ព័ត៌មានជាតិ

ត្បូងខេត្តមណ្ឌលគិរីមិនសូវមានតម្លៃ គុណភាពចាញ់ត្បូងខេត្តរតនគិរី

បានផុស

២៤ នាទីutes មុន

នៅ

ថ្ងៃពុធ ១៩ មីនា ២០២៥

ដោយ

ខណៈដែលខេត្តមណ្ឌលគិរីមានធនធានរ៉ែមាសដ៏មានតម្លៃកំពុងទាញធ្វើអាជីវកម្ម ខេត្តភូមិភាគឦសាននេះមិនសូវមានភាពល្បីល្បាញលើធនធានរ៉ែត្បូងមិនដូចខេត្តរតនគិរីដែលនៅក្បែរខាង។

លោក ងិន សុវិមាន អភិបាលរងខេត្តមណ្ឌលគិរីបានឲ្យដឹងថា ខេត្តមណ្ឌលគិរីមានសក្តានុពលលើធនធានរ៉ែមាស ដោយឡែកធនធានរ៉ែត្បូងវិញគឺមានតិចតួច និងមិនសូវល្បីដូចនៅខេត្តរតនគិរីនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបតំណាង

ជាមួយធនធានរ៉ែត្បូងមានតិចតួច លោក ងិន សុវិមាន បានអះអាងថា ត្បូងខេត្តមណ្ឌលគិរីគុណភាព និងទឹកចាញ់ត្បូងខេត្តរតនគិរី។

បើតាមលោកអភិបាលរងខេត្ត ត្បូងខេត្តមណ្ឌលគិរីភាគច្រើនជាត្បូងពណ៌ខៀវ ហើយបច្ចុប្បន្នមិនទាន់មានក្រុមហ៊ុនទាញធ្វើអាជីវកម្មធំដុំនោះដែរ។

សក្ដានុពលធនធានរ៉ែចម្បងៗរបស់ខេត្តមណ្ឌលគិរី គឺរ៉ែមាស រ៉ែបុកស៊ីត (វត្ថុធាតុដើមសម្រាប់ផលិតអាលុយមីញ៉ូម) និងខ្សាច់ ក្រួស ថ្ម ជាដើម។

ខេត្តមណ្ឌលគិរីមានក្រុមហ៊ុនចំនួនពីរ កំពុងធ្វើអាជីវកម្មរ៉ែមាស ដែលក្នុង ១ ខែ អាចចម្រាញ់រ៉ែមាសបានប្រមាណ ៣០០ ទៅ ៤០០ គីឡូក្រាម ហើយក្នុងមួយឆ្នាំបានប្រមាណ ៣ តោន។

លោក គង់ ស៊ីថា អគ្គនាយករងទទួលបន្ទុកនាយកដ្ឋានភូគោកសាស្ត្ររ៉ែ និងឧស្សាហកម្មអាជីវកម្មរ៉ែ នៃអគ្គនាយកដ្ឋានធនធានរ៉ែបានបញ្ជាក់ថា ក្នុងចំណោមក្រុមហ៊ុនកំពុងវិនិយោគរ៉ែមាសនៅក្នុងខេត្តមណ្ឌលគិរី មានក្រុមហ៊ុនរ៉ឺនេសង់ មីនើរ៉េល ដែលជាក្រុមហ៊ុនកំពុងវិនិយោគចម្រាញ់រ៉ែមាសធំជាងគេនៅកម្ពុជា។

ក្រុមហ៊ុនមានមូលដ្ឋានមកពីប្រទេសអូស្រ្ដាលីនេះ កំពុងធ្វើអាជីវកម្មទាញយករ៉ែមាសនៅក្នុងភូមិសាស្រ្តតំបន់អូរខ្វាវ ខេត្តមណ្ឌលគិរី ដោយមានរណ្ដៅរ៉ែមាសសរុបចំនួន ៧ រណ្ដៅ កំពុងតែដំណើការ៕