វត្តមានព្រលានយន្តហោះថ្មី​ កម្ពុជារំពឹងទទួលបានភ្ញៀវទេសចរណ៍អន្តរជាតិ ៧,៥ លាននាក់ នៅឆ្នាំនេះ ​

លោក ហួត ហាក់ រដ្ឋមន្ត្រីក្រសួងទេសចរណ៍បានឱ្យដឹងថា កម្ពុជារំពឹងទទួលបាន​ភ្ញៀវទេស​ចរ​អន្តរ​ជាតិចំនួន ៧,៥ លាននាក់ នៅក្នុងឆ្នាំ ២០២៥ ​ជាមួយនឹងការដាក់ឱ្យដំណើការនៃព្រលានយន្តហោះអន្តរជាតិតេជោនាខែកក្កដាខាងមុខនេះនឹងបង្កើនការតភ្ជាប់កម្ពុជាទៅកាន់ទិសដៅទេចរណ៍កាន់តែច្រើនទាំងក្នុងតំបន់ និងសកលលោក។

លោករដ្ឋមន្ត្រីមានប្រសាសន៍ប្រាប់សារព័ត៌មានក្នុងឱកាសអញ្ជើញដឹកនាំគណៈប្រតិភូធ្វើទស្សនកិច្ចព្រលានយន្តហោះអន្តរជាតិតេជោ នៅព្រឹកថ្ងៃទី ១៩ ខែមីនា ឆ្នាំ ២០២៥។

លោករដ្ឋមន្រ្តីបានបញ្ជាក់ថា អាកាសយានដ្ឋានអន្តរជាតិតេជោ នឹងរួមចំណែក សម្រាប់​កេរ្តិ៍​ឈ្មោះ​ និងកិត្តិនាមកម្ពុជា និងជាតម្លៃបន្ថែមខ្ពស់សម្រាប់វិស័យទេសចរណ៍កម្ពុជា។ លោកបានថ្លែងបន្តថា ការសាងសង់បាននូវព្រលានយន្តហោះអន្តរជាតិខ្នាត 4F ហើយ​អនុញ្ញាតឱ្យយន្តហោះរហូតដល់ប្រភេទ A380 ចុះបាន ដែលពិភពលោក​បានផ្ដល់​ចំណាត់​ថ្នាក់​លេខ​៩ គឺពិតជាមានសារសំខាន់ ដែលនឹង ជួយសម្រួលវិស័យទេសចរណ៍កម្ពុជា។

លោក ហួត ហាក់ បន្ថែមថា៖ «បន្ទាប់ពីព្រលានយន្តហោះលំដាប់អន្តរជាតិថ្មីនេះ ត្រូវបានសម្ពោធ​ដាក់​ឱ្យប្រើប្រាស់ជាផ្លូវការនៅខែកក្កដាខាងមុខនេះ គឺយើងរំពឹងថា ភ្ញៀវទេសចរអន្តរជាតិនឹង​ធ្វើដំ​ណើរ​​មកលេងកម្ពុជាកាន់តែច្រើន»។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍ថា កត្តា​សុខ​សន្តិភាព ស្ថិរភាព និងការរៀបចំហេដ្ឋារចនាសម្ព័ន្ធបានធ្វើឱ្យលំហូរ​ភ្ញៀវទេសចរ​អន្តរជាតិ​កើន​ឡើង​ជាលំដាប់។

យោងតាមក្រសួងទេសចរណ៍នៅក្នុងឆ្នាំ ២០២៤ កម្ពុជាទទួលបាន​ទេស​ចរណ៍​​​អន្តរជាតិជាង ៦,៧ លាននាក់ កើនឡើង ២៣% ធៀបនឹងឆ្នាំ ២០២៣ ក្នុងនោះ​ទទួល​បាន​ចំណូលសរុបជាង ៣,៦៣ ពាន់លានដុល្លារ កើនជាង ១៧%។

ក្នុងចំណោមភ្ញៀវទេសចរជាង ៦,៧ លាន​នាក់ ទេសចរណ៍ថៃឈរនៅ​លំដាប់​លេខរៀងទី ១ មាន​ចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេស​ចរឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%។

ក្រ​សួងទេចរណ៍បានធ្វើការព្យាករណ៍ថា កម្ពុជា​នឹង​ស្វាគមន៍ភ្ញៀវ​ទេចរអន្តជាតិ ​៧,៥ លាននាក់​នៅឆ្នាំ២០២៥ ដែលនឹងបង្កើតចំណូល​ចូល​សេដ្ឋកិច្ច​​ជាង៥ពាន់លានដុល្លារ​៕

អត្ថបទ៖ ឡេង ដេត