេញ។

មន្ត្រីអាជ្ញាធរបានបញ្ជាក់ថា ក្រោយធ្វើការណែនាំ និងធ្វើកិច្ចសន្យារួច ក្នុងករណីម្ចាស់អាជីវកម្ម នៅតែមិនសហការ និងធ្វើតាមការណែនាំរបស់អាជ្ញាធរនោះទេ រដ្ឋបាលខណ្ឌ នឹងចាត់វិធានការរដ្ឋបាល៕

អត្ថបទ ៖ សុភា