ការដោះដូរទំនិញរវាងកម្ពុជា-​ចិន​សម្រេចបានជាង ២,៦ពាន់លានដុល្លារ នៅក្នុងរយៈពេល២ខែដើមឆ្នាំ២០២៥

ទំហំទឹកប្រាក់នៃការដោះដូរទំនិញទ្វេភាគីកម្ពុជា-ចិន សម្រេចបានទំហំទឹក​ប្រាក់​ជាង ២,៦៦២ ពាន់លានដុល្លារ​នៅក្នុង​រយៈពេល២ខែ​ដើមឆ្នាំ ២០២៥ មានការកើនឡើងជាង ២១ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះ​បើ​យោង​តាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)។​

ទិន្នន័យរបស់ GDCE បង្ហាញថា នៅក្នុងចន្លោះពីខែមករាដល់ដំណាច់ខែកុម្ភៈ ​ ការនាំចេញ-នាំចូលទំនិញ​រវាង​ប្រទេស​​​​​​ទាំងពីរមានទឹកប្រាក់សរុប ២,៦៦២ ពាន់លានដុល្លារ កើនឡើង​ ២១,១ ភាគរយធៀបរយៈពេលដូចគ្នាក្នុងឆ្នាំមុនដែលចំនួន ២,១៩៩។  ក្នុង​នោះ​កម្ពុជានាំទំនិញទៅចិន មានតម្លៃប្រមាណ ២១៨ លានដុល្លារ ធ្លាក់ចុះ ៤,៣ ភាគរយ និង​ទំនិញ​ចិន​នាំចូល​មកកម្ពុជា​តម្លៃ ២,៤៤៥ ពាន់លានដុល្លារ កើន ២៤ ភាគរយ។ ការណ៍នេះធ្វើឱ្យ​កម្ពុជាមានឱនភាពពាណិជ្ជកម្មជាមួយចិន ដែល​មាន​ទឹក​ប្រាក់​ ២,២២៦ ពាន់លានដុល្លារ។

ពាក់ព័ន្ធទៅនឹងឱន​​ភាព​​​​ពាណិជ្ជ​កម្មរវាង​កម្ពុជា​ចិន លោក លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃរាជ្យបណ្ឌិតសភាកម្ពុជាបានថ្លែងថា ឱន​​ភាព​​​​ពាណិជ្ជ​កម្មដែលកម្ពុជា​ទទួលរងនេះមិនមានកំណើនខ្ពស់ទេ ដោយសារចិនមានផលិតកម្ម​រោងចក្រ​កាត់​ដេរ និងរោងចក្រឧស្សាហកម្មច្រើននៅកម្ពុជា។​ ដូច្នេះកម្ពុជាមានតម្រូវការ វត្ថុធាតុដើម សម្ភារៈ ពីប្រទេសចិនធូរថ្លៃជាងគេ បើប្រៀប​ធៀបជាមួយអាស៊ាន ហើយ​សម្ភារៈវត្ថុធាតុដើមសម្លៀកបំពាក់ក៏មានច្រើន។

លោកថា ទោះបីកម្ពុជាបានចុះកិច្ចព្រមព្រៀងទីផ្សារ​សេរីជាមួយប្រទេស​ចិនក៏​ដោយ ក៏ឱនភាព​ពាណិជ្ជ​កម្ម នៅតែបន្តកើតមាន ដោយសារកម្ពុជាមានតម្រូវការ​ធំពីប្រ​ទេស​​ចិន ដែលមានសម្ភារ​បរិក្ខាផ្សេងៗ។

​យោងតាមក្រសួងពាណិជ្ជកម្ម នៅក្នុងឆ្នាំ ២០២៤ ពាណិជ្ជកម្មទ្វេភាគីរវាងកម្ពុជា-ចិន សម្រេចបាននូវទំហំទឹកប្រាក់ ១៥,១៨ ពាន់លានដុល្លារ កើនឡើង ២៣,៨ ភាគរយ ធៀបនឹងឆ្នាំ ២០២៣ ក្នុងនោះ​កម្ពុជានាំចេញទំនិញទៅចិន មានតម្លៃ ១,៧៥ ពាន់លានដុល្លារ កើនឡើង ១៨,៤ ភាគរយ និងទំនិញចិននាំចូលមកកម្ពុជាមានតម្លៃ ១៣,៤៣ ពាន់លានដុល្លារ កើនឡើង ២៤,៦ ភាគរយ៕