កីឡា

លោក Gyotoku បានបង្កើតកំណត់ត្រាល្អ២ជាមួយយុវជនវៀតណាម

បានផុស

២២ នាទីutes មុន

នៅ

ថ្ងៃពុធ ១៩ មីនា ២០២៥

ដោយ

លោក Koji Gyotoku ធ្លាប់បានដឹកនាំក្រុមយុវជនជម្រើសជាតិកម្ពុជាបង្កើតស្ថិតិល្អក្នុងការប្រកួតជាមួយក្រុមយុវជនជម្រើសជាតិវៀតណាម មុនពេលលោកត្រូវដឹកនាំក្រុមកម្ពុជាជម្រើសទី១ប៉ះក្រុមវៀតណាមជម្រើសទី១ វេលាម៉ោង៧:៣០នាទីយប់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្មើយុវជនវៀតណាម ១-១

ក្រុមយុវជនជម្រើសជាតិកម្ពុជាអាយុ១៦ឆ្នាំ បានប្រកួតស្មើជាមួយក្រុមយុវជនវៀតណាម ដោយលទ្ធផល ១-១ ក្នុងពានរង្វាន់ AFF U16 Championship កាលពីថ្ងៃទី២៥ ខែមិថុនា ឆ្នាំ២០២៤ នៅប្រទេសឥណ្ឌូណេស៊ី។ ពេលនោះ លោកគ្រូ Koji Gyotoku បានដឹកនាំក្រុម U16 កម្ពុជាមិនចាញ់សោះនៅវគ្គសន្សំពិន្ទុក្នុងពូលគឺឈ្នះ២ និងស្មើ១ ដោយមាន៧ពិន្ទុស្មើវៀតណាម ប៉ុន្តែមិនបានឡើងវគ្គពាក់កណ្តាលផ្តាច់ព្រ័ត្រដោយសារចាញ់គ្រាប់បាល់វៀតណាម។

ឈ្នះយុវជនវៀតណាម ២-១

ក្រុមបាល់ទាត់កម្ពុជាអាយុក្រោម១៨ឆ្នាំ បានបង្កើតកំណត់ត្រាជ័យជម្នះជាលើកដំបូង នៅក្នុងពានរង្វាន់ AFF U-18 Youth Championship កាលពីថ្ងៃទី១៥ ខែសីហា ឆ្នាំ២០១៩ ដែលស្ថិតក្រោមការដឹកនាំរបស់លោកគ្រូ Koji Gyotoku។ កីឡាករកម្ពុជា ធី លៀង និង សៀង ចន្ធា ជាអ្នកស៊ុតចូលវៀតណាមដើម្បីទទួលបានជ័យជម្នះនៅលើទឹកដីវៀតណាមតែម្តង។ នៅពេលនោះ កម្ពុជារកបាន៦ពិន្ទុ ស្ថិតនៅលេខ៤ ហើយវៀតណាមរកបាន៧ពិន្ទុ ស្ថិតនៅលេខ៣ ប៉ុន្តែមិនបានឡើងទៅកាន់វគ្គពាក់កណ្តាលផ្តាច់ព្រ័ត្រដូចគ្នា ខណៈ អូស្ត្រាលី និង ម៉ាឡេស៊ី បានឡើងវគ្គបន្ត។

ប៉ះវៀតណាមជាលើកដំបូង

លោក Koji Gyotoku ត្រូវដឹកនាំក្រុមជម្រើសជាតិកម្ពុជាជម្រើសទី១ប៉ះវៀតណាមជាលើកដំបូង ក្នុងនាមជាគ្រូបង្គោល វេលាម៉ោង៧:៣០នាទីយប់នេះ។ តាមប្រវត្តិសាស្ត្រគិតចាប់តាំងពីឆ្នាំ១៩៩៦ កម្ពុជាធ្លាប់ជួបវៀតណាម៩លើកក្នុងពានរង្វាន់ផ្លូវការ ប៉ុន្តែមិនធ្លាប់ឈ្នះ ឬស្មើវៀតណាមឡើយ។ ចាំមើលលើកនេះ លោកគ្រូអាចកែប្រែប្រវត្តិសាស្ត្របានដែរឬទេ?

អត្ថបទ៖ វីរបុត្រ

Related Topics:ក្រុមបាល់ទាត់ជម្រើសជាតិកម្ពុជា Koji Gyotoku