ពូទីន ព្រមឈប់បាញ់តែលើសំណង់ហេដ្ឋារចនាសម្ព័ន្ធ និងរោងចក្រថាមពលអ៊ុយក្រែន ប៉ុណ្ណោះ

ជំនួបតាមទូរស័ព្ទរវាងលោក វ្ល៉ាឌីមៀរ ពូទីន និងដូណាល់ ត្រាំ បានទទួលផ្លែផ្កាគួរសម ដ្បិតតែប្រធានាធិបតីរុស្ស៊ីមិនឯកភាពលើបទឈប់បាញ់ពេញលេញក៏ដោយ ប៉ុន្តែលោកបានយល់ព្រមផ្អាកការវាយប្រហារលើសំណង់ហេដ្ឋារចនាសម្ព័ន្ធនិងរោងចក្រថាមពលអ៊ុយក្រែន រយៈពេល៣០ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT នៅថ្ងៃពុធទី១៩ខែមីនាឆ្នាំ២០២៥, កិច្ចសន្ទនារវាងមេដឹកនាំទាំងពីរមានរយៈពេល២ម៉ោងកន្លះ ហើយក្រៅពីបទឈប់បាញ់ ប្រមុខរដ្ឋទាំងពីរក៏បានពិភាក្សាប្រកបដោយភាពវិជ្ជមានលើបញ្ហាដទៃទៀតផងដែរ។

ដោយឡែក សារព័ត៌មាន BBC ឯណោះបានចុះផ្សាយថា លោកពូទីន មិនព្រមស៊ីញេលើបទឈប់បាញ់គ្រប់ជ្រុងជ្រោយដែលរៀបរៀងដោយក្រុមរបស់លោក ត្រាំ ជាមួយភាគីអ៊ុយក្រែននៅប្រទេសអារ៉ាប៊ីសាអូឌីតទេ ព្រោះថា បទឈប់បាញ់បែបនេះអាចលេចចេញជារូបរាងបាន លុះត្រាតែបរទេសឈប់ផ្តល់ជំនួយយោធានិងចែករំលែកការណ៍សម្ងាត់ជាមួយទីក្រុងកៀវ។

ក្រៅពីអ៊ុយក្រែន ប្រមុខរដ្ឋទាំងពីរ បានពិភាក្សាគ្នាអំពីស្ថានភាពនៅមជ្ឈិមបូព៌ា ក៏ដូចជាកិច្ចសហប្រតិបត្តិការដ៏មានសក្តានុពល ក្នុងគោលបំណងការពារជម្លោះនាពេលអនាគតនៅក្នុងតំបន់នោះផងដែរ។

ប្រធានបទសំខាន់ផ្សេងទៀតនៅក្នុងរបៀបវារៈរបស់មេដឹកនាំទាំងពីរ គឺតម្រូវការបញ្ឈប់ការរីកសាយភាយអាវុធយុទ្ធសាស្ត្រនៅទូទាំងពិភពលោក និងកិច្ចសហប្រតិបត្តិការស្តារទំនាក់ទំនងរវាងប្រទេសទាំងពីរឡើងវិញ៕

អត្ថបទ៖ សុខ សុវណ្ណ

ចុចអាន៖ ជំនួយការ ហ្សេលេនស្គី៖ ទោះមានបទឈប់បាញ់ ក៏អ៊ុយក្រែន មិនបោះឆ្នោតរើសមេដឹកនាំថ្មីដែរ